有機店

逛吉之島超市，冇乜購物意欲，只買了這盒長柄士多啤梨．

跟住同爸爸買咗兩件Polo就閃啦，仲諗住即刻返屋企添．

點知俾我地見到呢間新開既店．

入面一個客都冇，有兩個老人家係門外裝裝下，我就同爸爸講，不如入去行個圈啦．

裏面可以講全部都係放心產品，唔係有機既，就係天然既食物同用品黎．雖然店仔細細，都夠我瀏覽一下架啦．

無患子，咩黎架？

首烏就大家都應該知有咩作用架啦，梗係黑髮用架啦．而無患子呢，原來佢既果實係含有天然淨菌素架．呢樽東東據聞係中性，乾性及白髮同毛髮稀疏專用既，一聽到會令頭髮逐漸變黑，爸爸就好想試啦！

每樽都有一粒無患子，俾大家見試下佢地真身係咩樣既．店員姐姐話：如果你儲到幾粒，可以放入廁所水箱入面，有清潔作用云云．唔知掉粒入爸爸個魚缸度會點呢可?

我地下晝返到屋企，都有即刻開黎試下，唔用焗油同護髮素，睇下咩效果．之後吹頭梳頭都幾順喎！

呢包咪即係方塊酥！都幾貴．獨立包庄，爸爸買黎做自己茶點喎．

呢包素肉鬆，其貌不揚，但原來係用竹鹽調味既，以非基因改造黃豆黎整，又冇防腐劑，咁就唔算貴啦．

呢一盒仔竹鹽，都幾貴下，佢含有天然礦物質同微量元素，爸爸工作出汗多，想加少少鹽入水度沖飲，補充下，唔用得幾多，其實仲抵過飲保礦力．

呢枝係濃縮百香果汁，咪即係熱情果咯！

出自陳稼莊農場

雖然佢加咗糖(有無糖款架，但我驚冇咁好味，但俾小朋友飲無糖就好ｄ)，但沖出黎唔係好甜架咋，好過買現成一盒盒果汁吖．

其實我ｎ年前都買過佢地既果醋架．

佢地咁有理念，都應該支持下既．

無添加呢三個字，真係可以買起我架．

唔知有加糖既果醋有幾難頂呢？我以前淨負責買，冇話過會負責飲架．

俾個貼士大家：價ｘ棧有時會有得賣，一定平ｄ．

原來港九新界都有好多間分店既，我入咗會架啦，本身有我手機既朋友，去開買野，如果俾錢果陣，人地問你係咪會員，你可以話係，只要提供我個手機號碼俾人核對就有九五折架啦．（店員話會員既屋企人都可以有優惠吖麻！）