北極甜蝦炒飯

夜晚冇煮飯，第二日又唔想做無飯市民，就入廚房睇下有咩可以整啦。

雪櫃仲有D冷飯，咁就炒飯啦。

冰格有北極甜蝦刺身，求其俾水喉沖下，就剥殼啦，藍灰色既係蝦籽。

仲有子薑同秋葵，都用少少啦。

子薑好嫰，所以好易切成薄片，再切薑米就易啦。

呢啲就係我要用既配料啦。

甜蝦放少少鹽、胡椒粉同紹酒醃下，就可以拎黎炒架啦。

受熱後蝦籽就會轉色，盛起備用。

再放少少油爆香薑米

放入冷飯，加少少鹽，我再放少少大地魚粉(其實爆薑米時可以順手加既，會香D)，更加好味。 

炒到D飯熱晒，就放入秋葵粒。

兜到咁上下就放埋D蝦入去

兜幾下就係鑊中間挖個窿，放少少油。 

打個蛋入去，再快手兜勻，想香D既，就再挖個窿，灑少少生抽兜幾下。

咁就食得啦!

咁第二日就唔駛諗午餐食乜啦。