日式芝士蛋糕

其實我都幾喜歡食呢隻蛋糕架，所以專登放假去學整。

著埋公司D俏嬌娃送俾我既圍裙，用阿仔送俾我既聖誕禮物(烹飪班基金)去玩返下。

咁啱唔知幾時買咗呢D錫紙兜，帶埋去，剛好可以放得入焗爐，一次過焗兩個，留返一個帶返公司俾大家試下。

為咗方便脫模，我先用錫紙封好做內膽，再加塊牛油紙係錫紙盆入面。

為咗一陣做得順暢D，先量好牛油、忌廉芝士同鮮奶，放埋一邊，等陣先搞。

我用咗六隻蛋，將蛋黃同蛋白分開。

加咗少少海鹽入D糖度，分三次加入蛋白度，中速順一個方向打至挺身。

見唔見到拎走打蛋器果一刻? D忌廉尖尖係可以企係度既。

開火煮溶頭先預備既牛油, 忌廉芝士同奶，唔駛煮滾既，夠熱就收火，慢慢搞溶佢都得。

將低筋粉同粟粉篩勻，混入牛油溶液度，打到冇粉粒。

然後逐隻蛋黃放入牛油溶液度打勻

再分三次將蛋白糊拌入，記住要溫柔D對佢喎，期間唔好拍打或DUN個盆。

之後放入錫兜

有剩少少，多咗個bonus，放咗入預熱180度既爐，然後倒D熱水上底盆。呢D就叫做蒸焗法。

入爐後，將爐溫調至160度

焗約40-45分鐘

拎出黎，用架承著

要即刻同佢剝衫散熱，咁攤凍後，個蛋糕就唔會塌下。

先食咗我舊bonus，嘩! 好好味呀!

分咗幾件請人食，即晚已經將餘下既清倉，連Bibi都話好味呀!