2008年10月31日 星期五

Sweet Sweet 的感覺 V

可有想過蛋糕也可以慶節呢?



“快高長大”夜光士多啤梨忌廉蛋糕,以鮮忌廉圈配士多啤梨果占圍邊,加粉紅心心T-shirt圖案。(一大一小的奶嘴,母女平安啊!)



圓形金箔朱古力蛋糕,飾以車厘子糖粒,配以香芒球及車厘子。



圓形香芒忌廉雜果蛋糕,以開邊士多啤梨及蜜桃片圍邊,中心配蜜瓜及哈蜜瓜球,綴以香芒卷。



聖誕老人栗子蛋糕,配蜜瓜球及巧克力.呢個係我最鍾意既蛋糕黎,多謝雯雯送俾我既聖誕老人,令呢個蛋糕生色不少。(佢做咗好多失明既聖誕老人,全部拎晒返黎俾我同佢地施手術.大家睇下,我同聖誕老人做既眼科手術幾成功!我只係收咗一個做手術費咋,夠靚仔卦!)


2008年10月30日 星期四

整定係你啦!

唔嫁又嫁,江湖救急,終於又賣咗一個蛋糕俾人,算啦,一切都係整定既。


上星期做咗兩個蛋糕出黎,一個諗住昨日放假同朋友一齊玩,送俾佢預祝佢月尾生日既,另一個就手多多做咗出黎。點知又有同事昨日送短訊黎話佢星期六有朋友生日,問我依家仲有冇接訂單?


老實講吖,我發現佢既短訊果陣都已經好夜啦,真係對唔住啦,就算我肯開工做俾你,都趕唔切乾啦。


唯有拎咗果個新貨返公司,睇下佢滿唔滿意啦。又咁啱得咁橋(返到公司就梗係要先處理昨日放假入黎既信件同電郵架啦),其中一封昨日收到既信,係奧比斯寄黎既捐款表格。咁順理成章,老老實實咁同人講:「要做一個新既蛋糕俾你,就真係無能為力啦,但我上星期做咗一個現貨係度,不如你過黎睇下啱唔啱心水啦,如果唔啱,就幫你唔到啦。拿!私人醒,俾埋張迷你卡你做配套。」好彩,人地都肯收貨,咁我就順便俾埋張捐款單佢,功德圓滿!


多謝晒!



教我粘土既老師話,如果做公仔,做出黎既野會似返果個人,希望大家都鍾意我做既野,唔好有人pad埋一邊唔要就好啦.


2008年10月29日 星期三

放假一天

今日雖然要繼續做盲俠,都無減我放假既興緻.公司既嬸嬸又放病假,又唔想咁衰叫隔離位幫我老闆洗杯,既然我都係去西港城後面間寶湖金宴飲茶唧,咁我就先返公司,同我老闆倒滿佢個水壺同換埋茶,又順便覆埋d醫貓先去飲茶啦.


四個人叫咗一碗生滾東星斑粥,一碗生滾滑雞粥,炸倆,鮮蝦菠菜餃,腐皮千層夾,潮州粉果,都只係$90咋!


飲完茶,我地先去專營日本食品既代理字號掃零食,我買咗一大包芥辣豆同三排朱古力豆,另外既朋友亦唔弱,都有戰利品.但果d所謂芥辣軟糖就真係呃鬼,一dwashabi feel都冇!


係朋友屋企坐下,再係佢樓下間茶餐廳食咗豬扒炒烏冬同菜遠排骨炒河,跟住就駕車去迪欣湖逛下.影下相咁,目的只係hea下唧.



我唔識整返正張相添!收貨啦.


朋友係迪迪尼禮品店買咗兩個袋,跟住就去咗迪迪尼酒店行下,又去咗個公主洗手間,之後我就同佢地講:我地已經感受到公主既”部分”生活啦!


都知果個冇乜方向感又冇記性既假日司機唔係幾靠得住,我地差唔多預咗一粒鐘俾佢駕車去諾富特東薈城酒店(佢終於都係要亂兜先兜到去),因為我地打算係果間Essence食buffet.



我一向都唔係搏命既人,所以都係好隨意既.先飲碗人蔘雞湯,食幾片魚生,少少茄子,一串雞串,兩個面包仔,又走去叫人淥咗dd金邊粉加咗一粒蟹籽丸同菜,不過都冇食晒d粉.抖一抖,再出去掃甜品.



睇得過既都拎上黎試下,結論係:Tiramisu係可以既,木糠布丁都ok,果粒四方芝士蛋糕仔係得既,朱古力puff好味,最好味既係朱古力慕司,士多啤梨慕司都唔錯.


仲食唔食好呢?大家都話要抖抖先,一個話要去下洗手間,一個就話要去除皮帶.


