2010年4月30日 星期五

印仔七十八 - 篆刻 II

呢個咩字呀?


鼻?啱啦!做咩雕個咁字?



啱至奇呀!


係三個字黎,係印篆既自由人至真呀!佢地最易寫啦,所以係我寫既第一個稿黎.



冇架,心裏面諗起咩咪雕咩咯,好隨意,咁樣做手作先會開心架麻.



就送俾愛自由又愛搞搞震既你啦!


2010年4月29日 星期四

爸爸煮的午餐

爸爸食素幾年啦,為咗就佢,我同Bibi都差唔多要食埋素咁滯.有時佢亂咁煮,我地都要照食架啦.輪到佢掌廚既話,出現係飯檯上最多既菜式就係大雜燴啦,即係乜都炒埋一碟上檯!


佢煮既野,有時都唔係常人可以接受得到架.所以呢,我地屋企有句野成日講既:只要懂得感恩,就好食架啦!


如果人地問到d野好唔好食,但d野好難食,點答好呢?


我通常會話:要好感恩先食得落咯!


今次既組合,有少少騎哩,蕃茄、金菰、生根、枝竹、迷你薯仔。係呀,屋企冇菜係度,是但啦.配埋糙米紅米飯,就係我地既晚餐兼我第二日既午餐啦.



點解我話騎哩呢?是關佢煮野係冇乜譜既,生根先出水,有做到,ok!



枝竹咩?呢條係全場最腍架啦,其餘既都係又硬又un既,佢話鍾意咁煮喎:你地食唔到仲好,留返我食!死雞撐飯蓋就係咁架啦.



至於金菰咯喎,駛唔駛一次放兩大包吖?好似煮緊炒米咁呀!



至於薯仔呢,成日叫佢要切開d薯仔先好煮,如果唔係就晒柴火兼煮唔透.第一日有聽架,第二日又照犯,所以呢...上檯之後,大部份既薯仔仲係硬崛崛既!點食呢?唔知大家仲記唔記得佢煮既QK三色蛋呢?呢隻薯仔簡直就有異曲同工之妙呀!!!


我:嘩!你又唔切開d薯仔黎煮啦!


爸爸:我想試下咁煮得唔得之麻.


我:你試咗好多次架啦喎,明知唔得架啦.


爸爸:車!係你嘴尖之麻!



呢d就係糙米紅米飯啦,我地好多時都係咁蒸飯黎食既,有時加埋d紫色既糯米粟一齊蒸,口感仲好呀.



至於咁樣食係咪就叫健康呢?


點都好過飯街外既飯盒既,又唔駛出街,已經好唔錯啦.


2010年4月28日 星期三

印仔七十七 - 篆刻 I

好似好耐都冇拎起過筆刀啦,自從做咗一大批印仔去義賣之後,都冇再開過工啦.一來市面已經冇我用開既擦膠既貨源啦,二來擦膠存貨唔多,要試既野都叫做試過啦,三來呢,我仲雕咗一d存貨係度,可以隨時拎黎用,四來呢....咪因為自己懶咯!


呀!係啦,咪係又要趕聖誕,新年同母親節既禮物咯!仲有果百幾張義賣卡呢....


係喎!我都唔算好懶咋喎!


今次,玩返印仔,又要做d唔同既野啦.我做咗資料搜集半年架啦,你估我講呀?真係睇唔少書法既參考資料架.


第一次玩篆刻,都係搵個易做d架啦.突然間,心裏面彈咗四個字出黎--天作之合呀!(貪佢d字夠淺呀!)



哎吔,呢幾個字點寫架?等我查下篆刻字典先呀嗄...



當日人地硬塞呢本啞老師俾我,今日終於都有用武之地啦!



刻字呢家野呢,每人手勢唔同,只要唔係太離譜,基本上肥d瘦d,人地都唔可以投訴既.



而且按壓力度大細都會影響印出來既效果,我考慮過好唔好專登整崩個方框,等佢似d印章feel架,後尾我都係求其搵條邊整幼d,咁印出黎既效果就會好自然架啦.



