Felix the Cat

見到人地去韓國旅行，食店入面有幅 Felix the Cat 既噴畫。

咦，係喎，點解我從來都冇諗過要整一隻黎玩下既? 可能我一早有考慮過都未定，只係當時自己未夠班，太複雜既話實整唔到，所以諗都冇諗過去整唧。

依家應該時機成熟啦掛? 拎咗張用黎整紙蕾絲既厚身牛油紙黎畫，都覺得自己大晒呀! 又想可以不斷循環再用，唔敢畫得大力。




點知轉印之後，好似玩魔術咁，手同腳都識隱身。

搞錯呀 ......... 明知我咁C懶，實唔會再畫過架啦。咁點整呀? 後來我諗住出術，只係描多次隻手，再係上面轉印多次。點知仲衰，搞到重影添! 今次又係像霧又像花，斷估冇辛苦。事關最重要既部份: 靈魂之窗都仲叫做清晰既。

去到試印果一刻，唔多唔少都會有D緊張既。希望冇衰到補救唔到就得啦。

拎個好新淨既Versa Craft藍色印台黎用。點解呢隻新版橡皮唔上墨既? 佢咁鬼濕，D墨好似水珠咁凝聚埋一齊，搞咩呀? 唔知印出黎咩樣架呢?

哎吔....... 有裂紋既! Bibi仲話咁樣仲型喎，都唔知咩人黎既。

搵張紙巾印下先，都係一撻撻。

唯有抹過塊面，搵另一個印台試過。

又係呢個啡色，專登唔用黑色既。佢仲唔夠污糟貓咩?

印紙既效果都OK，終於睇到D瑕疵位啦。個下巴要修一修，順便畫埋條眼線咁啦。

好，搞掂。要再試印睇下有幾大改善先，咁就唔好晒啦，順便印埋上張卡度，又可以用黎做張心意卡啦。

佢都叫做有6cm x 8cm架，用咗好大舊擦膠架啦。