Keroppi正式登場

好啦，可以真係用粘土試做啦。

一粒青色加兩個小窩。

放上眼仔同面珠仔，畫埋個嘴就出咗世啦。

第一隻，好似麻麻地。

再做另一隻，係咪咁架?

第三隻，算叫啱比例啦，但眼珠好似大咗D喎。

等我上網搵下資料先.......，Keroppi and Friends呢套卡通片就可以幫到我啦。原來真係乜款都有架喎，高、矮、肥、瘦，粗眉、大眼、戴眼鏡、紮孖辮既都有。咁我呢D真係唔算太差咋喎。

第二日，再努力，先做一批眼仔。我打算做一家三口架嘛，梗係要有大有細啦。

瞳孔同面仔都要整定d係度。

呢D係彩色圖釘，放青蛙仔上去就多個實用性啦。

一家三口誕生了，但爸爸唔見咗枝紅筆，阿細冇得化妝住。

未返到公司，中途已被人攔途截劫，阿細變成孤兒仔啦。

因為要趕住送俾人(係，我一向唔殺到埋身都唔郁既。)，所以唔理得咁多架啦，都要即時諗計點搞好個presentation出街見人。

先預備一個禮盒，自己裁切墊底既棉。貪方便，我用咗神奇棉，易剪吖嘛。

養兵千日，一本雜誌上既化妝品目錄，大派用場。

安排合適字句，放埋幾隻青蛙仔上去，模擬一下完成既樣子。

剪埋出黎先，加蓋睇下，又好似幾work。

為了保存D字，我同佢封返膠面先，再將青蛙仔鑲上去。

放返入盒度，加埋蓋，就成為獨一無二既keroppi粉絲一定會鍾意既禮物啦。

咁多位街坊，唔好再打劫我，要欣賞就睇下呢度算啦。