華姐慶生宴2013

華姐生日要出走，我地選咗去荃灣既季季紅同佢提早賀壽。



檯面既豬耳，少少辣，原本就幾好食既，俾我食到粒砂，有D冇癮。

上openrice睇過，豬肺湯唔錯喎，就整返煲啦。湯就幾好味，但D材料好似唔係呢煲野親生架，D菜都仲係爽既!

主角出場，華姐隻豬呀!

侍者用鉸剪同佢解體，仍然咁好氣勢。

我喜歡食骨多D，整隻華姐左脾先!



隻豬都唔算太肥既，睇下D飯粒就知啦，碟底冇留低太多既油，我都食咗兩件乳豬同半匙飯。終於都食唔晒，剩咗細半隻豬同兩盒飯，阿比、阿蛙同Sand Sand捱義氣搞掂佢。

呢碟雜菜同雜菌夠清淡，可以中和一下乳豬既濃味。

蝦籽柚皮既獻好杰，我情願佢用清湯上。

呢碟大蝦伊麵，我冇試過，剩咗大半，阿比好衣食，一於打包。

豉汁蒸黃立倉，婷婷好滿意，大讚好味!

一檯食物，仲以為齊晒，點知原來仲有兩味未到。

好厚好大件既家鄉煎藕餅，大家乖乖搞掂自己果份，好快就清碟啦。

蒜蓉粉絲蒸扇貝，冇失拖。

生日就係咁意整個蛋糕啦，最近出咗一系列新野，我選咗呢款。

個樣好似幾好咁，婷婷一睇到個單張，就話想食綠色果個。

蛋糕既解構係咁既:

 

實物呢，真係冇乜走樣喎!

個蛋糕雖然細細地，人少少就啱晒，味道都OK。

華姐送俾大家既古古力。

有得揀，我梗係要dark啦!

我終於都買到呢D芒果蓉做既棉花糖啦，之前應承過如果買到就請大家食既，所以人人有份。(幅相暗得滯，俾我調過色之後仲搞成咁，其實應該好似上面果幅咁色既。)

我用咗呢個熱朱古力既包裝，將份禮物送俾華姐。



我都知佢十成九唔為意呢包係特別禮物黎，事關我見佢係whatsapp傳咗幅相俾大家，多謝大家既禮物，呢包野係原封不動咁影相既。

原來佢真係影完相之後就連埋其他手信食物放咗入食物櫃，諗住阿仔返黎俾佢拎返宿舍飲既。

我唯有開到口同佢講，要開架，零卡路里架。佢先識拆咋!