瓜子殼

每次買親有機南瓜，我梗會留返D南瓜子黎食既。只要收集埋一齊，洗乾淨外層，吹乾咗，就可以剝黎食架啦。

只要吹得夠乾，D瓜子就好易剝。食完瓜子，仲可以儲起D瓜子殼，打碎之後，可以混入泥土內做肥料。



有日入元朗食完粥，行過街市，見到有好多唔同品種既南瓜賣，爸爸就選咗呢隻香芋南瓜。



切開黎，D肉係似夏威夷木瓜咁色既。



我好小心咁將D南瓜子集埋一齊。



洗乾淨，索乾水，再攤開黎自然風乾。

過咗一日，比較薄身D既瓜子已經乾咗七、八成。

未夠乾既就繼續風乾，因為呢隻南瓜品種幾好，真係又香又糯，所以我唔會用非天然既方法去烘乾佢(爸爸最興用風筒吹)，免得傷害D種籽，或者有人想拎黎種都未定麻。

一早俾我食咗果D，就留返晒D瓜子殼，用乾磨機打碎。

我專登唔要咁碎既，太粉都唔係咁好。



有D我就灑係泥面，等我D越南椒享用。

另一D，我就灑係同事寄養既迷你燈籠椒D泥面，再鋪返一層泥上去，睇下邊種方法會長得好D先。

實驗結果顯示, 就咁灑泥面既, 淋水後有機會發毛, 長出霉菌, 易滋生蚊蠅, 好彩我呢頭冇既唧, 過多兩日, 我繼續淋水, 又冇乜事啦, 家居就唔好咁做啦, 都係乖乖地蓋返層泥係面啦.

另一部份, 我叫爸爸打碎d, 用樽裝好, 留返第日慢慢用.