嬸嬸又有好野醒我，肥大既薑一舊．
問佢幾多錢，想話俾返佢．
佢話：唔駛啦，唔駛錢架，係我個靚爆鏡既工人姐姐買餸時人地俾架！
美人計．．．．實在太勁啦！
2011年8月30日 星期二
2011年8月29日 星期一
黄花紅酒醉龍華
沙田龍華，都算係香港人既集體回憶黎．
龍華係1950年開業既，原來佢係現今香港唯一一間，有酒店牌照而又冇提供客房服務既酒店黎．
當年風光時期，都唔係人人住得起龍華大酒店架（最早期租二十蚊一晚，後來升到五六十蚊一晚，連李小龍係度拍戲，都住唔起）．
馳名既乳鴿賣成四蚊一只，亦都唔係人人食得起．事關四蚊已經係一個人一星期既伙食費啦．
我七幾年有幸初嚐佢地既乳鴿，覺得非常美味，燒乳鴿同滷乳鴿都相當出色．後尾大家姐懂得去街市訂購新鮮乳鴿返黎自己煮，就食佢整既得啦！
呢本書除咗講歷來龍華既變遷外，亦載有多款龍華美饌．大家可以試試，變出新花款．
呢度有款金桔蒸魚雲，可以參考一下：
材料：大魚頭一個
醃料：鹽，胡椒粉，生粉，紹酒，生抽各少許
配料：鹹金桔２粒，青紅辣椒粒及蔥粒適量
做法：
１．大魚頭斬件，用醃料醃３０分鐘
２．切碎鹹金桔，與青紅椒粒及魚頭拌勻．
３．大火蒸八分鐘，取出後加蔥及淋上少許生抽即可．
我覺得有疑點，醃魚頭及加入鹹金桔同椒粒去蒸，應該冇問題．但蒸完只加蔥及生抽，冇話加滾油既？我知魚頭會有油滲出，但見佢幅相既樣子，好明顯係連油都唔多滴架喎？
2011年8月28日 星期日
2011年8月26日 星期五
2011年8月25日 星期四
2011年8月24日 星期三
2011年8月23日 星期二
午間小聚之公仔包
上星期六, 我地去pri屋企拆屋, 先黎做一個意大利香草包.
大廚出馬, 今次負責最後工序既係芳齡歲半既Momo師父!
先掃上橄欖油, 再灑上香草, 鹽及蒜粉. 再用佢既二指神功, 同個包加返d酒凹.
新鮮出爐, 香噴噴.
好多謝屋主醒我一大舊發好咗既麵糰, 等我可以做公仔包.
我好無恥地一早就要求又食又拎架啦.
我未做過包, 所以唔清楚麵糰既觸感係點既, 唯有諗起乜就整乜啦.
係醒麵期間, 有d配件甩咗, 所以做出黎既成品有d變咗怪物.
好彩都有d見得人既, Momo就有慧眼啦, 佢揀咗上面隻蟹.
其實烏龜都唔差架, 起碼手手腳腳, 有頭有尾, 樣樣齊吖麻.
呢隻甩鼻豬好彩甩唔晒, 仲keep到個豬樣, 蝴蝶呢, 相信大家都睇得出掛?
因為盡量唔想用咁多朱古力, 所以做咗d冇眼珠既豬.
pri一早就整定既檸檬撻, Momo讚不絕口, 繁繁encore. 我都想打包一件走架, 但山長水遠, 帶呢d凍品返去, 實唔掂啦.
小插曲呢, 都有架, 因為Momo百厭, 係梳化四頭tun, 終於叉錯腳, 跌咗落琴底.
佢梗有喊啦, 但係當師奶撈返佢上黎, 拎住罐蜜桃茶同佢講: 俾你飲一啖好冇?
立即止咳, 快過打針呀!
今次要鄭重多謝人地老公, 除咗協助pri招呼大家之外, 亦冇嫌我地唔通氣, 食完下午茶都唔走, 霸住佢老婆不特止, 仲留低咗一大堆碗係廚房, 就拍下law pad走人.
