2009年3月31日 星期二

印仔十六、十七 – 復活兔


復活節就黎啦,多得* Jeannie *好介紹,我決定試下整兩隻復活兔送俾人。


第一位係非常喜歡兔仔既Jasmine佢點鍾意兔仔法?佢有養兔仔,仲用兔仔黎做自己結婚花車既公仔添!所以,我做俾佢既結婚蛋糕都係用兔仔做主題既。希望佢收到呢份復活節禮物之後,第日真係生返隻兔仔BB出黎啦!




第二位係我姨甥仔既老婆,佢抵錫呀!點解?因為佢幫我添一個姨甥孫啦!這可算是一隻會預報喜事的復活兔呢。當年,佢老公細個果陣,同我形影不離,我坐到那兒,他就去擔張dun仔,坐係我大脾前面,然後當我係人肉梳化,一切就像昨日發生一樣。希望佢一切順利,母女平安。



出咗世啦!

出咗世啦!
我姨甥仔個老婆終於都生咗個六磅幾既囡囡啦!母女平安呀 !
趕唔切做愚人節B添!
不過,咁都好,我依家有動力做蛋糕啦,等我今晚返去開工先!

印仔十五 - 角花 III

死啦!我依家算唔算沉迷呢嗄?


好似係喎!


家下日日都係度玩印仔呀,點算呢?好似仲有好多新鮮野未試過,又好想實行一下。


今次我又撩咗個角花啦,原來併埋四只,都幾好睇喎。



係就係肥d,物似主人形吖麻。



為咗雕角花,依家每開一塊新擦膠,都唔敢謬謬然就咁切一忽出黎,驚晒咗隻角呀。所以,成日係中間挖個窿,已經俾我玩到第三塊擦膠啦,係咪好大洗呢?真係要檢討下至得啦!


 


2009年3月30日 星期一

從母到友


狄娜,人人稱她為奇女子。我對她反而相當陌生,因為她拍的電影、主持的節目,我都沒興趣看。單知道她曾拍脫戲,後來又破產,接著又好像生活得頗順遂,在中國大陸很吃得開。最令我印象深刻的,是數年前八卦雜誌走訪她女兒的變性事件。





「從母到友」果然是一個好書名,我在圖書館的書架上一手抽出這本書,就有興趣一頁頁揭下去。借回家後,又因版面編排疏落,所以很快看完。


狄娜不單止是一個奇女子,還是一個有思想有教養及開明的好媽媽。


期時一九六七年,狄娜未婚懷孕,洗盡鉛華一心作個歸家娘,不惜隻身下嫁當時收入不高的丈夫,為顧全丈夫面子,連工人及近身都沒有帶上。


可惜此段婚姻並不長久,落得兩母女相依為命。


自拍片至結婚、異離,她的追求者仍不絕,甚至到她申請破產,仍有傾慕者知道消息後,設法偷偷為她抵債。左傾的狄娜堅持要申請破產,立志要回國做個無產階級,為十億人口改變命運。這並不是空談,一路以來,狄娜都有研究各名著及哲學等書籍,當然啦,少不免一大堆看了令人頭大的社會主義經典。對女兒,亦有進行思相改造,自少就為她講紅小兵的故事。可幸這個女兒天生聰慧,有自主思考能力,亦能體諒母親的處境。


最值得大家參考的是狄娜教女的心得,由兩母女變成知己朋友,可不容易啊。


狄娜當然亦有遺憾,為了國家,犧牲了興女兒一同成長的相處時間。


大家不妨看看此書,試試從另一角度欣賞這位奇女子吧!


書中有很多舊相片,在在顯示狄娜的高雅姿容,難怪當年迷倒萬千名門望戶啦!


2009年3月29日 星期日

公仔篇 I

我諗:再唔整d粘土相出黎,就有d粘土fans唔開心架啦。


咁好啦,就搵d呃細路既貨式出黎俾大家睇下啦。


首先出場既係 - 萬人迷蝴蝶小姐


 


跟住到八爪魚囝囝


 


然後,到小雞同學!


