尋找舊日的足跡 - 灣仔

約咗黑咪見面，預備帶佢逛下我冇踏足成卅幾年既部份灣仔區域。

先到老牌茶記金鳳食個早餐，火腿庵列加包，兩樣都唔多掂，好醜食一餐啦。



先到兒時的灣仔郵政局，依家已經變咗環境資源中心。

呢個係現時改裝後的模型。左下角起，員工專用既洗手間及雜物房、入口所見工作人員櫃檯、資料圖書館、太陽能園圃及環保軒(內有烏龜池)。

入面有兩個放滿資料單張既架

大家可以記低自己需要既資料編號，向工作人員索取。




呢個就係1915年開始使用既郵箱:

資料圖書館果邊，有好多介紹環保知識既海報。

其實香港要實行利用再生能源，未必不可能架。

我地去探下D龜龜先!

大大小小既龜龜都有七八隻架。

跟住我就帶黑咪兜去後面既斜路，行上我地細個果陣叫二馬路既地方。(晨運人士會叫呢D斜路做三馬路同四馬路，可以通去山頂既。)

聖雅各小學原來變成咁靚，我真係唔知添!

兒時常來的北帝廟，入面既四大金剛，我當年覺得好似巨人架，如今睇返，又唔覺佢地好高大咋喎。

屈指一算，呢座廟今年剛好有百五年歷史啦。

門口擺咗幾張巖石面既dun仔，事業運、健康運、學業運等等，我叫黑咪係咪都坐下，沾下光。

後面呢塊休憩空間，變成了石水渠街花園。叫得花園，好心康民署就種多少少花啦。

我從前的母校，呂祺官立小學，後來改為教育中心。

附近仲有好幾棟舊樓，仍未拆卸。

當年我日日經過呢度

原則上對呢度冇乜大感覺，但知有同學仔住樓上，佢就好啦，咁近!




唔知係咪因為藍屋出咗名，呢兩棟都油埋鮮艷d既顏色去襯返呢?

從前既灣仔大街市，係咁意保留了原貌。

但上蓋就起咗成棟摩天建築。

天氣濕熱，去合和中心過下冷河先，沿途見到勞斯萊斯陳列室。

呢一帶搞緊一個叫太陽能花之舞既活動，用黎配合五月國際美食既。我地行完超市(我地好刻制，只買咗兩個包同紅菜頭)，再去快餐店飲杯野先再繼續行程。

兜埋灣仔道，搵到間好大既雜貨家品店，第日可以再黎呢度尋寶。再行去以前國泰戲院果頭，真係面目全非，黑咪又買咗d利是封黎做手工。

成兩點啦，都係時候食下野啦。我一早就諗住要試下呢間店。



佢標榜不含味精，黑咪睇中豬膶，我就好想食下佢既豬仔蝴蝶腩。

價錢都唔平架，最平都要四十幾蚊一碗粉麵。

d蝴蝶腩真係幾正，湯亦好味道，熱辣辣，正!

跟住我地又去蒲洛克道圖書館，黑咪都好高興，佢搵到d係第二度要waiting list既書。我費事重，只借咗兩本。

分手之後，我就上咗四眼妹屋企坐下。又同佢地去食埋吉野家，再去759掃貨。

原來買滿五十蚊就有即磨咖啡送，咁就俾四眼妹飲啦。

再坐巴士返屋企，都係七點幾唧，剛好出咗去十二個鐘。