2009年2月28日 星期六

今日最新鮮係乜?

我都幾鍾意逛街市架,因為可以買到最新鮮既野。濕咩?死就死啦,冇人叫你著得咁靚去wet架。


你地估我今日搵到d乜呢嗄?



知唔知係乜來呀?咁肥大既?



開啦喂!



睇到未呀?係新鮮蠶豆黎架!



睇下幾嫩,粘住豆莢既部份仲係青青綠綠既.



呢度已經係成斤蠶豆剝出黎既份量啦.好彩都唔貴,五蚊雞唧!



想知粒豆老唔老?睇下佢條眉就知啦,越老就越黑架!



如果條眉仲係好淺色,基本上唔剝外皮都已經食得架啦,高纖吖o麻.左邊果粒就係剝埋豆衣既.



如果粒豆係好嫩既話,就係咁青BB架啦.


好似呢d咁新鮮既蠶豆,我都係第一次買。咁點食呢?我係廣東人,唔曉喎。但係唔緊要,香港地,梗有一個上海人係左近既,打個電話問功課咪得咯。


據上海朋友講,如果d蠶豆好嫩,剝去豆莢就可以用黎炒架啦。最簡單既方法係燒紅只鑊,加油;油滾,放d豆入去炒,加少少水,蓋一陣;最好放d蔥花,多d都唔緊要喎;加少少鹽調味,一陣就食得架啦。


因為五香蠶豆都係我既童年回憶黎,所以,就算冇咩五香粉係屋企,我都用少少鹽水去烚咗十零粒連衣既豆黎食下。五分鐘就食得,粒豆身都好鬆化,皮就有少少厚,但未至於話要吐出黎。慢慢嗒真d,幸福呀!


2009年2月26日 星期四

餅面設計

今次要同大家分享既,係烘焙界猛人Ms. Louisa Ho編著既“餅面設計”。





雖然,我未學過點去做呀茂,但因為餅面設計對我既假狗蛋糕非常有幫助,所以我都會好樂意去睇多d,搵多d靈感既。





其實,講到做花方面,同整麵粉花既道理差無幾。所謂一理通,百理明,開卷有益,總有一d野學到既!





書裏面都有介紹基本工具同顏料既特性,仲有講埋做餅底既基本做法添,無論初學定已經做餅好叻,睇下都無妨吖.


 


2009年2月25日 星期三

到手啦!

新玩具到手啦!多謝小黑咪既割愛呀。



咁到底呢個圓規cutter好唔好用呢?


等我黎做d實驗俾大家睇下啦,圓形我就唔整啦,大家都知咩樣架啦。咁啱上次我買咗張粉綠色雲彩紙,薄薄地,就拎黎試下啦。





都幾鋒利,真係要小心d用呀!


2009年2月24日 星期二

同紙蕾絲搏鬥

好想實踐做下紙蕾絲,昨晚都同佢搏鬥咗成晚,一路做,Bibi一路話好amazing,但上色果度出咗事,描邊又唔夠幼細,過唔到自己果關,終於都係要扯白旗。或者大家都仲未係好熟絡,尤其係d工具,我後尾仲督穿咗張紙兩次添!仲有一樣弊病,就係原來淡色既紙係托唔起張紙蕾絲架,我原本買果張淡綠色既雲彩紙又用唔著啦,真係令人沮喪。


等我地再培養一下感情先啦,我唔會咁易放棄既,一定做得到既,問題只係我呢個大懶蟲,成日想出術,睇下有冇橋易做d唧。好!愚人節果日,我預計有一個姨甥孫仔會出世,禮物我已經買咗啦,或者到時可以練得成功,整到張蕾絲卡俾佢都未定。希望佢唔好早產啦!


俾多d時間我啦,我諗我會諗得通既。


剛剛買到glue paint係手,成日都想真係認認真真咁玩下。有日本朋友三月十號生日呀,諗住用黎做蛋糕寄去俾佢既,又碰啱呢輪天氣麻麻,做咗都趕唔切乾啦, 事關最遲星期一都要寄啦。


唯有拎粒麵包仔出黎,做電話繩送俾美奈小姐,希望佢會喜歡啦。


都想做過一批麵包仔用黎做電話繩架,但油咗顏色之後,等到地老天荒都唔乾。呢只係已經做咗好耐既貨色,先會咁乾爽咋。又因為我之前做既野偏細,所以唔適合用黎做呢d "叮鈴dun lung" 野,要玩就要從新做過一批,暫時都冇乜動力。



