脆脆曲奇蛋撻班

蛙妹吹雞，在開業前試辦烹飪課，一眾姊妹紛紛響應，攜眷出席。難得Bibi肯陪，我老虎蟹都上下呢個超齡親子班。

三點的班，我地十二點半就出發，在荃灣綠楊坊食午餐。呢個兒童餐相當吸引，架跑車實物更靚。




我地冇小朋友在場，所以未能光明正大地叫黎食，咁就點碗元貝拉麵啦，D元貝雖然冇圖片咁大隻，但都相當好味。隔離檯果對情侶都有點，但上菜時，我聽到個女仔講: 嘩! 乜好似食剩咁既! 都唔係吖，湯多D唧，入面D麵夠彈牙，元貝鮮味，湯夠熱，已經有七十幾分啦。

Bibi終於食到蛋包飯啦，佢都幾滿意。起碼冇媽媽整果D A 貨咁大落差吖麻。

我地呢，就係上呢個蛋撻班啦:

做定功課，坐馬灣巴士331號，三個站就到(車程15分鐘)。

每四個字一班，其實都幾疏，假日真係要加開先得。

我地去到見到條龍咁長，見唔到龍尾既，真係有少少嚇窒。

企咗半個鐘先上到下一班車

好彩三個字就到啦

估唔到我地係第一對到埗既學員

檯面已經預備好材料

將牛油同糖粉混合

要搞到佢米白色

加麵粉，拌勻

再加蛋液，變成麵糰後，用保鮮紙包好放入雪櫃。



之後，可以開始預備蛋漿啦。先用暖水搞溶糖。

打蛋

將蛋打勻後，加入糖水

然後加奶

再隔一隔蛋液

大家都分到一份蛋液

皮略冷藏後，用磅秤出20-25克重的麵糰，壓在撻模內。

倒入蛋液至八分滿

再開火焗

中途要睇火, 開下門疏氣

免得蛋漿太老

呢幾隻係婷婷既:



我地兩母女果六隻, 加二少果三隻。

影返幅相先

我地太孤寒，驚瀉，蛋液放得唔夠。為免拎返去失真，我同Bibi就捱義氣食埋爸爸果份，一人啪咗三隻(飽到我晚餐都慳返)。

剩低既撻皮，我地拎黎焗埋佢。

冇蛋撻食，俾幾塊愛心曲奇塞住爸爸個口都好既。

回程時，都好長龍，好彩加開咗一班吉車黎呢個站。我原本都有位坐既，但下一個站就有俏嬌娃長者上車，想唔讓座都唔得啦。Bibi都乖，亦讓咗佢個位出黎，企一陣唧，唔緊要啦。