廿零蚊三人分 - 鮮茄蘑菰燴肉碎

係中環，去買個兩餸飯盒都要廿五蚊啦，今次我整既三人份碟頭飯，都係咁上下錢唧！

材料有雞蛋兩隻（＄４），蛋黃橙色ｄ既係馬來西亞Omega 3愛心蛋（佢既蛋殼好厚，一睇就知有落足靚飼料餵養既），冇咁深色既係德清源既有機蛋

當然唔少得蕃茄（＄５，今次我用溫室蕃茄，吉之島星期三就＄8.8兩包，我仲用埋生日優惠，九五折），蘑菰片（＄４，我用咗半罐大蘑菰），蕃茄磚（＄４，十二蚊盒，一盒六粒，我用咗兩粒，梗係感謝日買定架啦），薑片同肉碎（＄１０）啦．

肉就梗係要用豉油，鹽，糖撈勻，再加粟粉搞搞佢啦．

先用油炒下ｄ蛋，隨意夾碎佢，畢起備用

用油爆下ｄ肉，炒散佢（加唔加蒜頭起鑊就隨你，有就當然好ｄ，但我屋企係冇呢ｄ野既）

加薑片，蕃茄，蘑菰片，炒幾炒先

再放蕃茄磚，兜下佢，加碗半至兩碗水（睇你鍾唔鍾意多汁）

滾起再煮一陣，等ｄ蕃茄煮透ｄ，加少少鹽，可以試味架

味道ｏｋ，就打少少獻，一茶匙粟粉混入兩湯匙水都夠架啦

加埋ｄ蛋入去，兜幾下，收火上碟．

我同Bibi一人一碟，ｄ餸堆到好似座山咁呀，加埋我個飯盒，真係飽飽啦！

見唔見到有糙米係ｄ飯飯度呀？口感幾好架．

同場加映，爸爸亂黎素湯一煲，佢咩都夠膽死落架，幾大塊果皮！

淮山，百合，南北，扁豆，赤小豆，加埋一包茶樹菰姬松茸既湯包，又另加多ｄ份量既眉豆，花生，茨實等，呢煲大啦，睇怕兩餐都飲唔晒呀！