蛇年：竹報平安，富貴吉祥（二）

好，為咗實現蛇年大計，終需動手製作我既 1st Trial。暫時料好難預既，求其得啦，搓一d綠色既粘土先。



照做出竹節的模樣，鑲埋芽仔。

有長就梗係有短既。

大概咁上下啦:

做咗三枝短樁，一枝長樁。



併下先，都ok既。

可以繼續啦。

芽仔其實大大細細都係要返一樣既工序，冇得偷懶既。

初時諗住長樁起碼都八枝啦，所以整住八枝先。

咁就玩咗成晚，已經好夜啦，三短八長，都要收工啦。

芽仔都係整定好d既，第二日再做d芽仔先。

貨真對版

某日在康康見到呢款拉麵, $29.9兩包, 即管一試.



佢話拆開包庄, 將本身裝住麵既膠兜拎入微波爐度叮三分半鐘, 另外將醬料放入碗, 沖滾水成為湯, 再將加熱了的麵放入湯內.

整完就係咁款架啦:

 

係咪好對版呢?

味道亦不過不失, 麵質亦彈牙. 以急凍食品黎講, 以咁既價錢, 佢有九十分啦.

P.S. 家陣超市特價都要十七個幾架啦.

蛇年：竹報平安，富貴吉祥（一）

係FB見到有人整迷你富貴竹，都想整返棵，但我都係嫌大，係整都要整再細D既。

蛇年既年禮主題又未定，不如就整佢啦。但係懶人係冇葯醫既，唯一可以催逼到我既，就係時間無多。

拖拖下，就黎做唔切先肯郁手做實驗。我話晒都未整過，又未同富貴竹談過心，連佢實在係咩樣既，都唔係太清楚。上網搵咩? D相又唔係好夠仔細，睇唔到我要睇既部份。

算啦，咁就求求其其，對手鍊到咩樣就咩樣啦。

首先梗係要有碌竹啦，呢樣野，我都做得到既。求其拎粒青色粘土試下先!

加枝芽仔睇過，差不多啦。



咁點先可以砌到一盆富貴竹呢? 因為去到咁細，基本上人地既正常做法都唔啱我架啦。唯有自己度掂佢啦。

 

都考慮過要唔要做埋竹節架，富貴竹其實都有翠綠色同深綠色既，視乎不同品種啦。呢枝就淺色得滯，費事D家姐問我俾碌蔗佢地做乜啦。第時會做深色D既，等個竹節明顯D。

內膽我選用咗牙籤，好彩Bibi舊年住宿舍買咗盒一千枝既黎用，仲剩返細半盒。

我咁慳家，梗係一枝當兩枝用啦，長短樁包晒。

其實剪出黎既頭頭尾尾都可以有其他用途架，但費事儲咁多垃圾啦。

 

人地D迷你富貴竹係用飲珍珠奶茶既飲管做內膽既，我呢D超迷你既，用呢D 250ml 紙包飲品既飲管做應該差不多啦掛?

 

佢大約係枝工具捧咁粗啦。

拎D牙籤圍下，睇下可唔可行先。

 

嘩嗄! 乜要成十枝咁大食呀?

咁再做埋外圍咪 ......

真係希望工程喎 ......

係咪要縮沙整過第樣好D呢?

蒜醋

我家姐傳咗篇講關於蒜醋既文章黎俾我，話蒜頭浸醋，有助減肥、降血壓、預防糖尿病、治療關節炎、癌症、高血壓、糖尿病、發炎、傷風、流行性感冒、痴肥、失眠、暗瘡、通血管等等．

材料：473亳升米醋一瓶，蒜頭粒一斤去衣。

製法：把米醋分裝兩瓶(每瓶二百三十六點五亳升)，把蒜頭粒平均的分別放入兩瓶醋內，封蓋，放在陰涼的地方，浸二十日後才開始飲用。

服用方法：每一次一大茶匙，倒入杯中，用溫水或涼水稀釋飲服。早餐後一次，晚餐後一次.(不要空肚飲)。蒜頭味不好聞，可加蜂蜜飲用，飲完後，口腔會有甘甜．(若事後覺口中蒜味太大，可用粗鹽刷牙，粗鹽也可潔白牙齒．)飲第一次時可能有利尿情況，成日都要去小便，不過之後就正常了，大便也會順暢．

