第一個母親節

點解我話呢個係我第一個母親節呢?

因為咁耐以黎，母親節呢一日我都係做老臨既。奶奶仲健在果陣，固然係以佢為專，我只係諗下送咩俾佢，拉大隊出去氹下佢開心就得啦。到佢唔係度，我地都冇再慶祝啦。

每年到呢日，求其大小不良唔激我，就已經算同我做節架啦。

今年比較特別，因為Bibi Year 2 開始返part-time，有經濟能力，唔駛再下下要我俾錢佢洗啦。除咗有禮物收之外，仲兩母女過咗日二人世界添。

因為佢第二日就要返Summer Intern，所以早上佢仲要做下功課先，我地差不多成十二點先出門口。

先去尖沙咀新港中心既大食代食Pepper Lunch。




都多人架，終於搵到位，但係張椅俾人倒瀉咗汽水。清潔阿嬸收完野，仲吩咐我自己抹下張椅先好坐，佢連地下既水都唔理就走咗去。我都唔怪佢既，個場咁大，佢又真係好忙既。

我身邊既，係四個自由神。兩個廿零歲既瘦師奶，同兩個五、六歲既細路。佢地叫既食物，真係令我歎為觀止: 大碗日式牛肉飯、一碟炒飯、一碗地嶽拉麵、韓國炒年糕、雞扒併帶子加蛋包飯、兩碗羅宋湯、一碗酸辣湯、十隻餃子、三杯果汁。

我都好懷疑佢地點食得晒D野，最後佢地都係食幾食就掉低晒D野。你地數下，碟餃子佢地只係食咗三隻咋，仲係個男仔食咗兩隻，即係其他人根本就唔想食，咁做乜仲要買唧? 呢度唔係有人服侍既餐廳，佢地真係走黎走去咁行幾轉買返黎架。其餘既食物頂多係食咗一半就唔要啦，浪費程度，真係叫埋我同Bibi幫手食都唔會食得晒。

俾佢地咁搞法，我真係咩胃口都冇晒。好彩我地買既野要好幾個字先有唧，到我地既食物上檯，佢地都走咯。我又有返胃口啦!

呢個係Bibi既照燒雞扒飯加蛋同芝士:

我就係食黑椒三文魚飯，試過有次食韓國石煱飯，落晒D豉油咸得滯，今次就醒好多啦，撈勻晒D飯，食過夠唔夠味先加，咁就萬無一失啦。

睇下我地幾乖，食晒D野。

跟住四圍行下，見到某商場既兔仔俾人蹂躪緊。原來個請勿攀爬既指示牌係廢既，大人細路都係咁上晒去。

去到iSquare，見UA冇乜人排隊，又見到有我想睇既一齣印度片，就買飛睇戲。

呢齣戲真係幾好睇, 原來用我張信用卡買飛, 有八折架.

睇完出黎都七點幾咯，坐返車入屯門食晚餐。

呢間小店咁夜，已經冇乜客啦，爭幾乎任坐。



我地點咗雜錦魚湯米線，矇得滯添! D湯都幾好味，又夠熱。

我呢個魚香茄子豆腐飯就唔得啦，好明顯，D茄子係分開煮既，一啲都唔入味，仲唔太熱添。

不過，好醜食一餐啦。為咗個魚湯，我諗我會再次幫趁既，只係唔會再叫呢味餸唧。

全日冇俾人窒住晒，feeling good!