呢種字體叫印篆,其實呢...如果冇查字典,我只係識得個合子架咋!



再執靚仔d個天字,交貨!


2010年4月27日 星期二

街上派的試用品

食完早餐返公司,順手取報紙,發現多了一些女孩在派手作材料,等我都拎返張先.


原來係女性衛生用品來的,附在趣緻手工紙上.



砌好啦,都幾可愛吖.



咩動物黎架?駝馬?隻疑似綿羊既東東,似豬多d喎!



呢舊立方體顏色都幾鮮艷架,就擺佢幾日啦.



個盒仔同d紙可能第日有用都未定!


2010年4月26日 星期一

熱檸水?係咪得架?

成日都聽到人話:日日一早飲杯熱檸水,可以改善身體既酸鹼度,係一個保健良方.


孤勿論呢招掂唔掂,但原本飲開奶茶咖啡既,就算你一向唔放糖,熱量點都大過一杯淨檸水掛?咁即係話,如果你改行飲呢d,起碼都放少咗卡路里入個肚啦.對於想修身既人士,未為不可既.


夏天都到啦,麒麟臂又要出黎獻世.我俾人踢一踢,終於都走去街市買檸檬啦.想懶d去超市既,又驚佢d貨唔靚,買唔落手.咁唯有行遠d啦!


八點零鐘,中環既街市好多都未開,我唯有一直行上d,又再行上d;終於都搵到一檔有檸檬賣架啦.嗄?十蚊五隻?咁多點搞呀?既然青檸都係咁多錢,不如益下d同事,整兩粒青檸佢玩下啦.





沖咗啦,我21/4開始呢個行動既,由朝早到放工咁滯,都係度飲檸檬水.





我就最唔鍾意d熱野凍晒先黎飲既,所以佢一暖咗,我就咕咕聲飲晒成杯,跟住又加水,晏d再飲過.試驗初步結果就係:呢幾片野,沖到第三杯都仍然係有味既.





係咪飲咗d皮膚會滑d呢?係咪因為檸檬會美白去斑呢?


有樣野係一定既:飲咁多水,就自然去得殊殊多啦,咁成日排毒,皮膚冇改善至奇呀!


2010年4月25日 星期日

每日一餅 - 你有試過嗎?

係惠康見過呢隻餅好多次,每次見到都當佢透明。夾心餅之麻,四蚊一包,冇咩特別唧。



見有小朋友食咗,係網誌度介紹出黎,應該都唔太差咋喎。


有日又再去惠康買生果,見到佢地仲棟晒係度,等緊我。望多眼:$4一包,加$1多一包;咁咪即係$2.5一包?


佢地係度呼喚我呀:試下啦!買我返去啦!我地都唔係咁差架咋!


咁好啦,就帶兩件走啦。



下午,開一包出黎,咬一啖。


咦!真係唔差喎,餅質仲好鬆化添!又唔太甜,淡淡既甜味,連我隔離位果個唔鍾意甜食既姐姐仔都冇投訴喎!



好,以咁既價錢,我俾個Good你!


2010年4月24日 星期六

它來自上海


因工作關係,認識了一些同行.慢慢接觸多了,就成為朋友.


今回,朋友到上海一遊,送我一盒什錦酥.



依家國內野都講包裝咯.



花生,杏仁,黑芝麻核桃;咦!板栗?前述幾種,唔食都估到咩味啦,板栗咯喎,真係未試過喎.



即刻拆一盒黎食先...唔,不太甜,至於栗子味咯喎,都唔多覺喎.但係,就比同事去完北京帶回來的好得多啦!



噢!原來有五款味道架,數漏了綠豆添!



我當然有請我老闆食啦,真係對唔住啦嬸嬸,佢又食到一身都係啦,麻煩你同佢吸塵果陣吸清d啦!


2010年4月23日 星期五

榴槤朱古力

一向對榴槤都冇乜好感既,尤其係榴槤糕,自己唔食,淨聽人講都知難頂啦!爸爸話:要好感恩先食得落喎.


