Bibi白汁螺絲粉

話晒Bibi之前都係冇乜入廚經驗既, 所以我都會盡量教巨整d唔駛太花功夫既菜式, 等佢多d成就感, 而且主打方便餐, 等佢日後讀大專可以有啖好食.

今次教佢整下白汁螺絲粉, 材料當然唔少得螺絲粉啦. 用加咗鹽既水煮腍, 過冷河備用

懶人首選, 免治豬肉 (再懶d就用腸仔/火腿粒粒代替都仲得)

新鮮粟米仔(即珍珠筍)

主角係呢款白汁磚, 一盒五人份量, 我通常一開就隔住個膠兜同佢解體先, 再係中間屈多下, 咁就變成十份, 方便日後使用, 事關雪硬咗就好實架啦. 認住d呢款白汁磚呀, 佢面頭係冇芝士圖案架, 冇咁漏架.

我以前都反覆試過用西式既麵粉,鹽同牛油去煮白汁, 亦試過用忌廉湯, 都係呢款最方便, 味道最標準, 而且份量易控制. (其實如果你經驗夠, 三個方法煮出黎都可以好好味既)

粟米仔切粒, 碎肉用豉油, 糖, 鹽調勻, 再加生粉撈下, 放唔放幾滴麻油同胡椒粉就隨你

先用油同薑起鑊, 炒散d肉, 加粟米仔(懶人就梗係冇拖過水啦)

加水(用滾水仲快呀), 二人份白汁磚(即係2/5盒), 煮滾

最怕食腍滋滋既意大利麵食, 所以螺絲粉會煮得硬硬地, 情願回鑊再加d滾水煮多陣, 都唔想腍得滯唔好食, d汁料一滾起就可以放d螺絲粉入去, 加d鹽添, 一路兜炒到佢收乾少少水

可以試下粉既硬度, 如果唔夠腍, 仲可以再加d滾水炒多陣架, 所以好少會失拖既. 拿, 依家試過, 都係硬得滯, 咪又放多半碗水去煮咯.

等d粉夠腍身又仲有少少彈牙, 味道又夠既話, 就可以收火上碟架啦, 其實要幾濕, 都係隨你既, 有d人鍾意濕d, 我地就鍾意有汁掛住係d粉度就夠, 唔乾唔濕咁款. 呢碟野好食到呢.....Bibi已經俾咗一百分自己啦.

同場加影爸爸雜豆湯, 佢係見乜落乜果類人黎架, 百合, 龍眼肉, 蜜棗, 果皮, 眉豆, 扁豆, 薏米, 茨實, 蓮子, 赤小豆, 淮山, 連黨蔘都夠膽死落架, 最怕有葯味既湯架啦.....

材料煲到腍晒, 佢係會連湯渣食晒既. 自從佢食咗素之後, 學懂咗珍惜食物, 如果以前... 冬瓜粒湯佢都敢淨要水, 唔肯食湯渣呀! 佢以前好抗拒食湯渣, 尤其係蕃茄薯仔紅蘿蔔湯呢d佢認為係cheap既湯水, 就更加唔鍾意飲. 好彩依家轉咗性, 冇咁嫌三嫌四咯.

咦? 點解d湯有少少油既? 係我用過只匙食螺絲粉黎, 所以有少少油沾到唧, 正常係冇油既, 飲果陣自己加鹽就得啦.