好!我再出去巡下,見到有新鮮窩夫,又整件,d芒果汁好味喎,同窩夫好夾!


除完皮帶果個同我一齊沖杯茶之後,就話要去拎甜品,我就部佢出去,限定佢既份量同品種,唔好食咁多無謂野.


跟住....


又出事啦,我又走去拎多件窩夫.哈哈!


噢!有人送我返屋企真係幸福啦!


2008年10月28日 星期二

一張特別的訂單 I

有一張美國的訂單,對方既要求係:我同d friends閒時愛打幾圈,可否為我做一個以麻雀為主題的蛋糕呢?


嗄!乜佢唔知個蛋糕好細既咩?佢唔係以為可以做到係個蛋糕上面擺個四方城吖麻?咁點好呢?我通常都會盡量符合人家的喜好同要求去設計架噃。我初初想推架,點整喎!玩呀?


首先,要解決技術上既問題:點做D咁細只既麻雀呢?


話就話我都叫做有打過麻雀,但除咗細個果陣有認認真真拎過幅麻雀黎當積木玩之外,我對呢樣野其實冇乜研究架喎。以前細個果陣,屋企副麻雀仲係好似豬油膏咁色既,我依家屋企就冇麻雀呢樣野啦。


依家d麻雀咪有兩層既,多數係一層綠色,一層白色,上面有字既。要做得似,就要知道呢兩層顏色既比例啦?考起!問d有間中打下牌既親戚,佢地話屋企都冇麻雀喎,至於比例係幾多,一時間又答我唔到。不過後尾我都係公司搵到個麻雀精,算叫做搵到料啦。


我冇諗過要做個大d既蛋糕去就d麻雀喎,所以,就決定唔放咁多啦。係咁意放三只最經典既牌算啦,即係「中、發、白」。(睇下粒AA電,都知我已經盡咗力啦。)



做好d牌之後,我都覺得幾滿意,而且一開始我都冇諗過搞得掂既,好彩唧。


中發白麻雀蛋糕,以香桃水晶糖粒及鮮忌廉圍邊,配蜜瓜球及士多啤梨喱粒。


Sweet Sweet 的感覺 IV


“Happy Valentine’s Day” 夜光圓形士多啤梨忌廉蛋糕,以鮮忌廉圈配士多啤梨果占圍邊,配紅粉心心圖案T-shirt。



“Happy Valentine’s Day” 心形芝娃娃朱古力蛋糕,配開邊士多啤梨及水晶啫喱粒。



“Happy Valentine’s Day” 鮮忌廉栗子蛋糕,配以栗子粒、奇異果片、蜜瓜片及粉紫玫瑰。


2008年10月27日 星期一

嫁入深山養牛去

這是三上亞希子的書啊!裏面有她親手繪畫的可愛插圖,包保不會悶蛋.





雖然線條簡單隨意,但郤有個人風格.





圖文並茂,其實是她的blog集結而成的.





可感受日本鄉間的樸素民風.




Sweet Sweet 的感覺 III


“Happy Valentine’s Day” 夜光心形檸檬忌廉蛋糕,以忌廉圈圍邊加檸檬果占圍邊,配粉紫玫瑰及蜜瓜片。



“Happy Valentine’s Day” 檸檬綠茶忌廉波浪形蛋糕,以車厘子圈圈圍邊,配甜蜜情侶小熊圖案。



“Kary & Edmond 9.1.2007” - 心形粉紅玫瑰士多啤梨忌廉結婚蛋糕配白朱古力碎碎。


2008年10月26日 星期日

Sweet Sweet 的感覺II


"Happy Valentine's Day"櫻花形忌廉蛋糕,飾以芒果玫瑰,以鮮忌廉圈及香橙水晶糖粒圍邊及心心檸檬軟糖.



“Happy Valentine’s Day” 圓形紅莓及藍莓忌廉蛋糕,配兩朵粉紫玫瑰,外加綠茶心心朱古力及香甜哈蜜瓜球。



"Happy Valentine’s Day” 夜光波浪形士多啤梨忌廉蛋糕,以鮮忌廉圈配士多啤梨果占圍邊,配甜蜜情侶小熊圖案。



“Happy Valentine’s Day” 圓形香芒忌廉蛋糕,以鮮忌廉圈配香橙水晶糖粒圍邊,加粉紫玫瑰。


2008年10月25日 星期六

金滿軒

今日休下晝,咪再去金滿軒食下午茶咯。


 


成兩點半先去到,要等四張檯先到我地,但都算快啦。未坐落,阿姐經過已經問定我地要咩茶啦,爸爸順口叫咗普洱。


 


因為一早就係外面睇定食乜,所以人地一執完檯,我已經可以落單啦,之後先有另一個侍應黎set餐具。我地點咗雜菌擔擔麵加蘿蔔絲酥餅同埋酸辣麵加高力豆沙。


 


冇耐,蘿蔔絲酥餅就上桌啦,我地一人一個。咬咗一啖,弊!唔記得咗影相添!算啦影少樣啦。都幾好味,仲熱熱地。


 


d麵未到,高力豆沙又出場啦。嘩!個樣好靚呀,我地又一人一舊,用筷子督住。哎吔!又唔記得影相喎!tun返只筷子出黎,有個窿添!搞到人地毀咗容,唔好咁衰影人啦。好,又唔影住。


 


咁影住個下午茶餐單先啦,大家睇下,係咪好抵呢?


