整定係你啦！

唔嫁又嫁，江湖救急，終於又賣咗一個蛋糕俾人，算啦，一切都係整定既。

上星期做咗兩個蛋糕出黎，一個諗住昨日放假同朋友一齊玩，送俾佢預祝佢月尾生日既，另一個就手多多做咗出黎。點知又有同事昨日送短訊黎話佢星期六有朋友生日，問我依家仲有冇接訂單？

老實講吖，我發現佢既短訊果陣都已經好夜啦，真係對唔住啦，就算我肯開工做俾你，都趕唔切乾啦。

唯有拎咗果個新貨返公司，睇下佢滿唔滿意啦。又咁啱得咁橋（返到公司就梗係要先處理昨日放假入黎既信件同電郵架啦），其中一封昨日收到既信，係奧比斯寄黎既捐款表格。咁順理成章，老老實實咁同人講：「要做一個新既蛋糕俾你，就真係無能為力啦，但我上星期做咗一個現貨係度，不如你過黎睇下啱唔啱心水啦，如果唔啱，就幫你唔到啦。拿！私人醒，俾埋張迷你卡你做配套。」好彩，人地都肯收貨，咁我就順便俾埋張捐款單佢，功德圓滿！

多謝晒！

教我粘土既老師話，如果做公仔，做出黎既野會似返果個人，希望大家都鍾意我做既野，唔好有人pad埋一邊唔要就好啦．