2009年2月23日 星期一

從May May到阿May、由May姐變May姨

初初出黎做野,唔計Mailing D哥哥仔,全公司我最細,所有人都叫我May May(妹妹)。
後來,做得幾年,同我年齡相仿既同事越來越多,大家就叫我阿May啦。
又再多做幾年,開始有d細我十年八載既同事咯喎,佢地又叫我May姐。叫叫下,連d明明大過我既,都順口叫埋我做May姐,冇所謂啦,都係一句唧。
做咗人地「家長」之後,小朋友在街上遇到我,都會叫我May姨既。叫叫下,佢地都大個晒啦。好彩May姨呢個稱呼可以持續好多年既唧。由幼稚園小朋友到大學生,通通都可以咁叫我。自己知自己事,唔通可以做到一世「長頭髮姐姐」咩!


但暑期班有個四歲既小朋友,佢堅持要叫我做May姨姨,由得佢啦,一句唧,心理上覺得好似後生d咁喎。
我d姨甥呢?大部份都卅幾歲咯,佢地都好識做,唔係佢地呀媽面前,有時都會叫我做May姐架。
當我開blog既時候,我諗都唔駛諗,就叫May姨算啦。之前我有諗過叫「蕉媽」既,事關Bibi全名係Bibianna,驟眼睇俾人覺得似Banana,所以佢都有個花名叫Bibi蕉。照計我應該可以順理成章做蕉媽架o麻,但就俾Bibi ban我,唔准我用呢個名喎,冇計,唯有用返May姨啦。


2009年2月22日 星期日

$10店尋寶記

睇完網友Pri既Jusco$10店既好介紹,都想去買果個可以cut到圓形既圓規。


屯門果間十成九冇架啦,就坐車去元朗碰下運氣啦!


呢間元朗店既通道比較窄,都幾人碰人下架,一心去搵圓規,梗係睇文具部先啦。好失望,好似冇喎。但係....俾我發現咗....


得來全不費功夫呀!Glue Paint呀!雖然冇啡色,好過冇啦,佢淨得黑、白、紅、黃、藍咋,殺!買咗至算,想玩就有得玩。今日係感謝日,即係$9.5一枝咋!



貪得意買咗d靚靚信封仔、一大堆清潔海棉、單眼打孔器、爸爸要既鉗、索帶、掛鈎、衣夾、一只講鏟泥機既DVD,一共三百幾蚊,我地都夠狼啦。



一早上定網睇下附近有咩好野食,我揀咗發記,佢出名煲仔粥同即拉腸粉既。兜黎兜去都搵唔到,冇理由架,想話打電話問人,爸爸又唔俾。都三點啦,我話:明明係合益正面對住果條街行入少少,跟住有個轉角街位就係咯喎。而且係B仔涼粉對面,應該好易搵架。再行多次,見到B仔涼粉啦,咦對面果間係咪呢?門面唔多覺,又有個大大既紅色布簷蓬遮住個招牌,真係佢呀!


入去即刻叫野食,我要及第粥走粉腸,呀姐話:咁即係豬膶肉片粥咋喎。


是但啦,咁有冇白粥呀?


有,但已經放咗鹽架咯喎,即係唔駛自己再加味。


好吖,一碗吖唔該。要埋炸倆吖。


睇住呀姐寫銀碼:$17$6$12,咁鬼抵既。


爸爸個白粥先上,咩話?連白粥都係一煲仔既!炸倆就麻麻啦,因為d油炸鬼唔靚,淋既。但因為腸粉係即拉既,所以都ok啦。


我煲粥黎啦,登dun - d豬膶超靚,好正呀!唔記得叫人走青添,但係佢地連蔥花都切得好幼細,證明係有俾心機整野俾人食既。


食食下,爸爸話:叫多碟齋腸咯。好呀,$7!


對面果位仁兄原本想叫炒米,但呀姐話冇晒米粉,於是佢就要炒麵。佢等咗一陣,見我地食腸粉咁高興,就問呀姐:如果炒麵都冇就俾碟齋腸黎啦。點知呀姐既回應係call入廚房:碟炒麵整咗未呀?嗄,炒緊?炒緊咯喎,好快有啦。


我以為係廚房話炒麵賣晒,所以炒緊一大兜黎賣。點知原來佢地既炒麵係即叫即炒架,而且係素炒麵黎,全部都係銀芽同椰菜碎之麻,仲係熱氣騰騰添。我諗就算人地係有放開蔥既,既然係逐碟炒既,叫佢唔落咪得咯。


就係咁$42,由頭食到尾都係咁熱辣辣,飽飽咁出返黎,抵呀!搭車入去食腸粉同粥都好呀,仲有好多款粥同腸粉架,爸爸唔食得我冇叫之麻.


