金菰瘦肉味噌炆烏冬

係阿信屋可以買到呢款即食味噌湯，獨立包裝既。平日食飯盒，口糠糠，都可以用一包加滾水，沖出一大碗麵豉湯飲下，點都好過吉野家果啲咸到C既貨式。



我煮三包烏冬，加埋兩包金菰，用兩小包麵豉湯醬就夠啦。



金菰拆散沖淨，隔水備用。

烏冬三包，拆開包裝就得架啦。千其咪企圖用手拆散佢喎，會好易斷架。你放入鑊度煮果陣，遇熱再加上筷子就可以打鬆佢架啦。

瘦肉(懶既話買肉碎都得，甚至轉其他肉都冇問題架)你喜歡點切都得，加生抽、糖、鹽調味，再放少少粟粉黎醃下就得啦。

用油同蒜片起鑊

 

放瘦肉入鑊



炒散佢

再放金菰翻炒

因為係就咁用水沖洗金菰，好快就會見到水汪汪。



因為材料太多，我預先裝起一半料，先開始放味噌。就咁嗞一包入去，撈勻就得架啦。

跟住再放烏冬，用筷子打鬆佢

用筷子炒下，有力既就拋幾下鑊，好快就炒到全部均勻受熱架啦。(點先算好熱? 會出好多煙既，若然太乾都未夠熱，可以灑少少水架。)

我覺得應該夠味架啦，唔駛放鹽都得。如果你食開重口味，就自己加鹽啦。

深色既係海帶，唔係異物黎，放心食啦。

呢盒就係Bibi既糧餉啦。