用雕刻刀臨摹國畫(二)

話咗要雕梅花套色章，就梗要做埋d花既。我都算醒啦，先雕咗難果幅樹枝先，事關有咩冬瓜豆腐要犧牲果塊畫咗樹枝既橡皮（大家可以去睇返之前果篇：用雕刻刀臨摹國畫(一)），都可以保留返呢塊大擦膠整過第樣吖嘛。



畫到鬼五馬六，係咪覺得好似好多腳印咁呢?

相對之前果個章，呢個真係易過借火。

因為冇乜難度，雕起黎就好快，而且清理現場都好簡單。

得一個粉紅色印台，姑且上一上墨試下。

搵幅之前試印既樹枝圖黎試位，歪咗少少，但效果都唔錯喎。

好啦，再試過，如果啱位就可以用筆記低個位。

唔，呢幅肆正好多啦，總算叫做似返d樣。

無論咩角度，上、下、左、右去睇，都好ok喎。相信係d花上面加埋凸字粉既效果一定好靚唧!

若然加埋祝福既字句，用黎做心意卡、書籤或者賀年狀，都咁適合。

個套整咗成個星期先完成既套色章，叫做順利誕生啦．大家認為我呢篇研究生既論文合唔合格呢？