愚公移山

間屋住咗多年，都冇化過妝，好想將佢重新粉飾一次，希望過農曆年前可以完成。

大小不良，又話要返工，又話要返學。兩個都三更半夜先放工，尤其Bibi，跟本冇假放咁滯，我又點會咁殘忍焗佢地出手吖? 有時間我都留返黎親子活動去下街、食下飯好過啦。

我心信愚公移山既道理，係兩個月內，只要我肯動手，一定油得起間屋既。我係櫃入面搵到一罐爸爸以前買多咗既一罐白色油，雖然只係得一公升，但足夠我試油大門果一忽既牆同天花。經過評估後，我好有信心自己搞得掂。

首先，要的起心肝去買桶油。靠得住又較近可以買到漆油既地方，係蝴蝶村，我都拖咗幾個星期先去買。



要油晒間屋，梗係要用大罐既油啦。五公升既油漆，絕對唔係五公斤米或者五公升清水咁輕架，我差D連搬桶野去收銀處都有問題。仲要揹返屋企，都幾大劑。



好不容易抬到返屋企，又放咗好幾日。點解? 大家都知一間住緊既屋，一定四維都擺晒野架啦，要將所有貼住牆既雜物撤走，先可以油到爿牆架麻。



到我肯動手啦，又遇到個難題，原來渣雞都冇力既我，係冇本事開到桶油既蓋架! 掙扎咗好耐，都開唔到，唯有叫已經換咗制服準備返工既爸爸出馬(我一路都唔叫佢出手，係因為驚開蓋果陣有咩冬瓜豆腐，佢套制服就會遭殃)，好彩佢都幫我開到桶油唧。



第一步，我油咗客廳既一角。大家見唔見到條明線呀?就係電熱水爐果條線啦。我初時就住就住唔好油到佢，但就成日high到佢喎，油油下又懶得去抹返d油，早知就一不做，二不休，乾脆油晒條電線佢啦。



我屋企係冇梯既（唔好問我做咩唔買，用完放係邊喎），老實講吖，我油天花板真係好mun水，企上張dun度，勉勉強強油到架咋，所以只可以油到頭頂少少既位置。後來我著咗對高跟鞋，就油得冇咁辛苦啦。

又過咗一星期，我油咗廁所門口度牆。

再一個週末，呢間房我分咗兩日先完成。順便洗埋個冷氣機。

每星期都有少少街去，進度都好慢，呢度係廳既另一忽。

終於搞到1/2，爸爸都休息既日子，油埋廳既最後一角，總算可以告一段落，廚房既天花係冇油到既。算把啦，我區區一個師奶仔，油咗間房同廳，已經好叻架啦。