考你耐性的數字油畫

從來都冇乜興趣玩數字油畫，只油過幾幅最細幅既漫畫版。印象中都要油好耐先油好，今次測試下自己有幾宅，就整咗幅對我黎講歷來最大既: 40cm x 50cm，仲大過A3紙，都唔知自己有冇恆心完成佢。

見到佢花哩花碌，都好懷疑自己既耐性。拎起手就揀咗隻好深色既黎開始油。其實咁係唔啱既，後尾都係乖乖地由最細既冧把開始油起。

最細既號數通常顏色較淺，所以油完都好似冇咩睇到咁。

油埋花心之後，開始有少少瞄頭啦。

吐血既係綠色既部份，油到眼花花。

油黎油去，都好似冇咩變化咁。

我用咗週末兩日去油，然後每日放工一食完飯就開工。

真係油到氣咳，都未見到D乜。

跟住星期六又去咗大半日工場，下午買完餸，處理好晒D野又繼續油。

好似愚公移山咁，油油下就會完成到架啦。

最緊要記住，每個色用時都先撩一pad去色碟度，用完再添，勤D洗筆洗碟，咁D顏色就會保持得好D，亦會易油D。

油到晚上收工，都油咗好多薰衣草架啦。

第二朝，一早就起身加油。

食完早餐又繼續

晚餐後，誓要今晚完成佢。自以為已經完成，原來仲有幾忽油漏咗。

補返好，成幅畫就係咁啦，估唔到都幾靚喎。

但只可以遠觀，千其咪近睇，免得睇到晒D線。

其實隨盒仲送埋保護油，要等乾透先可以油一層係面黎保護幅畫。