31/8/2009，已經係暑假既最後一日，呢餐晚餐梗係要最後一擊，教Bibi整多少少野啦。
今晚爸爸要返學，個廚房就交返俾我地玩啦。佢蒸落飯就出門口，我返到屋企，洗洗手就叫Bibi入廚房。
一早就叫爸爸洗定菜，咁煮咩好呢？有小半條素鴨，可以煎素鴨俾爸爸，有菜心，又有白菜仔，睇黎菜太多喎，都係收起ｄ菜心先，留返聽日食都得，費事煮咁多菜。
今日主打係教Bibi整咸蛋肉餅蒸水蛋，材料好簡單：兩只蛋、一只咸蛋、半碗調咗味既免治豬肉（先用豉油、糖、鹽調勻，再加粟粉調勻就得啦）。呢ｄ野超市都買到，方便唔係好識逛街市既年青人。
做法：
打開只咸蛋，將蛋白同蛋黃分開，用筷子或刀仔，同個咸蛋黃解體，等佢變成一小粒、一小粒。
用油塗勻一只有深度既碟（咁你食完碟野，就好易清洗架啦），將多餘既油倒返出黎（一陣放埋落ｄ蛋度一齊打勻，我家姐話可以令碟蛋滑ｄ架），將調咗味既豬肉平均放係碟上，再放咸蛋黃粒粒，用大火隔水蒸大概七分鐘。（記住，如果肉厚就可能要蒸成十分鐘架啦。咁點先知ｄ肉熟未？你可以開蓋睇下，有少少汁蒸咗出黎，就熟架啦，而且仲會聞到香味既添！）
係蒸緊肉果陣，將雞蛋同咸蛋白放入一只深碗（連埋頭先倒出黎既油喎），加少少鹽打勻佢（咸蛋唔係有味既咩？仲加鹽？係呀，你唔好忘記你又加咗好多水呢！咪諗住唔夠咸，蒸好咗先加豉油呀，影響晒d味道，你有冇見人地食咸蛋點豉油架?），加倍半既凍滾水又打勻佢(有人話用熱水仲滑喎, 我試過啦, 分別唔大, 又咪咁!)。
（正常情況下，普通蒸水蛋係要用兩倍分量既水去溝勻佢既，但係唔好忘記喎，ｄ肉餅係會有少少汁瀉出黎既，所以水既份量最好少ｄ，大約倍半水就夠啦。）
｛注意：如果我一時唔覺意加多咗水，見到碗蛋汁變到水汪汪咁，屋企又冇多只雞蛋加入去平衡返咁點算呀？
唔駛怕，仲有得補救架。
就係加少少粟粉入去啦，少成點？咁都要睇你唔小心加多咗幾多水至得架，暫定四分一至半茶匙啦，自己執生啦。記住將呢d蛋汁倒入碟蒸之前一定要撩勻佢，確定ｄ粟粉冇沉晒底喎！｝
雖然呢碟肉已經熟咗, 你哋都應該見到我點放d肉啦, 咸蛋黃都係求其擺既.
到ｄ肉蒸熟（見唔見到有少少汁呀？睇唔睇到我放肉係有虛位架?），就將蛋漿緩緩倒入碟度，小心ｄ，咪倒出去碟外便呀! 驚熱就收咗火先倒都仲得，再驚青ｄ咩？成只碟夾出黎，倒完蛋汁先放返入鑊蒸都得。用中火大概蒸八至十分鐘啦。
見唔見到面頭有d油呀? 實有架, d肉都有d油架麻, 我地頭先都加咗少少油去打勻d蛋啦!
一般專家就話：用另一隻碟tup tup陷咁蓋住呢碟蛋面去蒸，又或者用錫紙封好碟蛋先蒸，咁蒸出黎就滑一滑。但我係超級懶人，又唔想封錫紙，又唔想洗多只碟。係呀！我認呀！我係懶呀！咁點呢？
其實好簡單架咋，我以前就教賓賓同碟蛋“Say Hello”既，即係碟蛋蒸咗一陣就揭起個蓋，疏下氣，再蓋返好佢(事關蛋面蜂巢狀既原凶, 就係呢d好熱既蒸氣啦)。如是者，一路煮緊其他餸，就間中同碟水蛋打下招呼。到咁上下，你就會見到碟蛋凝固咗架啦，仲可以順便防止埋佢蒸得過老添。（咁我都唔排除有人會覺得咁仲煩既，要成日記住check下碟蛋，但咁做法，失拖既情況就比較少啦．）
咁點先叫熟呀？可以用只筷子督下佢，你會感覺到既。如果生，你督完，拎起隻筷子，會見到有水滲出架．
嗄？睇唔到？唔識分？冇有怕，用只茶匙插到底（係全蛋漿部份喎，唔係肉餅果部份喎，你都知肉餅果部分水位淺ｄ架啦）畢一匙起身睇飽佢啦！咁知到咩叫熟未呀？未熟既呢，你剛畢起果匙蛋既位置，就會睇到成氹蛋汁咁既。熟既話就見佢全部橫切面既蛋都係凝固咗架啦。
熟咗就上檯啦喂!
睇下我地蒸既蛋幾咁滑！用湯匙畢起，橫切面都係咁滑淨架，面頭亦唔應該有蜂巢狀架喎。我呢碟面上既圈圈係油黎，唔係蒸老咗架．
呢碟就係清炒白菜仔，做法亦超簡單，將洗淨既白菜仔，用薑片同鹽灼一灼，記住一放入煲滾水度，見佢軟身即刻夾起(個煲仔細就分幾次落啦，一樣咁方便架咋)，泌去多餘水份備用．以薑片或者蒜蓉用油起鑊，加鹽，倒ｄ菜入去，炒一陣就可以上碟架啦，唔駛蓋鑊蓋架，緊緊熟就爽脆，過熟就腍甜，唔會衰既，呢味係五分鐘內可以整起既菜式黎．我地梗係一路蒸蛋, 一路炒菜啦.
爸爸既煎素鴨，超市有一長條既素鴨賣，我喜歡切薄ｄ，唔好搞散佢，成排咁放上鑊，煎好晒兩面，先再分拆佢，煎埋橫切面．如果去宿營，咁一條都可以煎到一大碟架啦．簡單易做, 又呃得下人!
見爸爸唔係度，我地仲開咗罐沙丁魚加料添! 正!
同場加映，爸爸煲既華潤堂買返黎既姬松茸平肝健胃湯（一百蚊四包），材料有眉豆、花生、蜜棗、姬松茸、淮山、薏仁等，我地自己加咗果皮。煲完出黎，我冇放任何調味料，有少少甜味，唔放鹽都得。
煲完出黎既材料係可以食既，唔好嫌棄湯渣呀，都好有益既.
沒有留言:
張貼留言