後來,又出咗粉綠色既榴槤糖,我俾過我老闆食啦,我俾咩佢都即刻食既,但果次佢一放咗入口,我先問佢知唔知自己食緊乜?係榴槤糖呀!


老闆:嗄.....


面都青埋,好啦,俾你lur咯.


但係,受過咁既教訓之後,佢都仍然係唔識死既,又再俾咩都食啦.


今次呢,有同事去完旅行帶咗盒榴槤朱古力返黎,我見到之後,就問下食過既同事佢係咩味既?


同事:好味咯!


嗄....唔係好靠得住喎,咁同榴槤糕咩分別吖?


佢話,榴槤糕難食,呢粒就好食,等我示範一下,食粒俾你睇啦.


見佢咁enjoy,另一邊既同事又拎粒黎食,仲咬開俾我睇下入面,佢話裏面係creamy既.咦,又唔係太差咋喎,好,等我拎粒返屋企,切開幾份,同Bibi一齊見識下先.


同事 : 駛唔駛咁誇呀? 仲要切? 成粒食啦!



成盒野,有好幾款形狀既,我揀咗呢粒,方便切吖麻.原本呢朵花有九瓣既, 切三份, 一家三口一齊食就最啱啦.



爸爸開工喎, 咁切開一半算啦,入面真係有餡架喎,食半粒咁多? 都係咪啦, 再切一半啦....拮起一粒,戰戰兢兢咁放入口,我覺得呢....有d好似蒜頭味咁...



食落呢,又真係有榴槤味.我問Bibi,你覺得點呀?


Bibi:有d難頂咯,咩味黎架?


我:咪榴槤咯.


Bibi:唔怪得啦(跟住走去飲水),一日都係你啦,俾d咁難食既野我食,搞到我喉嚨唔知點咁...



呢盒東西好貴架,我地自己一定唔會買黎試,今次咪叫做見識下咯.


我就只係食咗四份一粒唧,因為爸爸去咗開工(免疫),所以其餘既都係Bibi一個鯁埋既,辛苦佢咯.


等我煮返d鮮茄蘑菰肉碎通粉俾你朗口呀嗄!


2010年4月22日 星期四

Sweet Sweet 的感覺 XXXII - To 嘉樂

無意中,係d舊相度搵到呢個蛋糕,都好幾年咯,想當年我姨甥仔仲係小學生,佢果陣又好鍾意軍曹既,所以我就做咗呢個蛋糕俾佢啦.



我好懶,只係簡簡單單咁用咗菠蘿片同奇異果片就交差啦.小朋友即係小朋友,佢一d投訴都冇,仲好佩服我呢個呀姨添!


係呀,我認呀!又一個呃細路既例子吖嘛!


2010年4月21日 星期三

爸爸:Bibi真係我既囡囡黎架!後記:PG家長指引

大家都知上次Bibi捉咗d甲蟲,話要第日拎返學校既.

唔捉都捉咗咯,咁我只好千叮萬囑,叫佢記住帶走晒佢地呀!

唉~~,終於呢...爸爸真係第二日又捉咗好多甲蟲返黎呀!!!




爸爸:一日都係Bibi啦,如果唔係佢,我又點會真係捉D甲蟲返黎吖.其實我見到佢地好耐架啦,想捉返黎,驚俾你鬧,就係見到Bibi捉咗返黎,橫掂都係啦,咪整d返黎玩下咯.

原以為爸爸只係捉咗佢帶返黎既一堆甲蟲唧,點知....




正在啃蕃薯中......




我放工返到屋企,見到兩父女係度打眼色,都知有景轟架啦.我係廚房出黎,見到門邊有隻甲蟲爬爬下,乜會有隻野係地既?

初初爸爸仲死口話隻野係外面飛入黎架,四層樓先到平台喎,然後先到住宅,又邊得咁橋,隻甲蟲會由第一座飛到第十座搵我地呢主好人家吖...

跟住,爸爸好似自首咁,拎咗佢呢日既獵物出黎,一共有廿六隻!

