話說，上年暑假貪玩走咗去無雷公咁遠既青少年中心教小朋友。
人地係母親節果日，搞咗個嘉年華。順便要d準導師同d小朋友玩返半日，等佢地認識下中心係暑假搞咗ｄ咩活動，就當係招生咁話。
因為想盡量俾多ｄ小朋友可以有機會玩，每節大概預十五分鐘咋喎，咁究竟做咩好呢？
最緊要快、靚、正！又要平民化，又要簡單，又要係咁少時間裏面，令佢地認識到咩叫做麵粉花，既要有樂趣，兼要真係俾佢地做到ｄ製成品出黎，都幾考起架。
係冇支援既情況下，就即刻俾我諗掂咗啦。
我只係將平日收集返黎既比較厚身既環保紙，用ｄ頭頭尾尾無印過野既部份，親手逐張心形迷你卡剪出黎（話時話吖，都真係剪到手軟），俾小朋友用，仲印埋有心意句子既貼紙，等佢地可以做完張卡，親手貼上字句，簽返個大名上去。
你話啦，張卡咁細，得幾歲人仔，點寫到咁多字吖，唔出術點得喎！
父親節，母親節，通通啱用，連當情人卡用都掂！呢款蝸牛仔，算係我既signature公人黎！如果你地依家用緊１５寸螢幕睇緊既話，就同實物原大咁上下啦．
用既材料唔多，又夠立體感．呢幅就放大咗好多．
掂唔掂呀？我係8/10/2008果篇結婚及週年紀念蛋糕都有張用同樣方法做既結婚卡架，如果你地睇漏眼既，可以去望下架．
"Happy Birthday" 波浪形香橙忌廉蛋糕，中間飾以紅波點T-shirt，配忌廉球及開邊士多啤梨．
朱古力栗子蛋糕，飾以朱古力條，栗子粒及完粒士多啤梨。(呢個係我好鍾意既蛋糕，但係最終都送咗俾我大佬做生日禮物lu．)
“Happy Birthday to Roger”咖啡忌廉蛋糕，以鮮忌廉圍邊，配奇異果片、香芒球及完粒士多啤梨。（好少會配埋盒俾人，事關做一個盒都要幾耐下．）
連放三日假，好爽。星期五一於訓到成九點先起身，超正！食得早餐黎都晏啦，所以下晝大家都冇食野，諗住去下午茶既。Bibi又話不如等到食晚飯先啦，咁好啦，暫時食少少餅頂住先啦。沖返杯奶茶，食幾件天然酵母餅。反正佢鬼咁多功課做，就等佢做下野先啦。
五點半，換衫，他他條條行出碼頭，又去滾滾紅茶食飯。今次叫咗個二人餐：冷盆要咗麻香雞絲粉皮、小吃要咗菜肉雲吞、主菜要茄子三杯雞煲、廚師推介要咗啫啫排骨煲；叫咗個例牌既紅燒豆腐煲俾爸爸；四個白飯、一杯台式奶茶、一杯熱豆漿、一個綠茶果凍。
係呀，一坐落就問定今日有冇果凍，因為Bibi鍾意食，如果食完飯先知冇，就會好失望。依家聽到話有就安心啦，成日都想試下佢既金糰，但次次都好似好飽，最後都冇叫。
都好味既，作為開胃小吃，都唔錯。（又俾我地夾咗ｄ黎食添）
三杯雞，係好熱辣辣既，但唔知點解影相出黎都冇煙既？
啫啫排骨煲，食食下先發現佢係有豬潤既，好彩Bibi夾唔到唧，事關佢係唔食呢ｄ野既。
紅燒豆腐煲係全素既，啱晒爸爸。呢煲就算睇唔到煙崩崩，都見到煲邊果ｄ滋滋聲既泡卦！
我地成日都係點呢兩樣，試過其他花茶，但飲唔慣，始終都係飲返呢ｄ。
冇影到雲吞同果凍，因為唔記得，都開咗波咯，費事影啦。
最後都係食唔晒咯，又要打包ｄ排骨返去。
朋友初學國畫，俾ｄ畫作我地欣賞下。
