晨咁早就收到同事既禮物.
哥哥仔: 送俾你, 雖然冇你整既咁精緻, 但佢不失為一個冰皮月餅吖.
唔好咁講, 我收到都好開心喎. 仲有個鐵盒仔添, 幾靚呀!
Bibi既至愛呀! 擺返個我三億五千萬年前做既傳統月餅係隔離對比下先.
相得益彰呀! 呢款就係我大佬lur住要既月餅啦.
2009年9月30日 星期三
2009年9月28日 星期一
2009年9月27日 星期日
Sweet Sweet的感覺XXVI - 中秋歡慶
我大佬又追魂call啦：
八月十五是中秋，遠在廣州飲燒酒，月餅海味猶未見；不知承諾何時有？
我都知我地有個姪娶新抱, 但我呢個連回鄉証都冇既姑姐係免疫既!
我同Bibi商量，今次唔駛小黑咪幫手啦：
八月十五是中秋，知你果晚飲燒酒，命裏有時終須有；月餅海味心裏收！
八月十五是中秋，知你果晚飲燒酒，月餅海味心裏收；命裏無時莫強求！
都係寸得滯，所以改為：
八月十五是中秋，知你果晚飲燒酒，特種賀禮人人有；月餅海味莫強求！
p.s. 密切留意郵箱啦!
就係咁，我坐咗四晚苦工監，終於都做咗十六大個東東出黎。八個朱古力味, 八個咖啡味!
2009年9月26日 星期六
2009年9月25日 星期五
剝粟米
可能大家成日煮餸或者整沙律，都係用罐頭或者急凍粟米既，貪佢方便吖麻．
但係，原來自己剝新鮮粟米，拎去急凍，日後取用仲方便呀．
而最重要既係，新鮮粟米既食味係同罐頭貨係差天共地既，愛護家人既你，又點會唔識揀吖？
有小朋友話唔識剝粟米喎，要我示範下．其實大部份人一聽到話要自己剝，就洒手擰頭，咪諗到咁複雜至得架，其實剝粟米係好簡單，快捷又易做既事黎，Bibi細細個就已經會幫手做啦．
首先，梗係要剝走ｄ粟米衣先，清走ｄ粟米鬚，如果屋企有細路，粟米鬚同一陣剝出黎既粟米芯都可以拎返黎煲湯既．
跟住，用陰力將條粟米屈成兩截，呢一個步驟係關鍵黎，咁跟住落黎既工序先易做架．
因為已經有個切口，我地剝ｄ粟米粒就會變得易，先搵兩三行生得比較齊整既，順住紋路，將粟米粒一路剝出黎．
技巧係要用大姆指第一節既指肉去推ｄ粟米粒出黎，咁先唔會整傷ｄ粟米粒架．若然唔小心整爆咗粒粟米，就要即刻用紙巾抹乾有關部份同手指，咁先可以順利剝落去，事關手一濕，就剝得唔順架啦！
見唔見呀？係原粒粟米咁剝出黎架喎，好快就到底架啦．
跟住就可以用九秒九既速度將其餘既粟米粒撥晒出黎，你地睇下，我係用緊半隻大姆指去撥既，輕輕一撥，就一排架啦．
見到未？係咁意就有七八粒甩出黎啦．
仲係原粒既添！唔會好似急凍貨同罐頭貨咁，每一粒都係俾刀切走一忽既，連埋底部果粒芽仔都可以要埋，更高營養．
唔駛幾耐，就剝好架啦，幾乾淨！
街市賣十蚊三四條粟米，剝出黎就一大袋．
咁你話一罐粟米要幾多＄吖？呢度起碼有三罐既份量啦！
只要成袋紮起個袋口，就咁放入雪櫃既冷凍庫就得架啦．因為冇經過水氣，所以就算雪到僵硬，佢都係一粒粒分開既，要用幾多就拎幾多, 仲唔係夠晒方便呀?
咁日後大家想整沙律又好，用黎煮餸又好，或者烚黎俾小朋友當零食又好，只要取用所需份量，用少少水（點少法？浸住煲底半寸都夠啦），齊水落（即係水同粟米同時放入煲），水滾起計，煮佢分半鐘就ｏｋ架啦．咁大家就有更美味可口既沙律同粟米菜式架啦！
經濟，方便又夠環保，何樂而不為吖？
建議菜式: 牛油粟米杯, 粟米肉粒飯, 粟米豆腐羮, 沙律, 粟米餃子
就算煮個公仔麵, 潵一堆入去煮, 都好好味架!
