送給親友的佳品

今年的農曆年，花了不少時間去為各位姐姐及嫂嫂做了年禮，總算為大家添了喜氣！

再闖ABC

迷你蛋撻仔

山東合桃酥

馳名鳥結糖

哈哈！雖然外面落住毛毛細雨，都無阻我一闖ABC餅屋既興緻。

去到，梗係要買晒佢果三寶啦：蛋撻仔、合桃酥、鳥結糖。一路行，一路好想食個蛋撻仔，早知就叫呀姐包少個，等我一啖食咗佢先啦。返到公司，急不及待，先啪一個先，然後再分俾人食，中途梗係又繼續啪啦。一口氣食咗四個，弊！蠢咗添！咁個胃仲邊有位食合桃酥唧！飽晒，連鳥結糖都唔想食住啦。我一早就知咩味啦，請同事食就算。再食，一定食滯唧！

等到五點幾，忍唔住，都開咗一件合桃酥黎睇下，真係有合桃粒粒係裏面架喎！只係外面金黃色，裏面係米白色既，唔食過又點同大家交代呢？食咗一啖仔，好鬆化，同我地食開果d嫁女餅式既合桃酥有好大分別，而且冇咁油，乾爽好多。但我實在好飽，就同ｄ同事分咗佢。

帶咗四個蛋撻仔返屋企，兩父女都係要爭．事關食飯前我俾咗鳥結糖囡囡食，爸爸唔執輸，走去食咗個蛋撻．到食完飯啦，同Bibi一齊食蛋，一人啪一個之後，爸爸居然要Bibi將最後一個蛋撻分一半俾佢喎！

 

白雪公主

昨日，我老闆原本放工要義務教班OL英語既，但佢又唔得閒，見上星期已經走過堂，都唔係幾好意思，於是提議話改午餐時陪d學生食飯盒，係佢地公司上堂。

咁就要我打電話去聯絡一下，徵詢大家既意見．點知人地成班OL一早就約埋食lunch啦麻，咁相請不如偶遇，叫埋佢一齊出去食啦。

人地原本去船街間榮興小廚既，為咗唔好咁嘈，可以聽到佢翕乜，就改去樂意扒房啦。

我同我老闆講：「有六個女仔去，訂咗七位檯．爭一個女仔咋，如果唔係你就可以做Snow White啦！」

滷水鴨翼

睇咗人地個網誌, 知道超市有急凍鵝翼賣, 咪去留意下咯.

原來真係有架, 不過我睇果包就唔係幾靚, 仲好鬼多毛而且好少肉既添.

但俾我搵到包鴨翼, 想話唔買架啦, 但俾身邊既朋友慫恿下, 最後都買咗.

好鬼平, 十皮有好多隻. 終於都整咗滷水鴨翼.

但因為時間關係, 我都唔係煮咗好耐, 有少少硬. 梗係人地鋪頭果d好味好多啦!

呢d錢都係要俾人賺架啦!

Bibi仲話: 下次都係整返雞翼啦!

西環的黃金歲月 - 一個有心人的網誌

偶然看到小思的一篇短文, 好奇地登入"西環的黃金歲月叔叔" 的網誌, 獲益良多, 誠心推薦大家, 一同分享!

http://hk.myblog.yahoo.com/ekwleung

如果大家有興趣回味一下香港早年既面貌又或者生活情況（係圖文並茂架），就萬勿錯過啦！

呀傑叔叔，多謝您呀！

爸爸的寵物

此乃爸爸養的一只半厘米大的金絲貓是也! 要用超強放大鏡先影到架!

爸爸耐唔耐就會放佢出黎食下小昆蟲既.

 

入貨Day

 

12/10，今朝未夠六點就醒啦，賤命呀！放假都咁早醒，咁唯有睇住本小新漫畫先啦。不過梳洗完畢，我地都成九點先去大家樂食早餐。食完就叫Bibi返屋企溫習，我同爸爸就去圖書館。佢月尾就要交中文閱讀記錄，跟張書單同佢搵咗幾本書：林順潮既窮小子.傑青醫生、賴東進既乞丐囝仔、阿濃既童眼看世界、吳宇光的小小留學生，希望佢啱心水啦。另外，我仲搵到一本全新既書：美女專屬 : 淋巴排毒瘦身 = Lymph dra，見裏面咁簡單，咪即管借埋佢返去咯。

 

去完圖書館，又走去吉之島超市，執咗四袋功德林既素麵、三盒仔有機豆腐、三盒甘大滋、拉麵、米線、珍珠雞、鮮竹卷、糯米燒賣、一盒皮蛋、一盒有機蛋。幾大抽野，仲要再去西鐵站新生農舍買有機菜。買咗菜心、迷你薯仔、五衡湯包、南瓜，咁又冇咗百幾蚊啦。

素麵

新書

大過鵪鶉蛋少少既迷你薯仔

可以增強免疫力同降膽固醇既五衡湯

 

 

ABC餅屋

昨日趁到南記買外賣，順道訪尋ABC餅屋，一心買鳥結糖及合桃酥。可惜我這個道路白痴始終都係「眼大睇過龍」，居然錯過咗個街口，行咗去泰昌。因為同事在等著，只好放棄搜索行動。

