爸爸：Bibi真係我既囡囡黎架！PG家長指引

有日下晝，爸爸打黎：「隻豬真係有我既遺傳架，佢頭先放學返黎，放低咗個膠袋，入面裝咗好多甲蟲架。仲叫我唔好整死佢地喎，因為佢聽日要重要拎返學校架。」

唔係啦掛？搞d咁野？

放工返到去，真係有好幾隻甲蟲呀，每隻兩厘米咁長啦。爸爸用d廁紙，浸d水，等佢地吸啜。

我：咦！你冇修生物架喎，你執呢d野返黎做咩呀？

Bibi：我鍾意捉呀，好易捉之麻，聽日拎返去俾Bio Group既同學咯。

我：做咩佢地自己唔拎呀？又要你拎。(因為咁啱最後果兩堂係我屋企樓下既哥爾夫球場上PE, 其他同學都一齊既.) 爸爸呀嗄，你聽朝幫佢裝好ｄ呀嗄，唔係一陣走緊隻出黎，我就暈低啦！

Bibi：走咗咪捉返咯，佢地又行得咁慢。

我：咦！做乜有條有機水果條開咗口架？

爸爸：原來佢地唔食架，早知就買啫哩俾佢地食啦。

我：駛唔駛咁好招呼呀？聽日都拎走啦，甲蟲唔食一日野唔會死既。

爸爸：唔知呢ｄ甲蟲係咪麥皮蟲變既呢？

Bibi：一定唔係呀！麥皮蟲變果ｄ係啡色架，呢ｄ係黑色架喎．

爸爸：咁你上網同我搵下佢地叫咩名啦．

我：啋你都傻呀！

我依家唯有希望，Bibi盡快拎走晒d甲蟲，爸爸唔好又去捉過d返黎，咁就好啦。