2009年9月24日 星期四
乜咁快又到中秋節架!
20/9果日，收到其中一個大佬既打單電郵：
一年容易又中秋，距離果日得兩週，月餅海味仍未見；唔通芋頭點豉油。喂！
其實我呢輪忙緊搞Charity Bazaar既野，邊有咁多時間去開壇作法吖？
實在十分煩惱，都唔知整咩俾佢好？送得俾佢，佢對上果六個再德高望重d既哥哥、姐姐咪又要送埋？咁如果佢地都有，咪唔爭在要俾埋佢對落果d？做最細既就係咁架啦....
嘩！苦工監呀….
想側側膊，唔理佢，睇佢好唔好意思直接打黎勒索。不過，睇怕佢都做得出架喎……
唉…….
小黑咪已經幫我草擬咗封回電，頂住先架啦：
八月十五是中秋，出黎食飯飲燒酒，月餅海味雖未見；人情欠住遲早有。
講得遲早有, 即係都要整啦....唉......
Mabel亦都幫手推下我，叫我快d諗諗佢。月餅？整過啦！海味？仲未研發住喎，都想留返條橋過年用架？
最後，暫定以玉兔為主題，事關我之前用細家姐摧殘過既輕粘土，做咗一批兔仔曲奇，應該可以拎黎用既。
三軍未動，糧草先行，第一樣要做既就係賀節牌仔，咪睇佢得果丁丁粒呀，因為細，又要剪剪貼貼，咁都玩咗我成晚架啦。
跟住盤點下d兔仔兵團先，慘！好多都大得滯，未必用得著。衰就衰在我玩果陣冇諗過要拎黎用架，只係過下手癮既唧！
標準係要細過我既小指頭既，咁先叫合格．
仲未有mood做住，希望唔好爛尾啦！
2009年9月23日 星期三
印仔六十四 - 給雀屎的祝福
雀屎生日，整返張生日卡俾佢先！
咁梗係最好唔駛花錢，用環保紙做啦，舊快佬入面既divider同index sheet就啱晒啦．
雖然冇人肯用佢地，但我都有好好收藏既．所以佢地既健康狀況仍然相當好．
呢個係新近雕既印仔，作為卡既內頁，張紙咁乾淨既？咁環保紙都會有ｄ冇乜打過字係上面既空位架麻，cut出黎用就啱晒啦．
為咗配合"It's a gift. It's a card."既概念，我加咗一隻豬仔包電話繩入去，面頭既迪迪尼feel既字體都係我雕既．認唔認得張Index Sheet呀？
原本想就咁寄出街架啦，但又好似單調得滯，人地始終都係女孩子麻，仲係香港永久居民添！
好啦，就等我加返三粒星俾佢，核實佢既身份啦！
冇錯，個信封都係環保信封黎，係冇乜包裝架啦，我諗雀屎都唔會介意既．
2009年9月21日 星期一
另類彩燈
睇電視見到新元朗中心有瓷器紮作彩燈，都想親眼去見識下．
於是星期六放工就坐西鐵入元朗行下啦．呢條生猛既蛟龍就係用瓷杯，瓷碟，瓷匙，瓷碗等紮作而成，形態優美．
單單靠線同幼繩去固定造型，都咪話唔精巧呀！
鵝卵形既碟做鱗片，又幾靚喎．
乒乓球做既恐龍
箭竹紮成既熊貓，師奶老公萬勿錯過呀！
玻璃樽仔造既孔雀
仲有阿一ｄ同鄉提供既蠶繭做既玉兔添！
我都算醒啦，早一日就上定網搵資料，睇下左近有咩可以搵食既地方，終於選咗呢間滋味齋（元朗水車館街82號興旺大廈地下1號舖），坐輕鐵係大棠站落，見到東亞銀行就行入果條街，右手面又有分丫路，行入去就見啦．
我地坐落先知呢日係齋期, 仲係初一添, 真係咁橋既? 我冇刻意安排架!