 



 


佢地大概1cm大啦,蝴蝶小姐既翅膀就佔多D位既,所以會大D.


2009年3月28日 星期六

印仔十四 – 球員卡卡

知道 華姐 個囝囝(小黃生)喜歡足球,至愛球員卡卡。看見二少奶(Sister Lam )又跟小姐為他挑了一件Q版球員T,上面的圖案正好用來練習雕印仔,便順手試刻一個。



我冇乜機會睇電視架,球賽就更加唔關我事啦。其實我都唔知真正既卡卡係咩款既,所以都係照住佢件T黎整架咋,希望冇走樣得太勁啦!

男孩子麻,特意為他挑一塊珍貴的藍色夾心擦膠,沒信心包管雕得好,但會盡力而為。



雕好咗,真係好開心,好似為自己創造咗奇蹟一樣呀!



小黃生,以香港既郵遞速度,就冇乜理由31/3都收唔到既。不過,老人家係計舊曆架麻,咁就一定趕到你既舊曆生既!一句講晒:生日快樂呀!


有人話:錫一個人唔駛直接對佢好既,只要對佢最關愛既人好,就等如對佢好一樣。
即係話:華姐 小朋友,我都算幾錫你架啦!


事先聲明呀 : 我唔係下下都有mood做野既, 你地唔好一個二個拎d稿黎叫我順便練習下呀!


2009年3月27日 星期五

雞尾包

隔離位話:「喉涸涸,想買新鮮檸檬沖野飲。」
好呀,咁我地去街市買啦,靚d呀。就係咁,雖然落住微微雨,我地兩個傻人就走去結志街上既街市探險啦。
去到咁遠,經過ABC又點會唔幫襯至得架,有理冇理都買返多少包食下啦。咦,有大大個辮包喎,整返個先!今日有雞尾包喎,等我整個返去俾我老闆見識下先。



三點三,擺個雞尾包上檯:「你食過呢d野未吖?」
「咩黎架?」
「呢d就係香港出名既雞尾包啦,咁大個仔都未食過哩!」轉個頭就俾佢食晒咯.
我呢個“鬼仔”有度好,就係俾咩佢都食,有次我仲呃佢食粒榴槤糖添!
我俾粒好似牛奶糖咁款既糖佢,呢個為食鬼梗即刻啪入口啦。
「你知唔知自己食緊咩呀?」
佢既面色開始有d變啦….
「你食緊榴槤糖呀!哈哈哈!」
佢即刻拎張紙巾吐返出黎:「唔怪得知咁味啦!」


 


突然間跳出黎既豉油雞

琴日朝一早起身整落咗d滷水排骨先去返工,放工晚餐就有肉食啦!
因為好少飯桌上有肉,所以Bibi食得好開心,仲食咗碗幾飯添呀。當然,依然有爸爸食既素菜既.
食完飯,埋頭雕印仔,接到Sharon/秋/雯雯/梁老師 老公既電話


「係咪呀May呀?係咪要豉油雞呀?」
嘩!正呀!佢真係整咗豉油雞俾我食呀!咁我就唔客氣啦,冇扭扭擰擰,殺上去佢度拎啦喂。



呢個人地老公(佢咪就係上次整(哈囉媽咪水晶餅)果位咯)真係唔話得啦,除咗親自整俾我食之外,仲影埋相,方便我打網誌喎。真係抵錫既,等我又諗下次我地又一齊整d咩食先!



佢話唔小心,搞到隻雞翼受咗重傷喎,冇要緊,好味就得啦!


好多謝你呀,大雄!


2009年3月26日 星期四

印仔十三-文字印 II

經上次一役,不敢托大,還是用回夾心擦膠吧。
打算向難度挑戰,做一個幼線的字印,想刻個「Have a Nice Day」。
一開始,給爸爸看見:「咦!想改行雕圖章呀?」
這麼幼的線條,以我的技術水平,似乎有點未學行,先學走。睇落似乎冇可能,但逐少逐少地雕,印章初步完成。試蓋一下,怎會這麼醜?



