17/5/2011，原本冇打算去掃貨既，見咁耐冇行過Market Place，咪返工前順路入去氹返轉咯．
我起先係見到紐西蘭有機蘋果$10.8三隻既，但全部都一份份包好晒，每一包都有隻好似縐皮既，揀唔落手．跟住行去雪櫃果邊，有獨立包裝既有機蘋果喎，咁就買三個．
跟住見ｄ橙都幾大，新奇士4012，$13.9三隻，唔錯，又揀三隻．
點知擰轉面，點解又有ｄ橙寧寧舍舍擺開既？標籤顏色唔同架喎．
睇真ｄ：咦！有機架喎！幾錢先？
嗄？14.9三隻喎！仲唔即刻棄暗投明，放低剛才揀果ｄ橙，買呢ｄ！（點解唔兩樣都買？你估我三頭六臂架咩？）
係我既認知入面，有機橙一向個賣相都幾差下既，亦唔係特別好食．但今次呢ｄ呢，真係幾見得下人喎．有機既三隻計埋都只係貴一蚊，有冇咁so呀？
食晏果陣開隻黎試下咪知咯，都好驚佢係酸架．剝完皮，都唔細喎．
打開，入面係實實在在既橙肉，水份亦足，係甜架！
都幾好味！如果好好食既橙係１００分既話，佢都有８５分架．
知道樓下超市放蛋果個雪櫃壞過黎，雞蛋都係唔好係果度買住，就順手係呢度整盒有機蛋返去頂住先啦．
跟手瞄下隔離雪櫃，爸爸話好耐冇食水牛芝士喎，睇下抵唔抵買先！
咦～～，呢隻有機乳酪做特價喎，由$59賣$25，仲未有耐到期添．
未食過乳酪加蜜糖，咁就試下啦，你地睇下幾大杯！
呢度有成450g架，份量十足，仲有晒認證．
高鈣低脂，啱晒Bibi．
仲有個幾星期先到期，睇怕不出三日，我地都可以搞掂佢架啦．
俾埋我地試食既相你地睇下啦：
比一般乳酪杰身好多，滑到不得了，入口有淡淡蜜糖味．Bibi搞搞震，又加兩粒軟糖上去，睇下：真係頂得住兩粒糖架！
我話咗唔要架啦，佢係都要整粒我歎，真係好似冰冰凍既軟雪糕咁既質感架．
畢起一忽，係唔會跌返出黎既，幾勁！
原來隻杯外既包庄紙一撕就可以打開既，仲附有食譜添呀．
唔知好唔好味既呢？
過一個星期去買，冇咁平啦，呢盒要$35.
入面都係有食譜既．
