蓮塘快閃：鮮匯潮味館、嘉鳴揚燒臘、森照肉菜街市、聚寶路露天市場、老北京香酥餅、老奶奶石磨坊

16/3/2024，等大不良收工，又由香園圍過關。今回我搭8號線到蓮塘站D口出，沿國威路行前少少到燈口過馬路，就到達今次第一個落腳點：鮮匯潮味館。

兩個人，點了二人餐：滷鵝、招牌湯、兩個主食，我選了撈粿條及蕃薯粥，¥90。碗湯係大碗既，只係拍攝角度問題先顯得細碗，因為我點咗粥，所以飲唔晒。

我哋掛住食，碟滷鵝食咗幾舊先識影相。招牌湯內有蛋餃、魚皮餃、豬腰、豬膶、肉片、芽菜、生菜、鵝紅、生菜、豬肉丸、墨魚丸等等，份量十足。蕃薯粥就一般，大家可以考慮要第二D主食，但這碗撈粿條就相當出色。熱辣辣，香噴噴。

下一站，就要去嘉鳴揚買白切雞，¥68。我竟然忘了用美團券，實在太失策。尤幸尚算好吃，下次可以再買。

再到森照肉菜街市買咗兩條潮式豬肉卷、半斤墨魚條及海魚餅，共¥96。

然後再去聚寶路附近的一個客家素食豆品檔買了¥10豆卜及¥5六個熱辣辣紅豆餡煎堆仔。當時好多人圍住個檔口買炸豆腐現場吃，我地當然都立即食兩個煎堆仔，唔好辜負佢啦。

然後再到聚寶路的露天街市買餸。我買咗¥17百香果(¥9斤)、¥34買咗蕃茄+西芹+玉豆+兒菜+菠菜、六粒人蔘果¥2.1、好大堆芫茜¥6.6。大不良愛死這黃色百香果，最愛加在橙汁內喝。我就用人蔘果燉湯，相當清甜好味。

呢一把芫茜，我一隻手都挪唔晒。

咁既份量，睇怕在香港買要廿蚊先得啦。

接著，到坳下村會一會這間老北京香酥餅，我好想嚐嚐他們的燒米糕¥3。

可惜燒米糕尚未出爐，我唯有買一個肉鬆咸包¥4(¥10三個)，一邊吃，一邊等燒米糕起鍋。未見有芝麻餅，它正在焗爐內修煉緊，緣慳一面。

燒米糕，¥3一個，¥10四個。新鮮出爐，熱辣辣，外面脆脆的，入面軟軟的，微甜。

爸爸形容燒米糕，不像兒時的冷糕，有點像不甜的白糖糕，但比白糖糕軟得多。

最後，在老奶奶石磨坊買了六個大饅頭¥6、一枝豆漿¥2。滿載而歸！翌日早上，我蒸熱饅頭，切幾片潮汕豬肉卷，煎香了加片芝士做中式漢堡，夠晒飽足。