爸爸的蝦碌事件簿
第一週
佢第一日開工，係我電話度留言話：「冇野，報平安唧，總算有驚無險啦。」原來佢開車唔記得閂閘，乘客又冇話佢喎。果陣仲好大雨，見到警告燈著咗，佢仲以為係有人打鐘，要下個站落車，到埋站先知自己衰咗。
爸爸一路食飯，一路忍唔住要講佢日間開工既野，我就要佢食完飯先講。佢話今朝爭d唔見咗個背囊，佢係廠度駕車去ｘｘ村巴士總站，跟住落車去站頭報到，返轉頭上車唔見咗個背囊，死啦，連工作證都冇埋，點算呢？唔係第一日返工就咁搞吖麻…？d師兄叫佢冷靜d，睇下自己衫袋先，原來個工作證係心口，但個背囊呢？哈哈！原來個傻佬上錯咗另一架巴士呀。
第二週
洗衣機停咗，爸爸去晾衫，發現件制服上有一撻撻墨跡，原來佢放埋枝原子筆入去洗呀~~~，佢淨識係度問點算，我二話不說，就即刻拎咗件衫去廁所，睇下洗唔洗得甩啦。用牙膏黎處理，基本上都得得地，但擦多兩擦，我對手就唔駛要啦，仲損咗添！後尾爸爸接力，件衫心口果撻已經冇咗，但衫領仲有一個烘。爸爸自己闖禍，就冇聲出啦，我仲咁幫佢，又受傷添，佢都唔敢點出聲啦。災情唔算嚴重，除咗爸爸既制服衫褲，只係一件粉紅色T-shirt、我個扯布環保袋同一兩件衫出事唧。
這就是我因工受傷的手
第二日，爸爸再塗好多牙膏係件衫度，過兩粒鐘先拎件制服去洗，果然得咗咯喎。咁等我都試下個環保袋得唔得先，這是我那歷劫後的環保袋．
好可憐，棉麻產品，洗極都洗唔甩，但爸爸既的確涼衫褲就冇晒墨跡啦．
第三週
太陽猛烈，爸爸學人戴黑超，點知有架私家車泊咗係巴士站，埋站時Hi到人地既倒後鏡，唯有即刻落車同人講唔好意思！但ｄ乘客全部都幫住佢：有冇搞錯呀，你咁搞，人地點埋站呀！
第四週
爸爸蝦碌事件又多一件，四件制服恤衫，其中一件人地俾錯咗女裝佢．唔怪得返屋企試衫果陣，寧寧舍舍有件著起黎細件咗啦！我地初初仲以為係車錯碼，但爸爸話有三件恤衫都夠著，唔肯拎返去換。我話到時你都要交返件衫出黎架喎，咁最後先交件女庄出去，你咪仲樣衰！
但係拖下拖下，搞到人地盤點添，冇得換制服住，直至令行通告為止．
