B Duck彩繪蛋卷

彩繪蛋卷興起，一路都冇玩過，呢輪鴨仔大熱，見到有個上課地點幾就腳，約埋D同事，齊齊去玩。

呢D係調咗色既麵糊，方便大家畫公仔既。



睇過導師示範



大家都好認真咁畫。

因為大部份人都未玩過呢D東東，所以個個都係用比較簡單既圖案。而我呢，就貪心，畫咗成個頭。

將呢張紙鋪係焗盆上，再放入雪櫃雪到凝固。

可以開始打麵糊，先預備蛋黃、麵粉同奶。(因為冇咁多個爐，所以有部份人要跟住導師，同步進行。)



將奶倒入蛋黃入面

再篩粉



再搞成滑滑麵糊



預備蛋白同砂糖



用攪拌器打起蛋白，分三次將砂糖加入

打到蛋白企身為止




大家睇完又照版煮碗自己黎

然後就可以將頭先既蛋黃糊拌入去蛋白度



口訣係: 兜底刮邊，好快就勻循晒



係雪櫃拎返自己畫果份圖案出黎，將麵糊倒入去，再掃平。



就可以放入焗爐焗啦。



焗十五分鐘咁上下，就出爐啦。認唔認得我D卡仔呀? 幾襯!

要放涼一陣，仲要先揭起四條邊透氣。



係呢個階段，睇黎大家既作品都幾得。

呢個係我畫既，枉我雕咗咁多印仔，唔記得寫字要反轉添! 衰咗!

 

其實我地可以任意裝飾四周既



所以有D人會畫多D花臣。

男仔版同女仔版都有

 

緊張時刻黎啦......大家要小心撕開張底紙啦。

到底成唔成功，就睇呢刻啦。

睇黎有D同事都好滿意喎。

而我呢..... 係全場至失敗果個，因為...... 你地見唔見呀? 我爭幾乎係全部圖案都留返晒係張紙上面，真係張紙仲清過個蛋卷上面既圖案。汲取教訓，下次我會醒少少架啦。

反轉塊蛋糕，搽忌廉。



跟住卷起



都唔係咩難度動作黎，大家都做得好好。




咋一聲就卷好



有D人既圖案都有甩甩離，但冇我甩得咁慘唧。

用紙卷返住條蛋卷，放入盒帶走，拎返屋企雪兩三粒鐘就食得啦。

我初初都唔敢拎出黎俾Bibi睇，費事佢踐扁我。

第二日，朋友問我好唔好食? 我即刻拎出黎切開試下，出奇地口感同味道都過得去，真係有少少感動。

雖然我的蛋卷失敗了，但沒有影響到味道。只是Bibi打開包裝紙後說: 原來只得紙上有圖案啊!

也不是咯，蛋卷上明明是沾有繪圖的呢!

呢個中心，我地應該唔會返轉頭啦。一來冷氣不足，二來做得唔夠專業，導師自己都冇紮起頭髮。

佢地真係捉到鹿唔識脫角，如果佢做好D，我地或者會介紹朋友上黎，或者再組團包班黎玩。導師可能驚我地超時，要我地一半人跟住佢一路做，咁你都知開住部電動攪拌器有幾大聲架啦，仲點鬼聽到你翕乜至得架?

呢個場舒適度不足，同事話觀塘工廠區烹飪教室既環境就好得多啦。而我呢，去呢D地方既經驗唔多，我上次去橘子烘焙做朱古力，雖然地方細細，連洗手都要出外面，但感覺就好得多。