不服氣,再修改一下吧。還是不行。



第二朝起來,未有戴上隱形眼鏡,看得夠真了。噢!真的有很多地方可以改進呢。再拿起筆刀修一修,應該好一點了吧。



吃過晚飯再看看,又修一修,極限了,真個要多多練習才成呢。


就這樣,看著印仔越變越成樣子,心裏才寬慰些.


印仔十二 - 文字印 I

見大家刻文字印,刻得咁高興,我也來湊湊熱鬧。
試用美心美勞的出品,噢!落刀有點不順,有啜刀感,而且邊緣易模糊,沒有十蚊店既齊整。可能只是自己技術差勁吧!



晚上做了這個「Happy New Year」印,普普通通。沒有喜悅的感覺,可能字眼有點過時(懶地硬)。其實是自己雕得不好,連自己的一關也過不了。
有人話:用過好的,便不能回頭的了。


再修一修,也未合格...



不服氣啊!那可以這麼差勁呢?
過兩天再修改,雖不可以妙手回春,總可以扳回一點點分數吧。




2009年3月25日 星期三

手作曲奇

我老闆係澳洲人,所以亦都有好多外籍朋友,佢又有在教會做Mentor, 所以都識唔少教會既人。
其中一個外籍女Mentor自製曲奇,當然都有預我一份啦,我帶咗四件返屋企。



外國人既口味都係偏甜,裏面既餡料仲多過麵粉,朱古力粒、果仁、紅莓乾,多到唔駛放糖都甜到飛起啦。我同Bibi一人食一件,留返兩塊爸爸返黎食。



第二朝,Bibi見到仲有一塊曲奇係度,就話:「爸爸梗係覺得甜得滯,鯁唔落啦。」
我話:「點解唔係爸爸見得兩塊曲奇係度,食咗一塊,留返一塊俾我地呢?」
其實,將件事點睇,係要靠你自己既,思想既野,自己調適一下,一切事就會更美好架啦。
我都係度學習緊,希望大家都試下凡事向好處想啦。


2009年3月24日 星期二

今天收到的手作卡

真係要說句老實話,我是看完 Pri 的blog先知自己會收到佢既手作卡架!
雖然少咗一份驚喜,但亦很開心。



卡後的留言紙是上次我們一起去買的呢!看著她的字,唉~,有點兒慚愧,小妹妹寫的字比我好多了!



卡面用了三個圓形組合,一看到中間的小孔,便知是用那個圓規cutter切割出來的。她用了自製刻章蓋上”Thank you”字樣,看來我也要試試雕一個文字章了。



印仔十一 - 香甜小龜

隔離位大貢獻,搵到呢只烏龜公仔俾我練習雕印仔。
全線條既印仔,對我黎講,係有少少難度既。線條粗幼不一唔在講,好驚一時失手,恨錯難返。
初稿:


整容後,起碼同佢修修條眉, 修修甲。Bibi話佢眼睫毛太長,我唔敢再搞佢,驚一錯手佢就要變性。



睇黎蓋晒呢個圖案係紙上面都可以做包裝紙喎!


2009年3月23日 星期一

輕鬆星期天

星期日,Bibi七點半就起身,我hea多一陣先起床。咪咪麼麼又九點幾先出到門口,今次試下坐巴士去西鐵屯門站,轉西鐵去元朗,再係輕鐵元朗總站坐一個站去大棠站落車行去發記食粥。點解要咁做呢?明明可以就咁係樓下坐一程輕鐵就去到大棠站既,車程大概要大半個鐘啦,不過今朝見輕鐵都冇乜位,我地又唔趕時間,不如揀個舒服d既旅程啦。


連埋等車,差唔多用咗成粒鐘先去到大棠站。但發現咗一樣野,就係坐咗咁多程車,車費反而仲平!點解?