 



$23一客咋!


 



咁如果唔想食下午茶, 都可以考慮下食有埋湯既客飯既。


 


爸爸碗擔擔麵先上,佢問我要唔要,咪啦,我一陣有酸辣麵食,就飲啖湯啦。咦!好似冇上次咁滾熱辣咁既?哎呀,又試冇影相,實俾華姐鬧啦!係咁意將頭先撥到亂晒既菰菰夾返兩件上面,又夾返條菜上去,個樣好少少啦。Cheese,影到啦!收貨啦,盡咗力架啦。


 



人地好肚餓麻, 都唔係好肉酸唧。


 


爸爸食咗一半,我碗酸辣麵先出場,今次我醒啦,即刻影咗幅沙龍。係咪好得呢?只碗都起碼有八寸卦?咁大碗,都有d驚食唔晒。撩一撩佢,都唔係浪得虛名架喎,下面全部都係麵黎。食一啖先,熱到爭d食唔到,正呀!


 



 


食咗一大半,爸爸問我係咪食唔晒。


梗係啦!


如果你食唔晒,我幫你食d啦。


咁速速拎只碗黎啦。


 


分咗碗仔俾佢,我終於連d湯都清埋。超飽!


 




順手影埋佢另外時段既餐牌俾大家研究下啦。


 


跟住行咗一陣街,又走去聖安娜用埋張餅卡佢。依家佢改咗例啦,餅卡可以換咩都得啦。終於補咗$1.8,要咗六件馬仔兩條糯米卷一個綠茶南瓜包一個芝士火腿潛艇同埋一個提子包。好咯,終於都清張餅卡,成日袋住,都冇人肯捱義氣食佢。


 



拎到返屋企,d包都冇變形喎,順手影埋佢比大家睇。


2008年10月24日 星期五

Sweet Sweet 的感覺 I

與大家分享早期的手作,全部都糕糕有主架啦,亦都多謝曾經向奧比斯捐咗善款既朋友!


心形既大概細過一寸少少,要視乎當時力水。


圓形既,就多數1.5-1.8cm啦。


至於其他形狀既,大極都係一寸多少少既唧。


所以,大家目前見到既已經係放大咗少少架啦。



“Happy Valentine's Day” 夜光心形香芒忌廉蛋糕,以鮮忌廉圈配士多啤梨果占圍邊,加白波點T-shirt圖案。



"Happy Valentine’s Day” 咖啡忌廉蛋糕,以鮮忌廉圈及香橙水晶糖粒圍邊,配小熊圖案。



“Love to Uncle John Bibi and June” (呢個蛋糕係June June媽媽訂既)香芒朱古力蛋糕,以香芒球圍邊,飾以粉橙玫瑰。


好趁Lunch Time去Shopping

今日約好咗唔帶飯,我地幾個又去ABC買野食。


首先要搵地方食飯,我知道結志街都有幾間食野既地方,一於去睇下先。


點知蘭方園又多人,Annie又話唔要食粉,行行下就入咗街市範圍啦。都唔知邊度打邊度,咦!九龍醬園喎,原來係度。又見到有好大粒花生賣,一陣返轉頭買先。又再行入d,有間麵廠喎,梗係乜都有得賣啦,又有雜貨鋪…。佢地一路口翕翕話:「要抬喎,要抬喎。」


跟住又行前d,轉彎又有幾間食店,有間馬來咖哩屋,裝下,又好似幾好喎,set lunch只係$35唧,有飲品加埋湯或者甜品。我要咖哩雞、Candy要咖哩牛腩、Annie要香茅豬扒,我地全部都係要例湯:竹蔗甘筍排骨湯。有少少失望,都唔辣既!湯好夠熱,但冇乜味。我杯奶茶就麻麻,始終都唔係茶餐廳feel,但佢地兩個就話杯檸茶同檸水裏面既檸檬幾靚,冇苦澀味,又夠酸。


食完,一點七唧,先買斤珠豆,再去頭先經過果間麵廠買斤蝦子麵,然後去ABC買野食。又買唔到雞尾飽,連蛋撻都要等。咁算啦,我淨要鳥結糖同合桃酥啦,佢地兩個就有買其他包既。


仲有時間,屋企枝有機豉油就快食晒,想去八珍買豉油。我揀咗枝$27既濃釀生抽,好細枝架咋,我諗應該好味卦。佢地話下次去City Super買頤和園試下喎!


