原本我地只係諗住去下面巴士總站搭車返屋企既, 但之前入咗呢度交水費, 出返黎Bibi又話不如去今朝經過果間泰國菜度食野咯! 我其實唔係幾餓, 兩個人都唔知食得乜架, 佢咁有興致, 就同佢去啦.
拎咗輪候紙, 就係門外睇呢位大叔表現做油鬆餅. 佢見到我同佢拍片, 就即刻成個醒晒, 好似舞大旗咁, 將塊餅由拳頭咁大, 甩到兩尺直徑咁大.
佢當然係熟練技工黎啦, 仲三兩下手勢, 就整咗好幾件餅啦, 跟手仲走去煎埋添. 原來佢除咗做阿茂之外, 仲負責埋拉茶既, 搞到大家都心思思, 想一陣整杯飲下.
呢個係午餐既餐牌, 我地要咗雞絲湯河同黃金咖哩龍脷柳配油鬆餅.
原來星期一至四就送甜品, 五六日就俾前菜你. 呢一小兜粟米就係所謂前菜.
佢地既特色水杯, 凍飲既高身杯亦係同款但唔同色既, 睇落似玻璃, 其實係膠杯黎.
食午餐可以加$13要小吃, 我地選咗炸蝦餅, 點知黎到先知係一粒好似冬甩切開兩邊既大蝦丸. 其實佢咁整就比較笨, 睇落小家子氣, 情願薄身d, 會大塊d, 賣相亦會靚d. 可惜唔係即炸即奉客, 只是和暖, 要扣分, 一d好感都冇.
因為我唔記得影相, 所以撩過碗湯河, 搞成咁, 原本有塊生菜係好有氣勢既. 我分咗一碗俾Bibi.
油鬆餅當然好食, 可惜相配既咖哩遲遲都未上桌, 要我催先拎黎, 差勁!
咖哩杰撻撻, 都唔知我地d龍脷柳係咪因為佢放耐咗冇拎黎, 已經腍晒, 定佢本身就係煮成咁, 一d都唔辣, 我就唔欣賞啦, 但Bibi就食到, 我由得佢食, 我只係食少少就算.
最後叫既奶茶, 香, 濃, 滑, 有九十分!
埋單$134, 普普通通, 但杯茶係可以留住我既.
呢個係佢地門口既招牌, 我地走果陣見到有小朋友係度收集佢果d沙.
Bibi: 佢係度淘金喎! 如果我好似佢咁細個, 都一定會咁做唧!
我最近俾佢睇返我以前寫既日記, 等佢知道自己從前既種種行為; 佢都開始理解當年我為佢食咗幾多驚風散, 同作為一個百厭細路媽媽既心路歷情.
好正呀!都算抵呀!
回覆刪除[版主回覆11/07/2012 07:41:57]抵就唔算架啦，叫做負擔得起啦。
係呀係呀!! 第時俾個小朋友做日記, 俾佢知佢嘅好與壞~~ (我都係咁諗...)
回覆刪除[蚊難小王子回覆11/12/2012 15:33:18]有 save as word file 呀~~ keke
[版主回覆11/07/2012 09:41:17]要永久保存, 記住另外用word存檔返一份純文字版, 儲到咁上下就要印出黎收藏, 咁到相當日子後, 大家一齊睇(我建議要等到佢讀大學, 等佢夠成熟去分析事情原由), 就好見效架啦.
兩隻黃色小鳥很有趣，那裏可以看到？
回覆刪除[版主回覆11/07/2012 10:30:06]地鐵油塘站, 個商場叫:大本型 http://orientaldaily.on.cc/cnt/news/20110908/00176_054.html
只得杯茶可以有 90 分，好一般喎！
回覆刪除[版主回覆11/07/2012 22:19:12]咪就係咯!
我地有時睇翻仔女小時候的錄影帶都很回味，但就無同佢地一齊睇呢！佢地好似唔多有興趣，可能多數都係攪攪震！
回覆刪除[版主回覆11/11/2012 09:58:08]錄影帶又點夠我既日記咁詳細呢? 有D片段係錄影帶捉唔住架麻. 加埋我當時既心情, 我都有記低架, 咁大家過咗咁多年睇返, 就當局外人咁去討論下都好既.