咁都算啦,我都冇追究啦.點知.....

食完晚飯,爸爸又係度玩緊蟲蟲,Bibi就做緊功課,我就背住佢地係度上網.

突然,Bibi大叫,仲起埋身跑開添!原來有隻會飛既甲蟲係度飛緊,我到呢一刻先知呢d東東原來真係會飛架!

然後,爸爸就叫Bibi招供啦.

Bibi:其實呢,我琴日係捉咗十八隻甲蟲既,我地咪放咗係個玻璃兜度既,用個袋罩住.今朝我起身果陣,個兜入面得返八隻咋,而個袋呢就穿咗兩個窿.即係話,加埋頭先地下,同埋飛起果隻,仲有八隻未出返黎...

賣葛啦,我真係俾佢地嚇到喊咗出黎呀...

至於Bibi帶返學校果d甲蟲呢,當然令到大家好興奮,尤其係生物科既老師添!

同學甲:佢地會唔會飛架?

同學乙:甲蟲梗係會飛啦!如果佢地一齊飛會點呢?

同學甲:咁快d吸返個蓋啦,我接受唔到佢地飛起既樣呀.

我覺得...我開始有d抑鬱症啦...

後話:

第二朝,Bibi食緊早餐果陣同我講:如果我地唔同你講,你咪唔駛咁驚咯.琴日我唔見咗十隻甲蟲,爸爸話點都唔好話你知架,如果唔係你都唔駛喊啦.

我:就係你地瞞我,我先唔開心呀,如果你地早講,我起碼有心理準備吖麻.琴晚我見到爸爸係度專登掉粒黑色Lego係我隔離檯上個兜度,我知佢又想嚇我,當又捉到一隻甲蟲之麻,慌你唔係都想咁玩媽媽呀?

Bibi:我冇呀!但係見到爸爸咁做,條橋又好似work喎!(陰陰嘴笑啦...)

Bibi:呢d係甘蔗金龜呀,其實佢有好多品種既,我check埋佢既熟成期架啦,係四月,好吻合;幼蟲期係九月至三月.班入面都冇乜人啱呢個channel架咋,竟然有個平日成日話我變態既男仔,好開心咁同我一齊玩喎.

勢估唔到,Bibi呢輪咁忙,都仲會自己上網搵資料喎!咁算唔算通識呢?

到咗依家,我由驚,都俾佢地訓練到唔驚啦.見佢地食蕃薯,切開蘋果俾Bibi食,都留返個芯俾佢地歎.

真係估唔到個華盛頓蘋果芯咁重咁大,佢地都有能力集體托起佢,仲可以反轉再反轉咁堆黎堆去添!如果無無聊聊,望住佢地一輪,時間就會好快過架啦.

2010年4月20日 星期二

爸爸:Bibi真係我既囡囡黎架!PG家長指引

有日下晝,爸爸打黎:「隻豬真係有我既遺傳架,佢頭先放學返黎,放低咗個膠袋,入面裝咗好多甲蟲架。仲叫我唔好整死佢地喎,因為佢聽日要重要拎返學校架。」



2010年4月19日 星期一

牙膏的妙用

網上流傳一些牙膏的用處,現在同大家分享一下.一讀無妨,免得知識到用時方恨少呀。


衣領、袖口的汗漬,可用少許牙膏搓洗去除。
係咪真係得呢?我未試過,但一般白色果款牙膏係應該會減淡d污漬既。


若衣物沾到油垢,以少許牙膏塗在上面,輕輕擦幾次,再用清水洗,便可除之。 我諗呢個應該得,因為我試過連唇膏都除到咯(可參考呢篇:怎麼除去唇膏漬?),咁普通油漬又點會唔得吖。


擦皮鞋時,將少許牙膏和在鞋油中擦拭,皮鞋更光亮。
係真唔係呀?不過依家都好少要擦鞋啦,而且用普通方法擦鞋,之後用布來回拖幾下,都夠晒令立立啦,駛乜搞咁多野呀?