佢話見人地畫完幅畫，會蓋個印章係上面既，咁佢又冇印章，咪用個係七仔換返黎既多啦A夢印仔doom個印頂住先咯。
嘩！簡直係映衰幅畫呀！我同大佬話：「原本幅畫好地地既，就係個印仔搞到幅畫cheap晒。」
最搞笑既係，有一幅蝴蝶加牡丹既畫，雖然朵花好似拉長咗少少，扁扁地．原本都畫得唔錯既，睇真ｄ，只蝴蝶有乜唔妥？「嘩！勁呀！呢只係便衣昆蟲黎，蝴蝶翅膀草蜢身呀！」
拍低返去俾Bibi睇：「ｅ倚！只眼咁兇猛既，螳螂黎咋卦！佢好似想襲擊朵花咁喎！」
咪咁衰啦，人地都係初學唧，我知佢有俾心機畫架，已經畫得唔差啦．
哎吔都叫九魚圖吖！
ｄ花蕊都畫得幾好呀．
起碼我就唔曉啦，俾返個叻你啦！
呢輪正在研究迷你撻又或者迷你蛋糕仔（即係杯cake），要比大家一般見既蛋撻仔再細ｄｄ添。
首先要做好ｄ曲奇撻皮仔先啦。做咗幾晚，都叫做咗一批皮仔啦。其他技術性既野，仲要再研究下。例如錫紙兜仔同放係撻上既配料咁，又要就返佢地既大細，最好就唔駛油顏色啦。咁咪搞到我要溝好多顏色粘土咯，好煩。擺埋一邊，由得佢地等下運到先啦。
做做下撻皮，又八八卦卦，走去搓咗ｄ壽桃仔。用黎做祝壽蛋糕都好喎！一定要盡量做細ｄ，做細ｄ！再做細ｄ！
就係用呢枝針做架啦，冇第二樣工具架啦．
兩父子？兩爺孫？
一家幾口．
有細，有細細，仲有細細細！影得幾清，連檯面果Ｄ毛毛同塵都睇到．
如果唔係就唔襯架啦。油唔油d色上去好呢？幾時先有靈感做呢？我都唔知架，所以話唧，都係有朋友一齊玩會開心Ｄ．
最近聽聞我其中一個大佬都有興趣玩粘土，唔知佢報唔報得成名呢？可惜佢住得遠丫，好難一齊玩．
幾款應節蛋糕：
小雪人朱古力夜光聖誕蛋糕，配開邊士多啤梨，巧克力圈圈及檸檬蜜桃果醬．
"Merry Christmas"薰衣草聖誕蛋糕，以鮮忌廉圍邊，配芒果球，香芒卷及聖誕花．
(哎吔! 唔記得上返 jelly就影咗相添!)
香芒忌廉蛋糕，飾以芒果卷及巧克力片．
海洋藍莓蛋糕，配香草海藻軟糖，飾以手造貝殼朱古力。
不知道外籍人士對藍色是否有特別偏好，呢個客指定要用藍色做蛋糕，仲要用海洋做主題添。
以前我成日睇d英國人用各種顏色杏仁糖來為蛋糕裝身，就諗：咪好甜咯，邊度好味架？但d鬼妹仔見到又鬼咁歡喜架喎。各花入各眼，可能我地呢d黃皮膚黑眼睛既唔識欣賞啦。
真係對唔住啦，實在一時間冇乜靈感，唯有做咗ｄ微形貝殼，加埋ｄ鬼佬好鍾意既綠色香草糖做既水藻頂住先啦！
跟住我好老實咁email咗幅相俾對方，仲話如估佢唔鍾意既，我會重做既．點知佢竟然好滿意喎。總算可以交差啦！
後來，我又諗：點解自己咁蠢，唔做ｄ立體公仔呢？於是，就研究咗一堆熊仔呀、兔仔呀、豬仔之類既粒粒配件出黎，以備不時之需。
送給最近結婚的Jenny & Rex，香桃忌廉心心蛋糕，飾以朱古力小心心，及甜蜜蜜小豬．
香芒忌廉蛋糕，以芒果片包著整個蛋糕，飾以芒果卷、桑棗糖圈及完粒車厘子。
“Happy Birthday to Ed” 士多啤梨栗子蛋糕，栗子蓉圍邊，綴以開邊士多啤梨、鮮忌廉及藍草莓。
