冬菰栗子炆排骨

我係一個懶人，亦相信食得唔好晒，咁啱我買咗料煲栗子茨實豬尾骨湯。



每次煲完湯咁多材料，大家未必肯一一食清。所以我就要諗下計，物盡其用先!

我用鹽水浸洗咗D栗子後，就連衣放入去煲，煲到咁上下，栗子腍晒，我就撈起大部份既栗子，去衣，留返黎煮第樣野。



我浸咗冬菰，好太隻，用黎炆餸都唔錯架。

我切開佢一件件，用少少糖同粟粉撈勻，趁住蒸飯時，蒸埋佢。

蒸咗十五分鐘後，就可以拎黎煮啦。

我買咗排骨，咁多都夠啦，唔駛食咁多肉架。



用生抽、鹽、糖調味，再撈粟粉，醃一陣就可以煮拉。

我先用少少油輕輕煎下D排骨



兩面黃少少就得啦，夾起備用。

用少少油爆香蒜片、薑片、乾蔥片



放入冬菰炒下，贊少少酒。

放埋D排骨同栗子入去

加埋D浸冬菰既水，差唔多水位就得啦。

加兩匙蠔油



滾起就轉細火，一路煮到收汁。

用粟粉水打個獻就食得啦



淥多條菜添，咁就搞掂晒我同爸爸既飯盒啦。