2012年6月29日 星期五

紫蘿蘭係要修下既

雖然我唔多識種花,但公司四維都係紫蘿蘭,我對咗廿幾年,經驗話我知,紫蘿蘭既葉唔修剪下係唔得既。

我呢盆原本係迷你種黎,唔知係咪我個位光線勁呢? 佢D花同葉都比佢既母株大得多。

2012年6月28日 星期四

宇治金時

天時暑熱,見銀包入面仲有張七仔現金券,咁好啦,入去買雪糕啦。

一時間唔知買咩好,就揀咗呢盒東東:宇治金時雪條($29.9)



一盒六枝



外面係牛奶冰,入面係綠茶刨冰同紅豆粒粒。




咬開呢,頂部係有....




有少少鍊奶架




見唔見D刨冰粒粒?




仲有紅豆粒




味道都OK既,但因為頂部D鍊奶相對比較甜,食到冇鍊奶之後,就覺得淡咗D啦。又因為入面主要係刨冰黎,所以熱量相對地,亦比較低。

2012年6月26日 星期二

小瓶子


史力加長者性貧血,要長期輸血,所以要自行打除鐵針。多虧香港有完善醫療制度,得享針葯補助。


 

針約抽走得,這些玻璃瓶子就變成垃圾。我想: 移走金屬蓋後,相信可以做迷你花瓶吧。


 

呢D就係用來稀釋葯粉變成針劑的水啦,一次性獨立包庄,確保不受污染。




一次過收集已經抽走晒D葯既小瓶子




原來鋁質金屬蓋是很易打開的



三兩下手勢,已經全部打開了。



連膠塞亦可以重用來封口,四眼妹說可買彩砂回來倒砂樽,我當然另有用途啦。



用水浸泡一輪,招紙自動脫落。



清洗過後,這些小瓶子,就可以大派用場啦。雖然對我來說,它們的體型略為高了一點,但將就一下,亦可以變成很可愛的小東西呢。



大家既海味鋪、零食店、口立濕店,或者都用得著呢!

2012年6月25日 星期一

蜘蛛蟹

爸爸其實好鍾意我提起佢既,但係人人都只係叫佢做May姨叔叔,佢就係我背後既難忍啦。

佢一向都先斬後奏架啦,咋咋啼啼就去氹一轉金魚街,成日帶D新住客返屋企。

今次就帶咗呢隻蜘蛛蟹啦:

2012年6月22日 星期五

我愛故事書

我出街,除咗超市去得最多之外,圖書館係我既第二蒲點。唔一定要去成人圖書館架,兒童圖書館都有好多書適合我地睇架。

雖然Bibi已經長大,但係我生活圈子入面,仲會接觸好多小朋友既,所以,我都會一路keep住留意兒童圖書既趨勢架。拿,呢套就認真值得推介啦!圖畫簡單,係幼兒學習德育既一套好書黎。



各位家長要切記:當你選擇兒童書時,自己都應該將思維調適到該本兒童書目標對象既狀態,將心比己,咁樣先可以真正接收到書上發出既訊息架。自己完全明白人地想為小朋友表達既訊息,你先可以引領佢地讀得更開心架。讀得開心,係最重要架!

大家要記住: 呢個世界上冇淺到你唔啱睇既書,只有你唔願睇既書唧!放開懷抱,融入小朋友既世界,你先可以多d了解佢地諗乜架.


跟住就介紹一下適合中學生既英文圖書啦:

因為我想提升自己既英語能力,睇故事書就最啱啦。單睇書名,就吸引到我去借啦。




但估唔到入面既文字都幾有水準,好適合中學生閱讀,可以提升佢地既寫作能力架.