因為,用八達通坐第一程輕鐵($3.7);第二程西鐵原本要收$5既,但因為有轉乘優惠(當之前果程車係接駁車)就可以扣返之前果程車費,所以實收$1.3;第三程輕鐵原來都係唔駛錢架!所以全程只係用咗$5,仲可以有座位,舒服好多。而輕鐵呢,由我屋企到大棠站就要收全費$5.8啦。我諗好多人唔知有呢個轉乘優惠,同接駁巴士係免費既。


2009年3月22日 星期日

包餃子

星期六,趁住吉之島感謝日,梗係要去巡下。一早打算星期日入元朗,所以都費事去十蚊店果便睇啦。今次主打超市,買咗袋烏冬兩包切片年糕菠菜麵雞脾菰有機蛋日本白蛋(唔知好唔好味,買黎試下)。加埋事先係圖書館借果三本書,今次冇馬仔,要自己一個抬晒都幾係。


弊!今晚約咗個大肚朋友包餃子架(為免佢操勞,所有材料梗係我包辦啦),仲wet咁耐添。好彩我昨晚已經買咗材料,返到屋企,抖一陣就開工切材料啦。打算包幾款餃子,所以預備咗黃芽白木耳、冬粟米蝦乾韭菜(大肚婆冇得食)豬腩肉等等。想整埋南瓜蠶豆架,不過冇乜時間,算啦。爸爸話唔參加喎,佢情願食飯,咁我又慳返唔駛預備素餃既材料,已經算快啦。


係威係勢,切完木耳、冬粟米蝦乾,就走去影咗幅相,執埋d野就行過幾座,去人地度啦。我有帶相機架,仲諗住一陣係人地屋企先影相添,點知包完,食埋先記得冇影相呀!可能好多網友都試過好似我咁,明明有d野可以影低俾大家睇既,但就成日都冇影到,冇貨交。雖然仲有十零只未煮既餃子既,但已經冇心機再影啦。


今次我地又煮餃子,又煎餃子,始終都係煎好食d。


2009年3月21日 星期六

印仔十 - 小雪花 II

我又學人整多一粒雪花啦!
不過,今次呢粒比上次果粒大dd既。
我知我冇心機畫草圖,一轉印到擦膠上就見到佢好核突,歪既!



一路雕,一路改返正d,都用咗一夜時間先完成架。


 


2009年3月20日 星期五

與網友一聚

今日下晝約咗網友大少9 食晏,到目前為止,佢係第五個同我相會既網友lu。佢咁啱呢幾日調咗過黎中環返工,我地先有機會見,或者,呢d就係天意啦。
我揀咗間樓上咖啡店,仲專登訂咗露臺既位。真係對佢唔住啦,今日天氣咁暖,搞到佢大汗疊細汗添。
我地點咗兩個set lunch:兩客南瓜忌廉湯、香草汁魚柳配薯菜、菠菜雞肉千層麵配蒜蓉包、冷熱朱古力咖啡各一杯。因為侍應太忙,唔記得送湯俾我地,終於未上湯就先黎主菜,搞到我地兩個措手不及,連相都唔記得影添!
對住大少9就好似對住我d姨甥咁,係冇乜代溝既,證明我仲可以同d後生一齊玩呀!時間飛咁快就過,我地食完d野,傾咗一輪就夠鐘埋單lu。
收到大少9親手做既曲奇,唔捨得拆住,帶返屋企齊人先食。


PS - 晚上食過,真係好鬆化!


印仔九 - 角花 II

又整咗第二隻角花啦,到目前為止,又有新問題出現啦。
點解會兩邊唔對稱既呢?好似一邊肥好多喎!
我諗都係因為自己懶,冇乖乖地畫晒兩邊既草圖,只係用轉印再轉印既方法去做個圖案,所以就變得越來越大,咁我都知自己衰既。唯有下次咪咁做啦!
呢個花紋又係亂畫既,所以冇咩章法,志在體驗同感受。雖然我同d擦膠關係麻麻,但都開始同佢傾到幾句啦,正等待互相深入了解呢。



放大咗去睇, 就知我唔記得抹乾淨d邊先去蓋印啦, 所以花晒!