清洗魚或吃大閘蟹後,手上總會留下難以去除的腥味兒,先用肥皂將手洗淨,再抹上牙膏反復搓擦,用清水洗淨後腥味兒就去除了。
呢下相信都得既,但用白醋去洗都得架。


牙膏可用來擦拭玻璃上的積垢,用布蘸牙膏擦拭,可擦得乾淨明亮。
這招係work既,不過呢,用潤膚露既效果都係差無幾架咋。


牙膏還可以去除瓷器污垢,搪瓷品的陳年積垢,用刷子蘸少許牙膏擦拭可除。搪瓷茶杯中留下的茶垢和咖啡漬,可在杯內壁塗上牙膏後反復擦洗,一會兒就可以光亮如初。
係就係咁講,但自從出咗神奇綿之後(可參考:神奇清潔棉),仲駛鬼咁搞咩!


電熨斗用久了,其底部會積一層鐵鏽。可在電熨斗斷電冷卻的情況下,在底部抹上少許牙膏,用乾淨軟布輕輕擦拭,即可將鐵鏽除去。
我細個果陣都試過,得得地啦。


水龍頭下方容易留下水鏽和水垢,塗上牙膏進行擦洗,很快就能清理乾淨。
呢招ok架。


銀器久置不用,表面會出現一層黑色的氧化層,只要用牙膏進行擦拭,即可變得銀白光亮。
可惜有時會太多隙縫,都幾難搞。


牙膏修復妙用


有車一族會發現車輛型號標識,經雨水侵蝕和長時間的灰塵沉積,會變得失去光澤,如果你用牙膏塗抹在車輛型號的標識上,過一小會用抹布擦拭可重現鍍烙的金屬光澤,此種方法同樣適用於車窗玻璃的劃痕。
我未洗過車,唔清楚。


牙膏可去除牆面字跡。如果有小朋友用鉛筆、蠟筆把牆面上畫得亂七八糟,只要用脫脂棉沾些牙膏,就可以輕而易舉地把牆壁上的蠟筆或鉛筆等字畫擦拭乾淨。
早知既話,當年歲零咁大既Bibi劃花道牆,就唔駛俾我省到立立令啦!


手表戴久了,表面會有一道道的輕微劃紋,使得表盤看起來渾濁不清,用少許牙膏塗於手表的蒙面,用軟布反復擦拭,即可將其細小的劃紋除去。
好,等我試下先。咦!得喎!


牙膏同樣可以抹平光盤碟面的劃道。用軟布蘸著少量牙膏在劃痕上慢慢摩擦,由裡向外劃圈,二十分鐘左右,盤面的劃痕變得淺多了。
咪住,咁會唔會影響到碟入面d資料架?仲要成廿分鐘?咪玩啦!


牙膏消炎妙用


牙膏中含有薄荷腦、丁香油、生薑油等成分,有消炎、止痛、化淤等功效。這個季節,蚊蟲、蜜蜂全體出動,萬一不小心被蜂蜇或蚊蟲叮咬後,奇痒難忍,塗上一點牙膏按摩一會兒,即能止痒消腫。
一時間冇粒蚊lan去測試添!你地睇下邊個試咗話我知啦。


夏天生了痱子後,在洗澡時,用少許牙膏在痱子多的部位進行搓洗,再用清水洗淨,連用幾次,能止癢消痱。
家陣咁多冷氣,仲邊有熱痱吖。除非係大汗豬既BB唧。


夏日人體容易發生皮癬,用清水將患處洗淨、擦乾,將牙膏塗抹患處,對治療皮癬很有幫助。
呢樣野又係要搵人去測試先得啦。


牙膏還能治腳氣。每天洗腳後,擠少量牙膏塗抹在腳氣部位,堅持一段時間後,脫皮、水腫、奇癬的現象就會消失,腳氣即可痊愈。
有冇咁神奇呀?係咪因為清潔得多先搞掂咋?腳氣既成因可能係因為身體缺乏某d營養咋喎.


