2008年12月31日 星期三

賀年全盒 IV - 完成品

如果全盒同一切配件都已經預備好,咁就可以開開心心擺出黎啦喂!


弊!做得太多款式添,個全盒得六格,唯有選擇性咁放幾種出黎啦。


未上色既全盒及配件,留意睇下硬卡紙做的分隔,望清楚啦,真係布丁杯個杯底反轉黎用架!係咪好有型呢?



油咗金身之後,唔講你都唔知佢原來只係一只打算放入回收箱的膠杯.對唔住啦,椰角,蓮子,你地咁淺色,唔夠其他糖果搶鏡呀,冇得出鏡添!



好!來一幅熱熱鬧鬧的集體相



你又喜歡吃那一款賀年食品呢?


2008年12月30日 星期二

賀年全盒 III

年糕、年高,年年高陞喎,邊個唔想吖。有大、有細,既有欖仁,又有瓜子仁,中間粒紅棗係意頭野,唔少得架,記住要整到縐縐地喎,仲要中間督返個窿做蒂呀。


未裝身既年糕:



瓜子仁加紅棗



欖仁加紅棗


各位觀眾,化咗粧既年糕!



令立立,靚仔晒!



煎堆、油角雖然熱氣少少,但賀年食品,有佢係度坐陣就熱鬧好多啦。



話時話吖,我對手分分鐘靚過d廿零歲既妹妹仔呀!(唔敢同d十零歲既黎比住!)爸爸都成日話我唔做家務既.



我只係做咗呢四粒咋!送咗俾我四家姐lu!



做油角,我真係有鎖返條邊架!



食晒呢兜野一定熱氣到暈啦!


不過,雖然大家依家睇到既係大過實物原大,但係迷你野係咪一定要將將就就便了呢?


我始終覺得仲可以改善一下既,用野督窿始終都係太粗糙,唔知道換果沙土黎做會唔會好d呢?我就未試過呢款粘土啦,有冇玩過既朋友可以指較一下呢?


2008年12月29日 星期一

手下留情 - 劉向群

昨日,我往圖書館閒逛,順道找工具書,無意間被我發現這本最新推介的書 – 手下留情 (劉向群著)。A4紙大小的書,全彩色中英對照,202頁,辛苦一點也要擡回家仔細欣賞啊!





最令我吃驚的是:和合麵原來也可以造出幼細小巧的造像!





虎父無犬女,家學淵源,亦造就了一位另類藝術家。





其實,我早知道這位麵塑家在香港已有好幾年。由她早期的作品到如今,確是有很大的進步。人物的造型更酷似,眼神姿態越來越出色,跳出了一般麵塑的框框。這可是她多年浸淫的成果,希望她再上一層樓,我在此為她送上點點祝福。





恕我直言,我覺得觀音的面相可以再莊嚴一點,再努力啊!








看到嗎?她可是把自己也造出來了!


賀年全盒 II

做得全盒,咁裏面既餡又點少得呢?


糖蓮藕、冬瓜、蓮子、椰角、紅蘿蔔、椰絲,仲有瓜子同糖果等等,相信好多人都做過,不如試下整金元寶吖!



呢樣野,亦都曾經變成我送俾親友既賀年禮。


我亦都有靜雞雞係d同事既電腦前面放咗大小三粒金元寶架,咁佢地返到公司就有意外驚喜啦!尤其係佢地跟本有為意我俾咗野佢地,做做下野先突然發現自己執到金呀!



2008年12月28日 星期日

賀年全盒 I

就過年啦,好多做過迷你粘土品既同好,或者都整過下全盒啦。


有人會買現成既六角全盒,或者圓形既,亦有人會自己整。


我呢d咁懶既人,又想慳錢,又想個全盒特別d,又想細少少既,咁點搞好呢?


燈!燈!燈!Dun!


就係用雞蛋布丁杯啦!


你地知唔知成隻杯都係六瓣波浪型既呢?仲係一路收窄架喎,最正既係佢既杯底仲有一截杯腳,反轉佢就係容器啦!


首先,要齊腳鋸開佢,杯底剛好貼住杯腳留低。咁就係全盒個膽啦!D分隔點算?自己用紙做partition啦!


咁個蓋呢?


我咪話咗隻杯身係一路收窄既,就咁再鋸一截出黎,係濶d口果邊,粘返塊紙皮,咪可以做盒蓋咯。當然啦,我有鬼d咩發熱工具咩!鋸出黎既邊係醜咗少少架啦,我既克難工序係咁上緊架啦!


嗄!就咁見人?唔係啦卦?咁咪好肉酸咯?


我都知,所以我都有為佢做返一條用黎遮醜既粘土邊既。所謂人要衣裝,我個全盒就要金裝啦!你地睇下,係咪得得地呢?



通常d人都會係個蓋面畫下畫既,我咁懶,都係咪啦,反正show出黎既時候,多數都揭開咗個蓋架啦!



呢d傻事,係兩年前做既,我唔會再咁搞架啦。如果你地有興趣既話,不妨做一次傻瓜吖!我諗仲趕得切架!