2011年8月21日 星期日
廢物利用之 - 給八達通一個舒適的家
又收到一批差ｄ要俾人掟去堆填區既物料，就係呢ｄ原色既帆布啦：
佢長十寸半，三寸四分高．本身已圍成一圈車埋咗個口（見唔見？間尺壓住果塊就係後面）．基本上縫好底部，加上拉鍊，已經係一個靚靚仔仔既筆袋/工具袋啦．若然嫌佢長得滯，自行改短ｄ亦得．佢本身既圖案都算幾有型格，保留佢都唔錯架，男女合用．
或者大家將佢改成短果邊開口做眼鏡袋，手機袋或其他用途既袋都得架．就一就ｄ位，相信做返個小小散子包或者口金都冇問題．
今次，我就示範點用呢ｄ材料做八達通套啦．
首先拆開後面條埋口線，一條布條足夠做兩間豪宅俾兩張八達通用架啦．剪完兩條，中間仲有一忽布剩添！
你地記住喎，要熨過塊布先開始摺同縫喎．我求其示範下，就費事熨啦．
我咁鬼懶，梗係用懶人大法去做啦，我好求其咁摺一下冇鈒骨果一條邊．
再覆上去摺一下
將有鈒骨既一條邊又覆落黎
就係咁啦，明冇？我ｄ位係求其預既，你地做果陣自已認真ｄ度下位啦．我覺得呢條紅藍邊都幾靚，所以我用返佢．
如果唔鍾意佢咯喎，反轉塊布黎用都一樣架咋．
跟住搵自己喜歡既圖，用布用印台黎蓋印．靚哩．．．咁就外面一定冇得賣啦！May姨出品，人地一眼就認到啦．
小矮人都唔錯，可以用黎印下，記住印完，等佢乾透就要用張抹手紙墊底，將圖案有墨果面向住抹手紙，再用熨斗係布上熨下，確保日後ｄ墨濕咗水都不脫色．
想懶都要知步驟，至會做得快靚正架，用一條深色既線行住塊布黎定位啦，咁樣做出黎既邊位先會既平整又就手架．
至於用咩線黎縫合呢？大家其實用咩色線都得既，咁繡花線就梗係會靚ｄ啦．但我就係原身既布上抽條線黎用就算啦，呢ｄ叫羊毛出自羊身上呀！
仔細ｄ用毛氈針步縫合，唔好咁大針喎，條邊咁短，都好快縫好既唧．
整好一條邊啦，幾整齊．
縫埋另一條邊就做好架啦．
跟住拆返條深色線（呢條線係可以循環再用既）
正面係咁既．
擰去背面，將塊掩反起，就可以放八達通入去．
反番正塊掩就搞掂晒，係咪好簡單呢？我唔做咁多裝飾啦，等你地自己發揮下你地既小宇宙啦．
拿，亦可以有另一個摺法既
如果係咁款既話，條鈒骨邊就應該咁放既，但要記住喎，咁做既話，張八達通就有跌出黎既機會，大家應該係開口位，套張八達通入去既左右兩邊，mark返一兩針，令開口位變相收窄，咁就唔易跌出黎，亦可以順利套張八達通入去啦．
唔整多個俾你地睇啦，家陣我拎起枝針成擔重架，如果唔係要示範俾大家睇，我都唔會勉為其難做一次啦．
喜愛手作既朋友，你地都可以用自己做出黎既印仔或自己買既印仔，做返個啱心水既八達通套架，送禮自奉都咁合適架．
仲有，你地亦可以保留原身既圖案，做一個長少少既套，用黎放手機都得架．
若然我仲未分晒出去既話，歡迎大家私人留言索取，只要寄上一張清楚列明你既回郵地址既紙（方便我直接貼係信封上），連同一個$2.20既票郵，我就會用環保信封寄兩條第一幅相上既布條俾你架啦．
訂閱：
文章 (Atom)