秋葵節瓜蝦仁炆米

雪菜火鴨絲、炸菜肉絲炆米大家就食得多啦，台灣人就常用南瓜來炆米。我呢，就因為之前果日懶冇煮飯，爸爸又切咗D節瓜絲係度，見大家又唔多肚餓，咁整咩做晚餐好呢? 

不如唔煮飯啦，就炆米啦。切埋D雲耳絲、薑絲。

其實雲耳同秋葵都係昨日預備咗，又冇煮到既。咁為咗配合D米粉，所以秋葵我都開邊啦。

米粉我只係浸軟就算，隔水備用。蝦仁就開邊(見食D嘛)，用鹽、胡椒粉同紹酒醃下。

 用油爆香薑絲

先炒蝦

半熟就畢起佢 

再放埋D薑絲，炒節瓜

跟住加埋D雲耳 

放少少蠔油，兜炒幾下，加D水，加蓋焗一陣。

覺得節瓜有少少軟，就加米粉。用筷子翻炒其間要加鹽同水，我又貪好味，加咗大地魚粉(如果想香D，就爆薑絲時一齊放)。

米粉兜到熱晒就加秋葵

炒勻就加蝦仁，再炒下，蝦熟啦，就可以起鑊。 

爸爸一路食，一路投訴，餸太多啦，都冇乜米粉既。