除咗十蚊店之外，其實仲有好多家庭用品店既貨品都好多元化同抵買既．
今次，我就要同大家介紹下呢間係屯門蝴蝶村商場既抵記$7.8百貨啦．
係四月三號果日，我地一家三口去咗呢個商場度搵食，食完雲南米線／紅薯粉之後，就順便巡下領匯改革商場之後既店面．就係咁，發現咗呢間小店鋪！
話明係抵記$7.8百貨，咁所有貨品都應該係$7.8架，點知我問店員，佢話：係$6.8一件．
嗄？點解呢？原來呢日係感謝日，全店貨品減一蚊，優惠仲筍過吉之島．
嘩！即刻要認真ｄ睇下，仲有咩要買啦．Bibi就揀咗條腰帶，legging，改錯帶同好幾隻磁石布公仔．
而我呢，竟然搵到胭脂呀！我搵咗好耐架啦．我自己就唔化粧既，咁要胭脂黎做咩呢？
Hehe，我要黎幫我ｄ迷你壽桃化粧架麻，咁就唔駛打劫公司ｄ女同事啦．
我揀咗呢隻色，帶少少桃紅．
因為唔係用黎搽上面既，平平地玩下得啦．
但係，佢既構造一ｄ都唔差，仲連埋鏡同掃掃既添！
我就話用黎幫布公仔化粧都一樣得呀．$6.8咋喎，係咪抵？
另一樣東西呢，就係呢ｄ擦膠啦．都幾大塊，好厚身，唔知落刀順唔順既呢？
如果好用既話，佢咁厚身，真係可以連手柄都慳返呀．
我都係搏一鋪架咋，因為我少去果頭，雖然佢只係$6.8，一買就買兩舊，如果唔好用，就會好晒架啦．但係，如果佢好用既話，就算$7.8一塊，都仍然值得買既，事關坊間已經好難搵到我地用開果ｄ，十蚊店又平又大塊既雕刻用既擦膠啦．
我暫時未諗到雕乜圖案，所以未能為大家作產品測試報告，遲ｄ試用咗再同大家分享啦．
沒有留言:
張貼留言