五月之星宴

爸爸五月出世既，咁啱五月仲有兩位朋友生日，加上Bibi都要飛啦，就當係三料生日加餞行宴啦！

我買咗一個團購八人私房菜，就請大家齊齊高興下啦。先黎一大杯豆漿，有兩個人唔飲，Bibi就隊多杯，而另一杯就兩個朋友分咗。



五小碟：鎮江肴肉、蒜泥黃瓜、雞絲粉皮、四喜烤麩、涼拌海蜇。唔錯，幾好食。



酸辣湯或者宋嫂魚羮，就下Bibi啦，梗係要唔辣架啦。

有人話好想食回煱肉，咁好啦，就整碟啦。原來佢唔係用肥肉既，所以俾人清晒。



賽螃蟹，確好味。

呢碟佐宗棠蝦，上次同事黎食過，話非點不可。大大隻蝦球，薄薄既脆皮，裹住少少汁，微辣兼熱辣辣，正！我地冇人食到辣野，所以全部餸菜都食晒，係差呢碟餸既泡椒無人問津。

上湯浸時蔬

宮保雞丁

松子桂魚，真係幾好食。呢個汁入面除咗菠蘿、蕃茄、洋蔥外，仲有蒟蒻，真係估佢唔到。

私房炒飯，我要留肚食蛋糕，一啖都冇食。

桂花糕，呢樣我都冇食，甜品其實我麻麻既。但有人食完之後，仲走去食多舊，仲以為自己只係食咗一舊咋喎。果位老人癡呆患者咪爸爸咯！

我帶咗個天使蛋糕黎，係咁意叫做有個道具。呢道要收卅蚊切餅費既，加埋一即係＄３３。

最搞笑既係我地分批出外面既廁所，但原來我訂既呢間私房仲有埋獨立廁所，唔駛出去外面既，豬仔咗添！

估下除咗蛋糕，上面果十三道菜加豆漿要幾多錢呢？

真係超抵架。。。。

＄６９９咋！

呢度一出地鐵站，行幾個鋪位就到，認真方便。但因為條例所限，只招呼會員，所以我即時入咗會啦。

多謝各位來賓，令爸爸過了一個七星伴月的生日宴。