呢本就真係估佢唔到啦,老實講,因為書入面既國度係虛構既,所以D地名同人名,對我黎講都唔熟識,但內容都唔錯喎。就好似另類乞丐王子既故事咁,但中間既情節就複雜得多,對我地呢D睇慣伊索寓言、天方夜譚同世界童話既一代黎講,算比較新鮮。




原來Narnia呢個國度入面,所有動物都會講人話架,其中一隻會變身既獅子,擁有強大既神秘力量。。。。



我都幾怕悶架,童話英文故事書,Bibi細個果陣我就睇得多啦。所以都係搵D古古怪怪既書黎睇下,會有趣D。呢兩本應該係屬同一系列既,我趕時間,只係抽咗其中兩本.




貪佢字夠大,版面又夠疏,睇得好舒服,等我第日去借埋其他果幾本返黎睇埋佢先.

咪話我低能仔呀,我都係呢D書入面學識唔少生字架。


2012年6月21日 星期四

我的第一粒布包鈕

早上收到新玩具,雖然唔係幾好意思又要人破費,但都好多謝你咁睇得起我,梗係要即刻趁食晏果陣玩下啦!

參考咗專家網友既製法,一於膽粗粗就行動啦。有理冇理,係咁意剪個圓形出黎,冇認真度過D咩尺寸架,斷估冇痛苦啦。線就係一個做緊口金既同事度撻既,針就係另一位同事既,布呢,都係人地提供既,呢度要乜有乜架。



係咁意沿住圓圈縫一行走針,我斷估如果針步平均D,到要收緊線頭時就會靚仔D架啦。但正宗方法應該先用透明膠片裁出紙樣,標出中心點,跟住睇實花紋對正中心點,先好裁剪既。



反轉佢,係咁意收緊少少線先:




放個面胚入去,凹位向上。




跟住就可以扯緊D線啦,我好穩陣既,挑幾下回針,等佢一定唔散。呵呵,真係度都未必咁啱位呀,你睇下:




跟手就可以放底座啦(請留意佢有一圈凹入既位架):




我好驚佢唔夠實,係底座既底塗咗少少UHU,先放佢入去,再施壓。




咁都未算喎,人地話仲要氹氹圈係檯邊施壓,將外框既邊壓入底座既凹入位,令外圍抓得更實。




反身睇下,完成啦!都算幾靚仔喎。




需然D波點位唔係好正中,咁我冇對位麻,係咁上下啦。

再整粒大少少既,幾靚仔!




多謝有心人分我玩具,無以為報,為你趕製一個玉璽.



雖然簡單,請笑納!


2012年6月20日 星期三

嚐味

商場一個鋪位封住好耐,又話會開一間叫嚐味既食店,姍姍來遲,終於都係8/6/2012果日開咗啦。



睇過餐牌,卅零蚊碟飯,例湯/熱飲就加$3、凍飲加$4,都好合理。




我試過同一集團既二人餐,知道佢地D雞都唔錯,就試下D雞啦。基本上無骨$36、有骨$32。




餐牌其餘既選擇:




有個小朋友想食豬頸肉,所以後來都點咗碟香茅豬扒併豬頸肉飯。





我都見對面檯有人叫梅菜扣肉飯,我對呢D就冇乜興趣啦。




炸扒好熱氣喎!




小朋友原來想叫卥肉飯,但我地話呢度唔係主力做台式既,叫唔過。




如果冇飯癮既話,大可以試湯麵系列既。





平平地$26食碗兩餸米線又得,常餐都只係$32唧。




要加成十蚊先可以有台式飲品就太貴啦,特飲都要加$6喎,咁不如只加$4要凍飲好過啦。




椰子雞湯,都夠熱,呢碟鹽焗雞飯,賣相都好OK。




咪睇呢碟海南雞好似D雞咁少咁,佢係無骨架,所以疊起咪以為好少咯。個汁好好味,夠醒胃。




飯都幾好食,唔太硬,亦唔會太腍。碟豬扒/豬頸肉飯唔記得影,鬼叫佢係最遲黎架咩,食下食下唔覺都食埋咯,渣都冇,點影呀?

三碟飯,加咗兩個湯同一杯凍檸茶,埋單$116,平過大家樂。