睇落好似幾簡單易做．幾個同事都有興趣做下呢個實驗，反正食大家唔壞既，我地一於試下．

一不做，二不休，嬸嬸派咗佢既工人姐姐出馬，幫我地搣咗四斤蒜頭返黎，分開每袋一斤，用密實袋封住．

 

信唔過中國既米醋，可以用平平地既美國醋，十零蚊枝，但都幾酸下．我地選用冇咁酸既日本醋．約廿蚊樽，原文話用４７３毫升搭一斤米醋既，呢樽只係５００百毫升唧，多少少唔怕啦．

我地用鎚仔隔住密實袋係咁意鎚爆ｄ蒜子



變成咁，最好擹佢十五分鐘，等ｄ蒜素可以有時間產生．

 

倒入樽度

 

再加米醋

 

呢個係早輪同事請食薑醋既大玻璃樽黎，一斤蒜頭加一樽醋都只係得咁多架咋．

兩斤蒜頭加兩枝醋既分量：



三斤蒜頭加三枝醋既分量：
 

四斤蒜頭加四枝醋既分量：



貼返張哩寶先！等廿日就可以開封啦．



我諗一個大樽係可以整到五斤蒜頭既，不過，我地又唔駛去到咁盡既．



浸咗一日，開始變藍色啦．

第三日，仲藍得緊要，如果唔係人地事先聲明會變藍色，真係俾佢嚇親呀！

第四日，都仍然好藍，因為係用唔同既手機影既，所以ｄ色有偏差，肉眼睇呢就同前一日一樣咁藍既．



22/1，顏色由藍氾綠啦，但仲係好深色，嬸嬸話擔心到28/1果日，都未變返冇色喎．

２８／１啦！可以剪彩咯！見唔見到Ｄ色墨綠Ｄ呢？

我地用個茶壺黎隔渣

再酙入原身既醋樽度，方便大家飲用．

飲一茶匙就夠架啦，我唔開水啦，就咁啪咗就飲返ｄ暖水．



味道如何？勁似點熏蹄食果ｄ醋咯，但就唔會太酸既．飲完之後，我就冇乜大反應，冇話利尿喎．但有男同事回報：話飲咗好舒暢，個肚仔冇谷住谷住咁．有冇咁勁呀？你估仙丹咩！

有皮越南腰果

越南腰果，一向都出名，只係香港人少D食唧。



而呢款呢，就至啱我心水啦! 事關佢係冇加調味既。

大家可能比較少見到有連皮既腰果賣，但呢款係可以連皮食既，都幾鬆脆架。

如果你師爺D，想捽甩D皮先食咩?亦都好易架咋。感覺上仲冇咁熱氣添!

計我話呢.... 若然大家怕肥，驚自己一下子食得太多既話。你選擇捽甩D皮黎食，就會食得慢D，咁一次過食十零粒都夠啦。又可以過下口癮，又唔會太肥。

呢隻腰果，我試過之後，就想再買黎請大家食。可借自從間店俾自由人攻陷之後，我已經好少去啦，只係再返轉頭買咗一次(都排咗八個字隊架)。俾身邊好幾位同事，一人一樽拎返屋企慢慢歎。

乜唔重咩? 重架，都成磅一樽既。但係食到好食既野，我就不期然想分俾大家。我費事大家食咗少少之後心思思想買啦，咪買埋俾佢地咯。

青汁

去年聖誕，收到呢份特別的禮物。



窩心既字條，體貼既選擇。可以淨化腸、臟纖體通便、抗氧美肌、排毒降火、束油去水!?咁勁?!



不過，佢用咁多種蔬菜成份組成



應該都好有營養既。



有同事係我面前飲過，佢話沖呢杯野會有好大既心理障礙。

好，等我沖杯黎試下先!

濃濁既青綠色液體，有少少草青氣味。

飲落去竟然係幾甜既，好似飲緊奇異果汁咁。算幾易入口，但記住，要用冷水或者室溫水去沖調，先至唔會破壞佢既營養同維他命架。

我係一個腸胃好敏感既人，但飲咗第二日都冇乜異樣，排便亦正常，呢款飲料應該係唔錯既。