2009年2月21日 星期六

為你度身訂做的印仔

星期四,收到網友師奶寄來的禮物。(因為她忘了寫便條付寄,所以事先留言張揚,失了一份驚喜,郤多了一份期望。)



噢!是雕印仔的橡皮刻刀及小印台(我是個大鄉里, 不看字還以為是唇膏呢!)。



讓我想想做甚麼回禮好呢?


我知道“熊貓”在師奶心目中舉足輕重,所以便立即著手研究各個熊貓的造型。最易做的,要算是世界自然生物基金會那個熊貓標誌了。描了草圖,放在一旁。再想想,人家會喜歡一個別人的商標嗎?不成!懶,總是躲不了的!



好吧,就因為你,我再提筆描另一隻熊貓。雖然說懶是躲不了,總可以偷一點點吧!藉口是:橡皮太小了啊,那我只好乾做頭部了。唔,心裏立時好過一點。


晚上趕工時,身旁的Bibi又再踐踏我的手作:如果沒了黑眼圈,這跟普通一隻熊仔有何分別呀?


你錯啦,看!耳朵沒有留白的啊,這可是貨真價實的熊貓呢。


口是硬,但心卻有點怯。直至完成印章,用螢光筆一掃,再在紙上蓋一下。



哈哈!成功了!果真是一隻熊貓呢,還擺出了一點點側頭的姿態。


很滿意,這可是我的第四個印印啊!



原不想讓大家看到移走了多餘橡皮的底部是那樣的不堪,但醜印終需要見師奶,秘密始終會被大家揭發,還是老實一點自首吧!


2009年2月19日 星期四

真係有咁大隻蛤乸隨街跳?

有冇見過市面有呢種木櫃仔賣呢?



係農曆年前,我d同事行開街無意中發現既。



呢個櫃仔只有16.5cm x 10cm大架咋,櫃上既樽仔都係木造既,個蓋仲可以打開,裏面都裝到野架。你地估下幾多錢吖拿?



原來個櫃只係HK$5咋!d樽仔係可以分開買既,一套9個,都係HK$5。



可惜當日我冇同佢地一齊行街,唔知有d咁超值野賣。D同事唔識貨,只係買咗幾個咋。我有叫佢地如果再行開就幫我大量入貨,果陣我淨諗住:「唔,咪有d網友玩咩轉移併貼藝術既,好似D人會將D圖案轉貼上D木盒/櫃仔度既,唔好理啦,買咗至算啦。或者大家都會有用掛,d櫃門同櫃桶全都都開到架,手工係差d,但以咁相宜既價錢,都唔算曳啦喎。用黎練習都抵啦!」
點知同事再去幫我搵,發現已經俾一個更識貨既人,一口氣成批二百幾個買起晒啦。我相信果位仁兄一定係賣開手作用品架啦!咁既貨色,如果轉手賣出去既話,佢分分鐘叫價十部都大把人會買呀,你地話係咪?


2009年2月18日 星期三

開心大發現

大家估下我搵到咩?
哈哈!呢d係我前年教暑期班獎俾小朋友剩低既擦膠黎架。



原來佢地都幾硬架喎,仲幾靚添。



即刻拎一粒黎試下先!拿,今次我係食完飯先玩既,只係大概用咗十分鐘咋,已經搞掂啦。



原來硬d既擦膠係易做好多架!


點解成日刻腳印既?


(一) 因為我身邊有好多鍾意養寵物既朋友;


(二) 因為最易做吖o麻!


仲駛問既!


2009年2月17日 星期二

第二個印仔整好啦! - For you

今天,做了無飯市民,趁午休開始刻第二個印仔。


雖然此款橡皮擦比較軟身,但因為沒有第二種物料可用,唯有將就一下吧。



今回,試試刻字。因為刀痕刻下後,並不顯眼,所以不能不起草稿。嘗試徒手刻一個心形,因為太傷眼力,所以只好乖乖描線了。


刻了「For you」,老大的一塊材料,還有地方可再刻點甚麼啊!好,就多放一隻小腳印吧。


隨手取枝螢光筆,試試看,馬馬虎虎,總算可以交功課。



粘土做得不好,可以重頭搓揉,橡皮擦刻壞了,就分分鐘沒救了。所以我覺得還是粘土易做得多,何況我只得一把筆刀呢,要再添點工具才成啊!