此外,更聽說有人用牙膏醫暗瘡,甚至有人以牙膏敷臉,去除黑頭!
我細個果陣,早就試過,係唔得既,尤其依家d牙膏成份咁雜,分分鐘衰多二錢重呀!


附錄:牙膏──旅行必備(呢d我就唔敢隨便辯駁啦,因為去到survivor咁既階段呢,有得用,點都好過冇既。)


外出旅行牙膏是必備之物,因為它除了潔齒 外,還具有一些生活上的用途,可解除旅途上的不便。


一、當皮肉因外傷踫破時,可以在傷處塗上牙膏進行消炎、止血,然後再包扎上。作為臨時急救藥,以藥物牙膏效果顯著。


二、當被蜂蜇了時,可以在蜇咬處塗上牙膏,這樣就可以消除紅腫,因為蜂毒是酸性物,而牙膏屬弱鹼性,酸鹼堿中和就解毒了。


三、當被蚊叮、蟲咬後,奇癢難忍,只要在叮咬處塗上牙膏就可止癢。


四、旅途中發生頭痛、頭暈時,可在太陽穴塗上牙膏,因為牙膏中有薄荷腦、丁香油,可以鎮痛。


計我話:去旅行,不如帶枝阿婆香水--白花油好過啦!大家都想旅途愉快架,簡單既藥物係必備既,咪咁懶啦.


話分兩頭,大家係做試驗既時候,都應該有智慧d,咪人地話得,就亂咁試呀.大家都知家下d牙膏成份幾咁複雜架啦,仲有多種顏色添!如果要用黎清潔既話,最好都係用返最原始果款白色牙膏好啦!


2010年4月16日 星期五

非洲紫羅蘭結果了!

公司很多同事都種非洲紫羅蘭,品種繁多,十根指頭數不清.


偶爾有同事浸了葉片繁殖,又半途而廢,我或許會收養過來,用果凍膠杯由黃豆大的葉仔種起.


可能我的位置燈光充足,植物生長快速,往往只是幼兒期,就已長出花苞.以我這個經常忘記澆水的人,終日等到人家葉子也變成軟腳蟹,才曉得去灑水.


奇蹟的是,灑過水後,葉子又再堅挺,花兒仍舊照開無誤.



2010年4月15日 星期四

Bibi隨筆 - 我家的蜂 (21/05/2004)

唔知大家有冇養蜜蜂既經驗呢?又或者有冇實地見過蜂巢入面係點既呢?

你地都知我屋企有個搞鬼爸爸架啦...佢真係乜都玩一餐架.

以下就係Bibi以前既一篇隨筆,提到呢次養蜂事件既,因為唔算係d咩功課,所以我都冇要求佢d字寫得好好,你地或者睇唔明都未定:


2010年4月14日 星期三

韓國零嘴

韓國食品節又黎啦!唔買下野點係我吖...


韓國麵食貴咗好多,尤其係我地幾鍾意食既薯仔麵,以前1kg都只係十幾蚊,舊年要廿幾我已經覺得好唔抵架啦,依家竟然要卅幾,罷買!


反而樂天既食品,就唔貴,呢款牛奶夾心朱古力,都只係$7.9唧.一個字,滑!但可惜我嗅覺同味覺都比較靈敏,我食得出包庄袋入面既紙兜既氣味呀,扣晒分添!



呢隻唔駛問呀貴,果仁喎,我梗鍾意啦!$10.9兩盒呀.



呢款都係有鹽粒既朱古力黎,叫做銀座果子焦糖朱古力,五個大洋一牌咋!



呢款朱古力百力滋就十蚊三盒,咁就梗冇係工展會買咁平架啦.而且,佢入面唔係錫紙袋,係膠袋包庄既.我個人認為呢,百力滋始終都係固力果好食d既,樂天咩?佢中間果條餅乾唔係幾得呀,在我黎講,佢點算係百力滋唧?百力滋唔係咁味架!



呢款杏仁脆片就正咯,一盒有八件,獨立包庄,只係$9.9,但品質,味道同口感就有幾百蚊盒日本禮盒餅食既質素,後悔買得少,週末專登再去,都買唔到咯.



