牧羊少年餐廳

我好少睇八掛雜誌既，因為自己玩手作、睇書、打機都冇晒時間啦。所以基本上係唔會有時間研究下邊度有好野食既。今次約咗琪兒同黑咪去tea一tea，我決定日子，琪兒就決定去呢間餐廳啦。



大家都知我係路痴黎，不分南北西東既，所以我一早就做定晒功課，影定地圖，坐咩車，係邊度落車，返黎又係邊度上車等等，都大概有個譜。



我比預計時間早咗半個鐘落咗車，一個話塞緊車，一個話要遲少少先到，唔緊要，雖然我未黎過呢頭，隨緣逛下街都唔錯。一對手襪，4個樽仔，一個玻璃碗，一隻不鏽鋼豉油碟，加埋只係$17。

雖然佢地未有耐會到，我先去現場視察環境。嘩，已經有人係門外等位，咁我都係去拎張飛仔先。

 

門外既全部係後生仔女，得我一個阿蟬級人馬。等咗大半個鐘，佢地兩個都陸續到啦，終於都有位啦。

一坐落，個侍應就幫地開定枝酒。講笑咋，係水黎。

點完食物就放低盒餐具俾我地。

食物未到之前，影幾張餐廳入面既相先。

果然係牧羊少年呀嗄，入面工作既，起碼個樣全部係廿五歲樓下既。

我地全部都冇食午餐，所以唔叫下午茶啦，乾脆全部都點午餐食下。先黎餐湯:

暖暖既餐包，好明顯係用微波加熱過既。

牛油

琪兒既黑椒牛柳長通粉

黑咪既白汁海鮮意粉，佢對蝦有敏感，所以面頭果五隻蝦都過檔晒去我同琪兒既長頸樽。以為佢碟野搞到得返D青口同蟹柳，點知原來禾幹KUM珍珠，下面仲有塊魚柳添既，意外既驚喜呀! 請留意伴碟既沙律菜，都係認真既貨色黎。



我竟然點咖哩雞，其實好冒險架，係呢D地方可以俾D咩咖哩我食吖? 我只係唔食牛，又唔想食白汁咁heavy，見佢係搭紅米飯，先叫架咋。

點知 ....................

出奇地好味，咖哩汁一D都唔辣，好香，好惹味。雞，好腍，老實講，我最怕食果D煮到D雞霉晒既所謂入味咖哩既，但呢度就唔會腍到霉，仲冇骨既，D薯仔同青椒都好入味，我唔食洋蔥既，所以.... HEHE .... 我淨返D洋蔥係碗入面，但D汁就俾我刮到八八九九啦。

我食食下同黑咪講: 我想話你知呢..... 呢碟野.... 好好味呀! 你下次黎一定要試下D咖哩呀!

佢地兩個都係飲黑咖啡既，一個要杏仁咖啡，一個要栗子咖啡。前者有杏仁油味，後者就有甜甜既氣味。

我呢，睇咗食評，人地話百香果綠茶好味，所以咪試下咯。

大家除開七十個大洋，你問我會唔會做回頭客? 會架，我都想帶爸爸黎試下，但佢一見門口既場面，實唔制都得啦。