係咪真係work既?唔信,下次逛超市,多手拎杯雞蛋或者朱古力布丁睇下啦,再想像一下我講既野,有時垃圾都可以變精品架!


2008年12月27日 星期六

做織女

買到d新毛冷,即刻開工玩下


呀女話:乜你織得咁魔架,我見人地織得好快架喎。


點同呢?我對上一次織野,係讀緊書果陣喎。幾多年前呀?你都咁大舊啦!(佢最唔鍾意我用"舊進制"既,佢比較喜歡我用"個"呢個量詞,鬼叫佢咁衰chai阿媽呀!)


做咗一日織女,已經織好一條頸巾啦。剛好用黎送俾將由美國返黎探我既朋友,呢d毛毛球毛冷,織出黎真係好柔軟舒服。



買咗兩舊冷,只係用咗舊半,仲有半舊點算呢?



即刻趕工,再織一條小朋友頸巾先!個零鐘就織好啦,超快呀!即刻拎出去送俾人.



其實仲有少少冷剩架,或者可以用黎做其他手作仔既.


2008年12月26日 星期五

收禮物 IV

到我地咁上下年紀,收到小朋友寄黎既卡就最開心啦,呢一張係我係blog度認識既瑩瑩小朋友寄黎既:



呢幅相好自然,越睇越開心!



冇諗過公司d青衣小朋友會送禮物俾我,好感動呀!睇住大家一年一年咁長大,一個二個順順利利係High Court扑頭殼,我都好為你地既屋企人開心架.記住好好珍惜你地既學習期,第日做個有為既律師呀!



呢盒聖誕曲奇就係25號果日同d青少年一齊dap晒啦,佢地仲夾手夾腳食埋罐腰果爆谷添,大家不知幾捧場呀!



真開心,又收到罪惡曲奇.唔敢開住,唔想咁快要去告解.



今年既熊仔罐設計非常精美,我識做架啦,食完一定拎返公司俾喜歡儲靚靚罐既同事既.


2008年12月25日 星期四

聖誕午餐

24號,公司中午安排了到會食物。八點多已經有人佈置場地,十二點幾就開動啦,食物種類都算多,大家都吃得飽飽的。雖然有好幾名外援幫口,都有好多食物留低,要勞煩一眾師奶同事,合力將食物打包,夜晚繼續開P。









 


我都係咁意打包咗燒豬脾、磨菰炒飯同西蘭花併椰菜花。原本晚上既小小大食會,即刻要改餐單。因為事先已經備妥沙律同訂了一盆壽司,加上我又訂咗聖誕蛋糕,真係唔駛再添咁多食物啦。即刻hold住D pizza餐唔訂啦,今次連油菜都慳返唔駛淥呀。如果一早知道有咁多沙律既話,就叫人唔駛整啦。連Cova蛋糕都食剩,若果唔介意既話,真係乜都可以夠食架.


 


終於,夜晚幾丁人,合力砌晒d打包返黎既食物,連天使蛋糕都食晒,只係剩咗沙律唧。


收禮物 III

16/12,未到聖誕就收到聖誕禮物,係老闆個朋友送既,我地兩個一人一份。



Cova既聖誕朱古力,老闆果份就係正經版,我果份就係Q版。真的不好意思啊,又令人家破費了。



袋裏面有只軟林林既熊仔攬住包朱古力,拆開金色禮物袋,就係充滿聖誕色彩既朱古力啦!



但最令我滿心歡喜既,反而係呢張精美既賀卡,幾咁可愛呀!佢地手上仲拎住只“真”叉架!


淨收呢張卡都夠開心啦。

2008年12月22日 星期一

收禮物 II

今日又收到聖誕禮物啦!


 


呢份係今日下午速遞公司送黎既,人地話係送俾呀女既禮物喎,咁即係大家架啦!




咁金碧輝煌既?




原來係腰果爆谷黎!



都幾甜,唔可以一次食好多。



一於廿五號請埋d青少年朋友一齊食咗佢啦!


又一張訂單

今早check email, 有人offer US$350要我做一個粘土朱古力蛋糕, 29/1前寄到美國. 大家都知我係會捐返出黎既, 所以出手都好疏爽.


接唔接好呢? 我唔敢覆人住, 呢排真係冇乜mood搞d咁野.


唔怕老實講, 整完薑餅仔既檔, 都仲未執返好呀! 張工作檯七國咁亂!


剛剛先買咗套紙lace玩具, 又借咗d參考書, 昨晚先cut開咗一張牛油紙, 仲未開始研究, 唔通又要掉低佢?


唉! 新年禮仲未開工喎....


點算呢? 真係要諗諗佢啦.


2008年12月21日 星期日

收禮物 I

臨近聖誕,陸續收到聖誕禮物。


今次收到呢份:



係茶包同薑餅,咁橋既?我剛好想去買茶包,又咁啱我今年送俾大家既係假狗薑餅人!



呢個罐正呀!大家睇下,個罐蓋有棵樹,或者可以用黎做壓模,但未知可以用黎做d乜。



總之,先發揮垃圾婆本色先,一於keep起佢。