我有做功課架，呢間店真係講得出條魚既任何部份都可以俾你點黎加落粥度食，但魚腸就唔會有啦，鬼得閒花咁多功夫服侍你咩? 不過，及第粥都唔錯架。
期間有段小插曲，爭D嚇親D街坊。
話說我早就打定主意食魚腩粥，貪佢夠簡單。點知一黎到，我食咗少少魚腩，然後食啖粥，一吞......，大鑊! 今次中伏，好明顯係鯁骨啦!
我同佢地講，我鯁骨添! 有人建議我即刻吞舊油炸鬼推走條骨，我就覺得都係拎出黎好D喎。但眾目睽睽，做D咁兒童不宜既動作可能引人不安，於是我就走咗出店外小巷啦。
我有嘗試去睇下拎唔拎到條骨出黎，後尾唔知佢係跣咗落去定攝住係喉嚨D摺位，好似冇感覺咯喎。跟住我就返入去繼續食野啦。
其實魚腩係連住背脊位既，都好多Y型骨架，一個唔覺意甩咗係D粥度，一囁，就中伏架啦。D街坊仲以為今鋪唔駛去果欄啦，打定輸數同我去急症室添。好彩大步檻過唧!
果欄真係好多人，生果都比較新鮮，價錢會比平日係街市見到既平D。而且可以買到貴價生果，例如日本提子、蜜瓜、白桃等。
呢抽香印提子，要$280，未算最貴，但已經比我所買既水果價錢總和多出差不多一百蚊啦。我大鄉里，食咗一粒，真係大粒到充滿口腔，冇核，亦好甜，只係皮會較厚，但唔會澀。
我買咗2個椰皇啫喱($50)、3個白桃 ($100)、9個桃駁梨($20)、爸爸至愛既超大粒秘魯藍莓($20)，只花了$190。仲想買蘋果架，因為太重，冇本事再買多D。街坊仲俾咗幾粒特大車厘子同一個綠寶石我試下，今次都算大豐收。
路途遙遠，拎到返去，有一個桃已被撞爛，要就地正法。下次都係要部署一下，帶埋D合適既容器先出動至得!
食完生果，立即沖返個靚涼，再敷返塊Bibi為我預備既蘋果多酚面膜，舒服晒!
以前果欄人雜唔敢去，但我打工個老細好嘴叼，好多時會從日本訂購一些生果、魚生、扇貝帶子之類食品。那年1980，他給我吃的提子仲大粒過茘枝，直情似乒乓球咁上下，唔使講味道當然好啦，聽他說一粒要超過一蚊，那時快餐店吃一隻炸雞髀都係三蚊咋！
回覆刪除依家粒提子要十蚊啦!講真，我又唔多覺佢有幾好食，但桃呢，就真係好好味既。
刪除我都想去果欄見識吓，因為見電視介紹過。
回覆刪除我以前都唔知有零售架，因為廿幾年前爸爸都係一箱箱橙、奇異果同車厘子咁買返黎既。
刪除我覺得果欄d生果真係正好多~
回覆刪除貴價生果同市面既差價會大好多，平價野就只係平DD架咋。但就會新鮮D咯。
刪除我以為菓欄只係賣生果俾批發商添！
回覆刪除原來依家唔駛下下成箱買架啦。
刪除