和睦

人懶除咗無葯醫之外，仲會因為咁而為自己製造麻煩同遺憾。以下就係一個實例。

話說我呢個孤寒踱，拎咗張月餅盒入面既花呢碌包裝牛油紙，就黎寫書法家王羲之既字。因為唔係好上色，一路寫，其實一路都唔係好睇得清自己係度描緊乜，再轉印，真係像霧又像花。



我仲犯咗一個嚴重既錯誤，就係冇睇清楚自己有冇寫齊D筆畫就即刻開工。好老實，個睦字，我只懂楷書既寫法，呢個行書，對我黎講，可算是半外文黎。

終於，雕完印出黎，先睇到自己寫少咗一點(又一次蝦碌)。果一刻，真係有D down。

咁點好呢? 都要疊埋心水唔要得架啦。但係一個字唔得唧，個和字仲見得下人架喎，一於切返佢出黎。

單單一個和字，可解作和合、平靜、共融，本身呢個字已經係天生麗質，唔應該隨意捨棄佢既。




所以我決定保留佢，日後加回手柄，就係一個見得人既印章啦。

咁唔小心既錯都可以發生既，認真抵罰。所以我要自己重新再做一次。今次我幾大都去Bibi個筆袋度搵過枝靚鉛筆黎寫過。拿，今次既筆畫就齊啦。

 

第二次雕，失去咗新鮮感，係有d冇癮架啦，但總叫順利完成既。

印出黎，雖然睦字既部首"目"入面第一畫都係落刀重手咗，搞到果一筆弱咗，都叫做係一個完整既字章。

唔苛求既，都會收貨架啦。

用深色少少既印台試下先

大家都應該睇到，好明顯，兩個和字係好唔同既。臨摹時既筆觸同落刀時既手法，係會令整個字變得不一樣，尤其我呢D，不按本子辦事，一路雕，一路改既人(硬係覺得自己之前描得唔夠好，要一路修正既)。

所以天下無一個手刻印章係相同既，呢一點亦都係手作印章迷人既地方。

仲會唔會整第三個呢個term? No way!