南北杏蜜棗雪耳煲豬展

點解要教你煲呢個湯呀？

因為我想你學曉點處理雪耳．

拿，雪耳就好平既，兩三個人飲既話，一球咁大（約三寸直徑）都夠架啦．唔好貪白雪雪呀，黃黃地先係冇漂染過既．市面仲有一款係鬆散ｄ樣既，果款比較易腍，用黎做糖水會好ｄ，煲湯既話，都係要耐火ｄ好ｄ．

用清水浸佢，好快就會發漲．要浸幾耐？半個鐘都差唔多會漲晒架啦，咁都要視乎你買既雪耳靚唔靚架．只要你用既係凍水，就算你唔記得咗，浸咗幾粒鐘都唔會有事既．

你睇！大咗幾多．

浸大咗之後，反身睇下，見唔見到個底呀？中間深黃色既係應該剪走佢既，係咪唔食得？唔係，只係呢度比較硬同埋會有少許樹皮之類既殘骸，剪走佢會好ｄ．

浸腍咗就好易剪出黎架啦．

剪走之後就係咁既：

沖洗一下，就咁用手都可以搣成一小叢，一小叢．

即係咁啦：

果皮一角，先浸軟，刮去內層既囊先用，咁就唔濕熱啦．

瑤柱浸軟，跟手拆成絲，瑤柱水可以稍後加埋入ｄ湯度煮．

買豬展呢，前展（即前足）會細條ｄ，買兩舊啦；如果後展（即後足）就會大舊ｄ，一舊都得啦．

我呢舊成磅幾架，好夠咯．

沖洗之後，可以拖拖水先拎黎煲，但唔拖都唔係好大問題，事關豬展既血水亦唔多．ｄ湯滾緊果陣，用湯勺片走浮面既泡泡就得啦．

有人喜歡ｄ湯甜甜地，但我就唔多鍾意，所以只放一粒蜜棗．你地可以放兩粒既，洗洗就用得啦．

南北杏，落幾多？用中式湯匙量2-3匙，係咁意沖洗下佢啦．

步驟：

凍水放果皮，蜜棗，南北杏．

滾起就加豬展，瑤柱及瑤柱水．

用明火去煲既話，煲滾咗，改中細火煲一個鐘，再放雪耳煲多半粒鐘，加鹽調味就得啦．

用真空煲呢，煲滾咗，改中火煲十分鐘，放返入外殼度，一個鐘後拎出黎翻滾，再放雪耳，滾起煲多十分鐘，放返入外殼度，一個鐘後再拎出黎滾返，加鹽調味就得啦．（咁話得用真空煲就係要方便架啦，期間你鍾意放耐ｄ係殼入面都得既，出味ｄ唧．）

條豬筋我梗係留返俾Bibi食啦，我係偏心ｄ架啦．