我點咗雜菌豆腐斑腩飯＋例湯，只係＄２２唧，可惜因為太肚餓，食咗兩舊先記得影相，影響咗賣相添．好夠熱，我最鍾意，右面果舊俾我咬咗一啖．
例湯係好細盅既，係阿姐一早畢好既，咁就唔好啦，唔夠熱，做乜唔係人地叫先畢喎？咁下次我情願要飲品啦，都係一樣咁多錢唧，凍飲先要加兩蚊．
估唔到呢個南瓜彩椒排骨炒麵係脆卜卜果款黎，超熱氣呀！好彩係爸爸自己堅持要點既唧，唔關我事，睇佢點鯁晒佢．呢碟麵連飲品成為＄３２．
係度食開上述既食品，可以加＄５要碟油菜，我地食食下都叫咗一碟，但到我食完碗飯都未到，點解呢？原來油菜都係即整架，熱辣辣，又腍甜，正！唔知媽打有冇帶過佢企個廚房CEO去食過呢？
跟住去買埋餸，你地估我用＄１０１買咗咩吖？
一斤花生，半斤白果，一札豆角，三只矮瓜，四條粟米，一斤豆卜，一磅魚肉燒賣，半磅魚蛋，七個桃駁梨，一大只粉葛．
如果唔係驚雪櫃冇位呀，我實買多ｄ唧．
2009年9月19日 星期六
廿零蚊三人分 - 鮮茄蘑菰燴肉碎
係中環，去買個兩餸飯盒都要廿五蚊啦，今次我整既三人份碟頭飯，都係咁上下錢唧！
材料有雞蛋兩隻（＄４），蛋黃橙色ｄ既係馬來西亞Omega 3愛心蛋（佢既蛋殼好厚，一睇就知有落足靚飼料餵養既），冇咁深色既係德清源既有機蛋
2009年9月18日 星期五
我家有個糊塗爸爸
早上，爸爸收工回家，入房叫我起身。
「起身啦，六點三啦！」
我瞄下只錶，正確時間應該只係六點一唧，係床上hea一陣先出廳。
爸爸：「做乜你咁懶豬，六點半先起身？」
我望下廳上個大鐘，又望下電視上個細鐘，兩個都係指住六點半。我又睇下自己只錶，六點三咋喎。
我：「點會咁架？」
如果係我只錶咗停電，又冇理由停下又行下架？
我：「喂，你轉台睇下電視依家顯示咩時間啦。」
咦，6:09咋喎！
原來爸爸返到屋企，首先見到細鐘快咗d，就當係大鐘行行下冇電，即刻調教返個大鐘，等兩個鐘都一樣時間，先入房叫我起身既。
雖然我果陣都未訓醒，就算晏咗幾個字起身, 都未至於會遲到既，但經脈都俾佢打亂咗少少呀。
認真掂呀佢！
同場加影, Bibi飯一碗! 爸爸係度食飯, 我地多素都係食素既, 呢餐有薯仔, 菜心, 有機紅豆角同有機秋葵(即羊角豆), 佢將薯仔用筷子壓成蓉, 再撈沙律醬, 跟住砌咗呢碗開心飯出黎. 喻食飯於玩樂. 都中六啦, d行為仲係咁低能仔既, 都唔知阻唔阻止佢好呀!
係呀, 我地平日就係食d咁野架啦, Bibi有得咁食, 都已經好開心. 但爸爸之前果晚開夜, 我煎咗魚餅, 所以呢餐有餸加!
2009年9月17日 星期四
2009年9月16日 星期三
印仔六十三 - 肥鴨
除咗初學果陣，冇有識死，同埋要做特別章之外，幾時會咁豪，用咁大塊擦膠至得架！
做隻鴨咋喎，一用就用咗成兩寸幾啦，知唔知ｄ擦膠斷市啦？
係，我知，我一向都好慳家既，之但係，我又真係冇咩大隻既印章可以用黎做卡喎，咁就破例整個玩下啦．超順呀！原來唔駛就住就住，粗枝大葉咁雕係好爽架！
用埋呢個新買既粉紅色印台，試下先，都ｏｋ喎．
懶人油顏色梗係求其油架啦，我知ｄ色麻麻地.
咩話? 油得仲衰過小學生?
呵呵! 咁樣到第日認真ｄ做張卡出黎，收到果個人地就會覺得, 嘩! 乜靚咁多架！灰姑娘都係咁變身架咋!
2009年9月15日 星期二
2009年9月14日 星期一
2009年9月11日 星期五
訂閱：
文章 (Atom)