山葯豆

曾經見肥媽介紹過呢樣物種: 山葯豆

去街市見到有，就買包玩下。$20一包，都幾多下，唔知大小不良可否接受到，都係用半包算啦。

用黎煮唔知要幾耐先腍，咁我就先試下拎黎煲湯啦。大家要先沖一下，然後浸一陣，再沖洗，又再浸一下，當佢波子咁搓洗得架啦，唔會爛既。

一直換水好幾次，直至D水完全清澈，先叫洗好。因為會連皮食既，都係乾淨D好。

睇下，洗完之後，係咪都幾似一粒粒迷你薯仔呢?你估蒸飯時蒸埋得唔得吖拿? 咁樣熟咗拎黎當小食都應該唔錯喎。

我加咗南瓜、紅蘿蔔同排骨頭，睇怕唔放蜜棗都夠甜啦。

煲咗幾個字，我就夾黎食下。軟腍度近乎烚花生啦，已經可以接受架啦。食味似鮮淮山，亦都似芋仔。佢應該煲唔散既，咁由得佢繼續煲就得啦。

煲完既湯會比較濃，加上紅蘿蔔同南瓜既甜味，加少少鹽調味已經好夠，實在係一個唔錯既湯水黎。

P.S. 我大火煲咗10分鐘，轉中火煲咗45分鐘，再放返入真空煲外殼。