驟眼看,似乎不錯,可是真身o麻.....真會嚇一人跳呢!




2009年2月16日 星期一

我的第一個印仔

睇見大家成日玩雕印仔,等我又學下人地雕印仔先。


我諗都冇話咩方法唔可以用既,至多雕得冇人地咁靚既唧。好!就開工啦!


買唔到小熊講既十蚊店擦子膠,咁唯有買呢個平平地,十蚊六件既擦膠仔練習下先啦。


手頭得一把聖誕前新買既筆刀,爭d連刀片都唔曉上呀。咁尖,嚇鬼死,手軟呀。


手震震咁裝好塊刀片,連點控制都未知,輕輕力介下先啦,大力得滯,容乜易唔駛stamp pad都印到野架。


既然呢粒擦膠仔已經有個咁靚既蘑菰形輪廓,咁就唔好客氣啦,就懶懶地,整一個最易既先。


用鉛筆起稿,再介。咁下面蘑菰仔既表情點介架?唔知呀,照整住先啦。


大功告成!咁印台呢?搵返廿幾年前果d出黎,乾晒呀,陰功!咁點好呢?



唔怕,拎呀女細個果陣果套顏色筆出黎先,大部份都乾咗啦。咦!紫色果枝仲work喎。油黎試下先,OK喎!


大家睇下,呢個就係我既第一個印仔啦。



冇工具係手, 塊面係縐咗少少



其實塊擦膠真身係好靚靚既, 我雕果個就唔同咗樣啦.



加返面珠登先, 開心晒!


公司之最

除咗最近收到既櫻花漬同有機煎茶外,其實我在公司可放了不少茶類飲品呢。


西式既,有早餐必備既馬莎英式紅茶,奶茶係我生命裏面必備既!但放假唔飲我又唔覺有咩唔妥喎,或者中毒未夠深卦!



包裝精美既早餐茶,個罐好靚,仲有另一罐車厘子味既,仲靚,俾咗同事啦



日本人至愛綠茶粉,其實我冇乜飲既,用黎整野食多



綠茶茶包,貪心買得多,好似飲極都飲唔完咁



酒店禮籃內的飄香茶,得個名,冇乜特別,擺明係呃鬼佬野



茗閒情既桂花茶,呢只茶好香架,聞下都醒神呀



凍頂烏龍,係日本朋友送既台灣特產,好順喉既



龍井,我就麻麻,青氣重



馬騮搣,呢只茶夠晒香



2006年所浸既咸柑桔,得返三粒咋,要慳住飲,如無必要,忍下先!



還有已經除去包庄袋的玉桂、香片、潽洱等,加埋雪櫃裏面既紅莓蜜,檯頭既念慈庵,有機豆漿沖劑,朱古力粉等,真係有排飲架,仲可以用黎招呼埋我鄰近既同事添。品種多過大家寄存係公司茶房果d呀!


有次有個外藉女客人上黎開會,我問佢飲咩?佢居然問我有冇果d薰衣草、甘菊之類既,鬼佬覺得飲咗好寧神安眠既茶喎。去到人地公司,人地問你要唔要飲杯野,一般人只會話要咖啡、奶茶或者中國茶,甚至係水既唧,佢居然有d咁既要求,你估我開花草茶鋪既咩?擺明係玩野啦!


我係就係曾經有d法國花草/果香茶係度既,但因為接愛唔到d味,放放下都過晒期,有乾果粒係入面既,會變壞架,俾我掉鬼晒啦。


我老闆好乖仔架,如果我見佢都做野做得幾辛苦,我就會沖杯好野醒下佢。但無論我俾咩佢飲,佢都照倒入肚既。包括柚子蜜、田七茶、咸柑桔、竹蔗茅根精、菊花晶、紅棗茶、八寶茶、山渣茶,或者我亂咁整既鮮荔枝、杞子龍眼茶、玫瑰花茶等等。就算杯野顏色曖昧,氣味奇特,佢都會照飲,仲話:你俾得我飲,一定係好野黎既!