Itamomo Plus 意樂餐廳

原本俾人屈去飲茶既，好彩一上扶手電梯就見到開咗間新野。唔駛焗住兩個人去食點心。

以前呢度長期係日本料理既天下，今次轉西餐，真係好啦，翠華有難啦!

早餐既餐牌都幾吸引，我地等咗兩三分鐘就有位。

唔知佢既牛角包正唔正，都係食返D我成日去茶記食既野黎對照下先。

多士加飲品，其實收$22係偏貴既，其餘既野，都係比普通茶記多兩蚊左右。

火腿濃湯通粉餐配蒜香包加餐飲，$28。

朋友就柯打咗呢個超值餐啦，一睇佢撕開塊蒜香包既架式，就知件包好新鮮，牛油亦塗得夠。通粉好彈牙，確係我杯茶。湯就係茶記傳統，以忌廉雞湯開出黎既湯底。

我梗係食煎豬扒啦，又腍又滑，咪睇煎蛋個樣好似好衰咁呀，蛋白熟晒，蛋黃流心架，最正就係咁，煙肉就略肥。我呢個餐，蒜香包就得半件既唧。

唔記得叫人走汁添，我一向唔鍾意汁既，我覺得污染我把餐刀。

呢堆伴菜抵讚呀，竟然淋咗日式芝麻醬，有誠意。D茄汁豆亦唔會係雪到凍冰冰咁畢俾你，應該係室溫就咁開罐頭就畢出黎既。如果佢坐暖咗就更好。

呢杯茶亦及格，起碼高水準過燉奶佬果杯。

鹽同胡椒粉就用有汽礦泉水既樽改造既，廢物利用，都唔錯吖。

我一定會返轉頭幫趁，試埋佢既晚餐既。