2015年2月27日 星期五

朱古力茶

又收到一盒小心意。

打開個膠盒仔,好大陣古古力味。但入面有好多濕星野,有D好似提子乾咁既東東。我粘咗粒啡色既野黎試下,咦?冇味既!勉為其難拎粒提子乾黎食,哎吔 ...... 乜咁味既?




忍唔住,打俾人問下,到底呢盒係咩黎?

答: 係辣椒古古力茶黎,唔係生食架!



嗄...... 咁我沖黎飲啦



有古古力味,亦有少少辣味。



又有少少花瓣同樹枝既物體



可能因為有少少乾果,所以整體黎講係甜甜地既。




多謝你俾我呢個大鄉里增廣見聞,XD。

2015年2月26日 星期四

我要做實驗

做咗塊膠片




求其拎塊餅,D古古力又食晒,想做實驗就三角朱古力都好啦。



微波爐叮兩下,整溶D朱古力。太多果仁粒粒添!



咦,得喎!但心急,冇睇清楚就拎起塊膠片,有一忽冇印到朱古力添。



再搵下Bibi有冇剩餘物資係度,呵呵,有一片72%,玩下先!

費事開塊餅啦,拎咗出黎就要食咗佢啦麻,咁用塊紙巾試印算啦。



效果都算及格啦,只要用純朱古力漿,應該整到既。

睇黎,如果係用食用色加海棉印上去糖霜曲奇度,都應該好靚唧!

其實我原本做咗情人節膠片架,但一路都冇機會/心情搞,唯有算啦。

P.S. 若大家有興趣參觀我製作的其他印章,可看這兒 

2015年2月25日 星期三

午間放題@黃金廣場大喜屋

今次相約Bibi既契哥團年,中環果間大喜屋結業後,我地就轉移陣地,黎呢度食啦。

刺身仍然是厚切,午間定食既感覺返晒黎。



炒帆立貝,原本有四粒既,我食咗粒先記得未影相。真係好大粒,調味略甜,都算幾好食。



燒蕃薯仔冇得輸,燒有機菠蘿亦好夠甜,蝦既肉質亦唔差。



原本事必要食既芝士年糕,硬係覺得佢唔夠組長好食,唔通係因為我太多野食,放到暖咗先食佢? 一口芝士我就唔鍾意啦,漏到死!



壽司都比較小巧,花之戀、芒果卷都比較細粒。



味噌湯都好夠熱,其實佢唔駛搞到咁複雜啦,只要有豆腐粒同少少海帶就夠啦,放咁多配料入去做乜鬼?



蟹粥好杰,但佢用咁夠羔既奄仔去煮俾你,都算係咁啦。



只係叫咗四隻蝦天婦羅,差D食唔晒,唔係因為佢難食,係因為我地入既單,全部出齊同埋好快上檯。



我點咗一舊海膽手卷,兩啖食咗落肚。



炸軟殼蟹軍艦。


蒲燒鰻魚,呢樣好食喎。



海蜇沙律、蟹籽沙律、炒牛柳粒、無骨鳳爪 ,我已經完全失去戰鬥力,所以投降啦。



仲有人叫多次魚生,鮑片真係幾好食。



甜品有雪糕、大腳板雪條、仲有木糠布甸等。又可以叫有機生果食,是日係橙同西瓜。



最值得讚既係佢地竟然會主動添茶,呢下食放題係比較少遇到既,真係有D感動。



好,下次我再帶家姐黎食過!

2015年2月23日 星期一

接財神? 摺財神。

年近歲晚,大家都做應節野。我原本就收咗爐架啦,但又俾我見到呢條片喎: 摺財神

用細張既手作摺紙試下,成功喎! 幾可愛吖。


2015年2月18日 星期三

羊年揮春賀新歲

年尾,拎返D未曝光過既印出黎用,用埋幾個舊印仔,做咗一大堆揮春仔應節。



呢幾個印,出黎既效果真係唔錯。



今年我冇做咩得意洋洋之類既羊年印,反而覺得祝大家東成西就,仲好意頭。



身體健康我做咗一大一細,大既俾咗長者,細既留返自己。



因為有好多人喜歡擺年花,所以都專登做埋呢個花開富貴。唔駛奇怪做乜咩色都有D,事關大部份係環保紙黎既,係D宣傳品同年中收返黎果D炸彈既信封剪出黎既,用得唔好晒,我儲咗成年架啦。



主賜平安印仔雖然送咗俾人,但我都有整咗幾個絕版貨黎酬賓。



因為做得太多印,基本上唔記得自己有咩。



所以,今年竟然冇整到生意興隆既揮春喎! 好彩我冇做生意既唧。



就係啦,我有幾可唔蝦碌架? 睇下呢個陣勢,都夠令人開心啦。但俾Bibi話我量產呀! 即係大量生產,我唯有阿Q地當佢話我限量生產啦。



4/2果朝,有朋友提我當日係立春,應該貼揮春,迎春接福喎。



嗄?迎春接福? 我冇整到添! 今年只係做咗一個福字印俾一位好勤力既小朋友做實驗,我自己都冇整到黎玩添!



其實花款都好夠多架啦,我就好貪新鮮既,之前整落既印仔就唔多願用,希望大家有返D新鮮感嘛。主賜平安同萬事勝意都係得三張架咋。




就俾D新丁出下場啦,我已經唔駛學業進步住啦,事關我個Bibi都出黎做野啦。但呢個印受歡迎程度仍然高企,所以詢眾要求,一定要做既。



好彩我都仲有個五福臨門既印仔,都叫做有D福氣接下啦!



實在都計唔到自己花咗幾多日去做好咁多張揮春啦,單單界托底紙,都做咗一日,逐張裱起佢又要一日,咁之前既起稿、雕工、印製既時間呢? 唔係我年中有偷步整咗D呀,都咪駛旨意我年尾交到貨俾大家呀。




希望工程完成,大家有D分到一張、有D一家幾口先分到兩張。我都唔係幾好意思,就當係點點心意啦,所謂物輕情意重,咁大個信封,先得少少野係入面,我連字都唔撩幾隻啦,反正全球只此一家,冇乜花巧野,大家一睇都應該認得係我既出品。








係呢度同大家拜個早年,祝各位新春大吉,喜氣洋洋!

2015年2月13日 星期五

Tim Tam Wafer

都唔知D男人買野點解咁蠢既!

話說爸爸有日係七仔用五個大洋,買咗一條Tim Tam威化,仲懶醒咁whatsapp我,話幾好食架咁。我一向對呢個品牌既餅食都冇乜興趣,覺得佢偏甜,所以佢既威化我都唔打算食。

返到屋企,爸爸問我屋企有冇朱古力威化係度。唔係啦掛?食出癮呀?