Book Binding - 原來薄書散頁係咁修復既

今天要早閃，所以要開turbo快D做，做得幾多得幾多。睇下背景既書海，就知呢度有幾多書啦。

今次呢批書特別爛，比建築系更差。其中幾本，好眉好貌，原來中間果張都甩晒，有本仲缺頁添。

就係咁甩出黎。

書皮背面，仲係印埋野，所以不可缺。一般做法係掃描一頁，印出黎再粘上去。

但我選擇小心D咁將書頁撕開，咁就可以保留內頁文字啦。

即係咁

書頁原本是靠兩粒書釘釘裝的，就要先起釘。

我先將一端鎚平，再順勢拖粒釘出黎，咁就最唔傷本書。

請教工場D阿姐，平日係點處理既。原來好簡單，用錐子拮三個窿。

先由中間個窿既底部把針穿入

再由一邊穿出

一扳就去到另一頭個窿，又穿入去

再係中間個窿拮返出去，扯實D線就包住中間打橫條線打結，剪埋線口就完成。跟住照正常程序: 做白殼、裱書面、包膠、書肉上底面紙，加磁帶、上書皮，就可以交貨啦。

處理舊書，另一個大麻煩，就係除去書脊既背膠。老化既膠，有部份脆卜卜，有部份又煙煙韌韌，剷到你傻，又唔可以傷到本書。

呢本比較薄，但單單剷走D膠，就搞咗我幾個字。睇下檯面D戰績，就知有幾煩。

最後做完五本要穿線既薄書加一本厚厚既Qualification Programme，同埋果棟書由上到下，做到中國茶道果本為止，剩低既就要輝哥執手尾啦。