"Melissa & Norton" 士多啤梨忌廉結婚蛋糕配粉紫玫瑰，以櫻桃及蜜桃糖心圍邊．
“Happy Mother’s Day” 咖啡忌廉蛋糕，以咖啡忌廉圍邊，飾以香芒卷及薄荷心心糖粒。
“Happy Father’s Day”香蕉黑森林蛋糕，飾以香蕉片及黑白朱古力片。
另一張訂單，來自美國。是先生送給太太的情人節禮物，但要求要把他們的愛情結晶放在蛋糕上。
噢！又一個難題，以我當時的設施，真的甚困難啊！實在想不到任何方法，只好推辭。
雖然已回覆了人家，有技術上的問題未能解決，似乎不能為他效勞。但這一難題仍時刻在我心中迴盪，怎辦呢？若相片太大，又放不下蛋糕。若相片太小，又看不清他們的寶貝，而且來件相片的質素亦不清晰，如何解決呢？
終於都做出了一張1cm丁方的相片，質素亦勉強合格。放在一般形狀的蛋糕上，又會不倫不類，權宜之計，唯在放在一個寸許旳正方形蛋糕上，照片的背景又太暗，比較難配襯，還好，出來的效果總算不太差。
幸好，人家太太收到後喜出望外，亦可算是一份比較特別的情人節禮物。寶寶，你要快高長大啊！
“Be My Valentine”方形士多啤梨忌廉蛋糕，以鮮忌廉圍著中心的相片，飾以士多啤梨啫喱糖，黑白朱古力條，蜜桃片及桑棗糖圈。
今日，又放半晝，約咗兩父女去金滿軒一齊食下午茶。叫咗雜菌擔擔麵、上海湯麵、雪炸肉絲麵（我初初仲以為佢印錯添，真係雪菜同炸菜都有）、生煎窩貼、高力豆沙。一早就知會食唔晒，食咗一只就打包咗兩只窩貼。搭檯果三母女(兩個都係細路女黎)仲勁，佢地要咗回窩肉炒粗炒、菜肉雲吞麵、煎窩貼、蝦仁炒蛋客飯加湯。
爸爸一食完碗麵就閃咗啦，佢要出中環大會堂聽野。之後我地去咗吉之島，咦，今日都係感謝日喎，咁就入去行下先啦。首先買咗新出既Rejoyce免沖洗骨膠原護髮精華，再入超市買咗兩盒有機蛋、一包鮮腐竹、三包金菰。既然爸爸唔返黎食，我地就去超市附屬果間麵包店買包包做晚餐咯。
先放Bibi返屋企，我再行下街。係Veeko買咗條半截裙，再去家品部，既然有折，買返張被都好喎。踱黎踱去，都唔知買邊種好，想買駱駝毛被既，都幾輕，但摺埋都好大舊，驚冬天之後唔知點柄埋佢。兜咗好幾個圈，終於揀咗張半絲棉，加埋兩個被套。我唔拎住，又走去十蚊店果邊買幾盒調味磚。返轉頭拎被果陣即刻後悔啦！張被唔係好輕既咩？點解加埋兩個被袋同埋d包裝會咁重架！唯有死頂去搭車啦。
故事教訓大家，以後冇馬仔係度，都係唔好買ｄ大件野啦！食咗都補唔返呀!
高力豆沙
上海湯麵
生煎窩貼 (俾Bibi夾過, 先記得影相, 所女穿咗窿)
雪炸肉絲麵
擔擔麵
各款生日精選：
綠茶忌廉生日蛋糕配朱古力忌廉及綠茶忌廉圈，生日快樂呀Vincent。
小猴子朱古力忌廉生日蛋糕配香橙水晶糖粒。啱晒屬猴既你啦！
香芒鮮忌廉生日蛋糕。Happy Birthday呀Mrs. Stevenson! 60大壽咯！
“Happy Birthday”圓形朱古力忌廉蛋糕，以鮮忌廉圍邊，飾以一對dark chocolate小腳印及黑白朱古力條。啱晒喜歡養狗人士!