打開入面係咁既,同包庄盒面咁上下樣



入面就走樣啦,打開,d朱古力漿唔係S形既,但實在係真正朱古力黎,所以比起普通忌廉正得多!如果大家去韓國旅行,不妨買呢隻餅餅黎做手信吖,唔錯架.



雞泡魚乾,有辣有唔辣,我呢包唔辣,但就有一兜仔辣醬奉送.雖然只係$10.9,都唔好味既...完全唔係我食開果d日本雞泡魚乾既味道呀,又硬又冇味..我食開果d好厚身,比較鬆身,而且係有味道架.



都想買紫菜架,我鍾意有鹽粒係面果種,但Bibi唔係好食,而且又唔係好抵,所以冇買.


2010年4月13日 星期二

帶鬼飲茶去@怡翠軒

週末,放工約咗印度婆婆兩母子同埋我老闆一齊去飲茶,今次我地去怡翠軒。


平日黎食飯,係冇乜點心既,但今日,真係意想不到咁多款式呀!我冇影到相呀,係佢地面前就費事做d咁既怪異行為啦。


我當然俾咗一抽零食佢地做伴手禮啦,加埋一盒迷你朱古力做母親節禮物,夠晒識做啦掛!


婆婆亦都好有我心,帶咗盒黑加侖子茶俾我.



仲有佢親手做既潤唇膏添!



四個人,叫


竹笙素粉果 $14.8 :我冇食,見到入面d材料都琢得細細既,應該OK


五柳炸雲吞 $14.8 :我冇食,d鬼鍾意食熱氣野我先叫既


XO醬炒蘿蔔糕 $36:蘿蔔糕本身質感唔錯,面頭仲鋪咗d韭菜同銀芽


水晶鮮蝦餃 $36 :味道同質感都好好


鮮蝦腐皮卷 $33 :意想不到地好


鮑魚滑燒賣 $38 :同一般燒賣差唔多,只係面頭多咗一粒鮑魚丁唧


鮑魚汁炆鳳爪 $38 :我老花見到鳳爪就剔,其實我地只係想食豉汁鳳爪,呢款對婆婆黎講,太硬。一碟有六隻,仲有d花生添,終於我都係打包算啦.


荷香珍珠雞 $28 :一般水準啦


鮮蝦白菜餃 $28 :同蝦蛟咁上下,但只有三隻,所以都係差唔多錢唧


蠔皇叉燒包 $24 :好細個既叉燒包,包皮同餡既比例都好好


雞絲脆春卷 $17 :味道一般啦


脆皮燒腩仔 $48 :呢碟係全餐茶最抵食既,拎住$48去燒臘檔買到d咩靚燒肉吖?但呢碟就係貨真價實既燒腩仔啦,正到極!


桂花龍鬚蛋散 $38 :蛋散大家都知咩味架啦,咪有少少糖膠同芝麻係面咯,但佢就加咗一大堆七彩既棉花糖絲係側邊,d鬼又係鍾意既


茶錢 十三蚊位


兩枝青島啤酒


 


我去到,見俾咗門口果張四方細檯我地,已經唔係幾高興架啦,可能因為我d朋友到先,洽佢地係鬼啦,鬼叫我最遲先出現咩。第一碟上檯既竟然係蛋散喎!有冇搞錯呀?果位侍應都知唔妥,問我介唔介意黎咗甜品先?我梗係話介意啦,佢就拎返入廚房啦。d點心陸續上檯,張檯又咁細,你地都估到邊有位擺野吖。


佢地原則上有換碟服務既,我叫佢上埋碟蛋散之後,就有人幫我同我老闆換咗碟啦,另兩位仲食緊野,佢地唔換住都唔緊要。後來竟然要我逐一開口,佢地先識為婆婆同佢呀仔換碟。


埋單$593,下午茶黎講,都算貴啦。我上次同爸爸既同學仔去荃灣飲茶,十大一細,都唔駛五百蚊。