2008年10月23日 星期四

一級靚花菰

冇得學雜貨, 海味, 少少地, 學人整下花菰都好啦!





居然有人話呢d係屎.... 太大打擊啦!





紋要幼細, 先似架, 逐粒鉗住黎油 (唔鉗實會飛咗出街), 辛苦就唔在講啦. 未油晒, 手指已經因為長期繃緊而僵硬, 仲痛咗好耐.





等緊 "曬" 乾! 鏡頭遠景果d就同實物差唔多大啦.





我比較醃尖, 見唔見到呀? 反轉只花菰係有少少冬菰蒂既. 個膠袋係新畫筆果條包裝袋黎.





哈哈! 呢d就係我今年母親節時送俾家姐同嫂嫂(每人一斤頂級靚花菰)既母親節禮物啦! (一定要盡量做細d, 搏佢地老花唔夠眼, 用埋放大鏡都搵唔到破綻!)


你地見到既, 已經比實物大好多好架啦, 人手邊有咁大隻吖, 你估我係姚明咩!


2008年10月22日 星期三

ok上海菜

上星期日,去屯門圖書館睇睇下書,爸爸話個肚打鼓喎,就同佢出去搵食啦。


好似華都花園果頭有間上海野架喎,咪試下去睇下有冇位咯。去到金滿軒即刻有位,原本係要坐大檯既(果度係有得搭檯既),但後尾有張細檯埋單,我地就去咗細檯坐啦。


雖然有客飯食,亦有素菜既款式,但爸爸一心要食蒸素菜包($23四只),又話想食蒸素餃喎,咁點食得咁多呀?我又想食上海粗炒喎($32)。仲爭十五分鐘先到下午茶時間,於是就先點素菜包同粗炒,等到夠鐘再叫多個下午茶餐。粗炒先上桌,味道、熱度都ok,唔太油,係粗炒墊底,上面鋪白菜仔、黃芽白、冬菰絲、肉絲炒出黎既一堆材料,可以好輕易抽到碗淨麵俾爸爸食。到兩點啦,我地又再點雜菌擔擔麵加炸饅頭($23)。素菜包出場,的的式式,水準一般啦。


下午茶餐真係抵食,係A+B組合黎。即係自選一碗主食(如擔擔麵、上海湯麵、油豆腐粉絲湯、酸辣麵之類)加一客煎窩貼、饅頭、高力豆沙之類既上海小吃。兩項都有成六款俾你揀,一時間都唔係好記得有乜。我仲以為下午茶既份量會好細添。點知黎到碗擔擔麵係好大碗架,如果一個女仔諗住食少少野去點呢個下午茶,要再食埋個小吃,一定食唔晒。麵條好夠彈牙,湯又夠熱,微辣,都幾好味,仲有好多花生碎,雜菌係鮮貨黎,連草菰,磨菰都係新鮮既,好夠誠意。


其實呢度尚有其他款既下午茶選擇,因為我地都唔會食咁多野,所以冇詳細睇啦。下次一定要帶舅母或者三姨黎試下。呢度一至五茶錢三蚊,週末假日就五蚊位,收埋加一,價錢尚算合理。


老實講,呢度既出品都唔係太差,只係做包點既皮,即係饅頭之類既發麵功夫仲爭少少,但整體黎講都ok架啦。


2008年10月21日 星期二

「感謝你,大五郎」




無意間在圖書館找到這本「感謝你,大五郎」,被封面的一幀小猴子照片吸引,隨意的翻一翻,啊!確是動物版的「五體不滿足」啊。


這不是講述地球公害對動物造成影響的控訴,而是透過天生嚴重殘障的大五郎為生存而努力的種種事跡,帶出他為大谷家各成員帶來的深邃影響及意義。


除了珍貴溫馨的家庭生活照外,簡潔的文字亦是令人可以一口氣讀完的動力。





大五郎和小姊姊








 


2008年10月20日 星期一

可以的話,我情願做小一點的

在街上看到的粘土壽司都比較大,我郤喜歡小的.看看兩年前的小手作吧:



魚翅壽司



鰻魚壽司



蝦壽司



魚子壽司



小飯糰



三文魚壽司



吞拿魚壽司



海膽壽司


還有玉子壽司,粟米,北寄貝,中華沙律(即海藻),八爪魚,三色軍艦壽司等各款口味(照片不小心刪除了),差不多被各路英雄打劫一空,又懶得再做,所以沒有存貨了.