今早八點未夠，又再仔細的找一趟。終於見到招牌（昨日真的是鬼黯眼啦），一入門口，就見架上有多款麵包，人客正在排隊。原來所有麵包皆由店員為你夾起放入袋內，確保沒有閒人碰過，真好！

我買了一個雞尾包（雖然放涼了，但味道真的不錯，餡不會太多、太甜）、一個芝麻包及一盒鳥結糖（雖然剛吃過麵包及奶茶，仍要立即試試，內裏的花生果然能保持香口脆度）。看不見有合桃酥，問收銀的叔叔，他說師父未上班，要下午才有。可惜！由於是早餐時段，所以亦不見迷你蛋撻。

我怎麼搞的，在中環待了這許多年，竟錯過了這一間好店。

我一定會在此店結業前，挑一個下午「捲土重來」的！

結婚及週年蛋糕

全是舊作品

意外驚喜?

無啦啦老闆話約咗個客五點幾，冇晒會議室，咪帶佢入咗間吉既律師房咯。

 

人未坐定，個鬼就話有野送俾我。唔係啦掛，咁客氣。佢仲同我講係日本香水黎，律師Daisy都有份。我唯有多謝之後就收咗佢啦。

 

無耐，老闆叫我召Daisy入去，我預先知會佢：個客帶咗禮物送俾你，一陣你咪尷尷尬尬咁呀，扮驚喜，大大方方收咗佢啦。

 

後尾Daisy同我講話：個客話你都有呀，我同你一樣味啦！不過，佢話佢老婆都係用呢只香水架！＝＝”

 

我一向都冇用香水既，拆開睇下，係Shiseido既“禪”。咁好啦，係咁意用下啦，多數都係又放係櫃桶或者衣櫃做香薰架啦。

 

Cake of the Month

今日老闆約咗人去JW’s California Grill食飯，叫佢順便用張voucher拎個cake of the month返來，算佢醒，仲記得。

原來十月係金箔白朱古力蛋糕，好甜，麻麻地好食。好彩我切開之後，一人都只係分到一件西餅咁大唧，唔係就難頂啦。

食完之後既評語係：噢！大白兔糖既味道呀！

重九登高

今日要去哥連臣角拜公公婆婆，我地由屯門出發，七點就要出門口，大家約咗八點半係筲箕地鐵站外巴士站等，爭d遲到呀！嚴格黎講都遲咗一兩分鐘，仲係最遲黎果家人，好彩冇俾人省唧。

今日三姨個樣好唔掂，原來佢昨日肚瀉黎，仲未恢復。拜完山巡例一齊飲茶，今次大家去伊利莎伯大廈既百樂門，唔知係咪因為呢座大廈新裝修，地下果層好多吉鋪。

我地一行十七人，去到梗要等位啦。趁呢個時候，我分咗ｄ迷你粘土俾大家。二家姐頭先係巴士話：做乜今年中秋唔送禮俾我？有冇搞錯！我話：月餅就整厭咗啦，果籃又送過啦，冇咩好整啦。好彩都唔係等好耐，半個鐘都冇，十一點鬆d就坐低咗啦。

樓面人手唔夠，好似好踢腳咁。我地分別叫咗幾個侍應開多壺鐵觀音，最終都冇人做到，連添熱水都係我地自己動手既。

我地呢檯只係坐咗十個人，叫咗好多點心，菜苗餃，蝦餃，燒賣，小籠包，叉燒包各兩籠，嘩！唔知邊個剔既！咸水角，奶皇包，饅頭，素菜包，腸粉，煎蘿蔔糕，鳳爪，燒腩仔，豬腳薑，煎薄餅，脆皮滷豆腐。隔離果檯叫乜我就唔多清楚啦，佢地有叫炒野。我打包埋隔離檯食淨既菜苗餃同燒賣，加埋呢檯有一籠叉燒包冇郁過、一個素菜包、一個奶皇包。

我估唔到Bibi食到咁多野架，佢食咗兩只半咸水角、一個饅頭、一條腸粉、一件鳳爪、兩件燒腩仔、一舊豬腳（佢第一次食豬腳薑架咋）、一件煎薄餅、一片脆皮滷豆腐、一只蝦餃、兩舊燒賣、三個小籠包。果然厲害！

飲完茶，只係一點唧，大家各自返歸。我就去咗波斯富街么鳳買原味合桃，把鬼！七蚊兩，但原來淋咗既，有冇搞錯呀！諗諗下，都好似唔多妥，都唔想佢做壞個招牌。打個電話去么鳯，請店員check下ｄ貨係咪有問題。點知聽電話果個即時話：原味合桃係淋架，你唔食得可以拎返黎。我話：我唔駛你換，我有買開架，我食開唔係咁味架，唔信你食下啦，我只係唔想你地做壞招牌唧。

 

唉！咁樣做生意法，真係趕客。鬼想買到唔好既貨色走返去換呀！人客買過ｄ野唔好食冇回頭就弊架啦。連Bibi都識話：乜么鳳ｄ野唔係好好品質既咩？