我大佬又追魂call啦：
八月十五是中秋，遠在廣州飲燒酒，月餅海味猶未見；不知承諾何時有？
我都知我地有個姪娶新抱, 但我呢個連回鄉証都冇既姑姐係免疫既!
我同Bibi商量，今次唔駛小黑咪幫手啦：
八月十五是中秋，知你果晚飲燒酒，命裏有時終須有；月餅海味心裏收！
八月十五是中秋，知你果晚飲燒酒，月餅海味心裏收；命裏無時莫強求！
都係寸得滯，所以改為：
八月十五是中秋，知你果晚飲燒酒，特種賀禮人人有；月餅海味莫強求！
p.s. 密切留意郵箱啦!
就係咁，我坐咗四晚苦工監，終於都做咗十六大個東東出黎。八個朱古力味, 八個咖啡味!
中間都出現咗d蝦碌野，因為要做過批細隻d既兔仔, 又冇材料係公司，用隔離位放咗係度三億五千萬年既粘土(已經去到粘手既階段啦, 其實就用唔到既, 我監硬整架咋)，利用一早未開工同食晏時間，做咗一批細只d既兔仔兵團，一心諗住夜晚上色啦。
朱古力色既係首輪做既.
今次sell花好月圓, 順便用埋d玫瑰仔.
放工返到去，即刻油咗d兔仔先整晚餐，如果唔係, 一陣就做唔到架啦. 點知一油就甩頭、甩尾、甩耳，好慘。又好難油得勻，後尾選擇沉咗只兔仔係兜金油度，再掃走多餘既油。即使係咁，都唔係隻隻用得返，有一半壯烈犧牲咗。
唔俾Starbucks專美, 我都做咖啡味!
油咗光油之後, 就更加金光閃閃啦.
向左走, 向右走, 俾個close-up, 都唔係太醜!
我都係星期四先整咗盒美心返屋企咋, 兩父女又爭食, 睇怕未到中秋都毀滅晒啦!
爸爸放學返黎, 食完飯切開個月餅做四舊, Bibi把握時機, 用牙籤拮月餅.
爸爸: 喂!
(咁Bibi咪以為佢話自己好揀蛋黃多果舊食咯, 咪拮過第二舊咯)
爸爸: 喂! 舊舊都你拮過啦....
Bibi: 喂! 一人兩舊架喎! 你食兩舊好啦..... 留返第日食啦....
我真係冇佢地咁好氣呀, 乜都爭.
P.S. 剛才又收到大佬電郵啦:
八月十五是中秋，
有人快活有人愁，
月餅海味講明冇，
叠埋心水點豉油！
佢梗係未收到郵件啦!
沒有留言:
張貼留言