Dark Lord - The teenage years

呢本書好得意，係2012既得獎書黎。話說黑魔王同白巫師鬥法輸咗，穿越咗去現代，失去一切力量，被困係一個13歲既男仔軀體入面，仲要由暫托家庭(Purejoie)托管，呢家人咁啱有個同齡既囝囝叫Chris，後尾做咗佢既好朋友。

社工同心理醫生就以為Dark Lord因家變，受咗莫大刺激，導致神經有問題兼失憶。問佢叫咩名?佢梗係話自己係Dark Lord啦，但D大人就當佢心理有問題既，你叫Dirk Lloyd咋嗄嘛? 咁黑魔王從此就被逼叫咗呢個名啦。

阿Dirk係學校認識咗另外兩個同學，Susan同Sal(前者被Dirk誤以為係吸血疆屍，後者係木球隊隊長)，成為好朋友。其實呢幾個同學(連同Chris)都唔相信佢係黑魔王，仲成日戲稱佢係Lord of the Dirkless。

呢幅係Darkland既地圖，Dirk一直都係度諗方法返去。

至於佢既校園生活，就強差人意啦。仲成日俾老師評為麻煩學生添。呢份係佢其中一份功課，係要畫地圖既，睇佢稱呼自己既屋企做監倉，就知佢十成九要重做啦。

故事結尾講到佢地真係湊合咁搵到一個返去Darkland既方法，點知.......陰差陽錯，將Susan送咗返去.............

原來仲有下集，咁就等我第日有機會借埋返黎睇下先。