蛇年竹報平安, 富貴吉祥 (七)

最初做好果三盆，我選咗一盆出黎，係收爐果日帶返公司送俾嬸嬸。

係，我去到年廿七，手頭都仲係得第一盆試驗品同兩盆新添架咋。

 

我揀呢棵黎上盆

咁我仲要係咁意加返D裝飾先有賀年氣氛架。所以我特別做了一批小揮春。我搵唔到大紅色既環保紙，唯有用有少少坑紋既環保信封黎整啦。

咪以為佢地易做呀，膠紙係唔可以好燙貼咁蝕係呢D坑紋紙度既，所以刮刮刮都花咗好多時間，尤其佢地打個乞嚏都會飛走既。

選咗一對，就貼好佢，呢個就係我今年既定案啦，可以送俾嬸嬸架啦。係未送出去之前，我都有俾其他同事觀賞下，大家都好興奮咁爭住要同佢拍寫真。

年廿八，洗邋遢，我請咗假去洗刷抹刮。好慶幸自己有呢個決定，正好俾少少時間我走盞，去完成埋呢D年禮。

八棵內膽排排企。

再添埋外圍既竹，就成形啦。

呢度九盆架啦



要上盆啦，我得返好少綠色粘土咋喎，要再搓過呀? 好煩喎，咁點好呢? 早幾個月，Bibi呃鬼造月餅，用剩咗好多蓮蓉，咁就用埋佢啦。

我用咗黎做內膽

再蓋一層綠色上面，鉗出草紋。

再上盆

再逐一貼上小揮春

因為做多咗一棵試驗品，所以唔夠盆用，我既盆仔存貨，已經用晒，咁點呢?

咁唯有用塊圓木做底，將試驗品果棵放上去，做set日式架啦。

雖然送咗一棵俾人，依家仍然有十盆係度。



人人都好想自己係幸運兒，可以配給到一盆。

有d朋友仲話: 你做開又唔做多d!

嗄? 你估啤出黎架，每盆都要好幾小時先完成到架，縱使我已經係一個熟手女工，d工序都係唔慳得既。以呢盆野既獨特性，相信喜歡收藏迷你小物珍品既朋友都好願意訂購，尤其用黎送俾德高望重既長輩，一定會令佢地好開心唧! 但我實在冇咁多時間同心機去整咁多出黎。

今次，我決定留返棵俾自己，



我既富貴竹林就係咁誕生架啦。



俾個高炒既角度大家睇下:



呢個係蛇年富貴竹陣，正好為蛇年添喜氣，恭喜! 恭喜!